హైదరాబాద్ మహానగర పాలకసంస్థ-జీహెచ్ఎంసీ ఎన్నికలకు సన్నాహాలు మొదలయ్యాయి. ముఖ్యమంత్రి కేసీఆర్ గురువారం నగరంలో అందుబాటులో ఉండే మంత్రులతో ప్రత్యేకంగా భేటీ కానున్నారు. ఈ సమావేశంలో ఎన్నికల నిర్వహణకు సంబంధించిన అంశాలపై ప్రధానంగా చర్చించనున్నారు. సీఎం సమావేశం తర్వాత ఎన్నికలు ఎప్పుడు నిర్వహించాలనే అంశంపై పూర్తి స్పష్టత వచ్చే అవకాశముందని భావిస్తున్నారు. అటు త్వరలోనే కేబినెట్‌ భేటీ ఏర్పాటు చేసి జీహెచ్ఎంసీకి సంబంధించిన పలు కీలక నిర్ణయాలు తీసుకోనున్నారని అధికారవర్గాలు వెల్లడించాయి.
జీహెచ్ఎంసీ పాలకమండలికి వచ్చే ఫిబ్రవరి వరకు గడువు ఉండగా.. అంతకంటే ముందే ఎన్నికలు నిర్వహించాలని ఇప్పటికే ప్రభుత్వం నిర్ణయించింది. షెడ్యూల్‌పై గతంలో కొంత అస్పష్టత ఉండగా దుబ్బాక ఉప ఎన్నిక ఫలితంతో జీహెచ్ఎంసీలోనూ ఎన్నికల వాతావరణం ఒక్కసారిగా వేడెక్కింది. ప్రత్యర్థి పార్టీల కంటే ముందే ఎన్నికలకు పూర్తిస్థాయిలో సిద్ధం కావాలని సర్కారు భావిస్తోంది.
ఇదీ చదవండి: దుబ్బాకలో తెరాస పరాజయానికి కారణాలివే..!
