కరోనా.. పిల్లల బాల్యాన్ని దూరం చేసింది. ఆటపాటలు అటకెక్కాయి. వేసవి సరదాలు..సెలవుల్లో తాత-నానమ్మ, తాత-అమ్మమ్మలు చెప్పే అనుభవాల కబుర్లు మాయమయ్యాయి. గురువులు, స్నేహితులు, బంధువుల వంటి బంధాలకు బ్రేక్‌ పడింది. చదువులమ్మ ఒడిలో సహజంగా అలవడాల్సిన శారీరక, మానసిక వికాసం కనుమరుగైంది. ఈ పరిణామాలు తల్లిదండ్రులను కలవరపాటుకు గురిచేస్తున్నాయి.
కొవిడ్ సమయంలో చిన్నారుల ప్రవర్తనలో మార్పులు
By
Published : Jun 20, 2021, 8:20 AM IST
కొవిడ్ సమయంలో నాలుగు గోడలకే పరిమితమైన చిన్నారులు మానసికంగా నలిగిపోతున్నారు. ఆడిపాడాల్సిన వయసులో ఇంటికే పరిమితం కావడంతో ప్రవర్తన లోపాలు మరింత ఆందోళనకు కారణమవుతున్నాయి. మారిన దినచర్యతో పసితనంలోనే బద్దకం, తిండి, నిద్రవేళల్లో మార్పులు వచ్చాయి. మిత్రులను కలిసే అవకాశం దూరమవటంతో స్మార్ట్‌ఫోన్లు కాలక్షేపంగా మారాయి. సున్నితమైన సమస్యలను బయటకు పంచుకోలేక.. పరిష్కారం కనిపించక మహానగరంలో వేలాది మంది తల్లిదండ్రులు మనోవేదనకు గురవుతున్నారు. సలహాలకు కొందరు మానసిక కౌన్సెలింగ్‌ నిపుణుల వద్దకు వెళుతున్నారు.
ఎన్నో సందేహాలు.. మరెన్నో ఆవేదనలు
కౌన్సెలింగ్‌ సైకాలజిస్టు గీతా
ఆన్‌లైన్‌ ద్వారా కౌన్సెలింగ్‌ సైకాలజిస్టు గీతా చల్లా నిర్వహించిన సమావేశంలో దాదాపు 80-90 శాతం మంది తల్లిదండ్రులు పిల్లల మానసిక ఎదుగుదల, ఊబకాయం, సెల్‌ఫోన్ల ప్రభావం, ఒంటరితనం, బద్దకం తదితరమైనవి ప్రధాన సమస్యలని వెల్లడించారు. మరికొందరు స్వేచ్ఛగా ఎదగాల్సిన చిన్నారులు నాలుగు గోడల మధ్య బందీగా ఉండటంపై ఆవేదన వెలిబుచ్చారు. కొందరు కన్నవారు వెలిబుచ్చిన కొన్ని సందేహాలు. కౌన్సెలింగ్‌ సైకాలజిస్టు గీతా చల్లా ఇచ్చిన పరిష్కారాలు ఇలా ఉన్నాయి.
ఆన్‌లైన్‌ తరగతులు ఎలా వినాలి
నాలుగేళ్ల బాబు. ఆన్‌లైన్‌ తరగతులు ఎలా వినాలో తెలియట్లేదు. స్మార్ట్‌ఫోన్‌ ద్వారా ఉపాధ్యాయులకు చేరువ కాలేకపోతున్నాడు. చూసి నేర్చుకోవటం కష్టంగా మారుతోంది. పాఠం పూర్తయ్యేంత వరకూ పక్కనే ఉండాల్సి వస్తుంది. చిన్నపిల్లలకు ఆన్‌లైన్‌ క్లాసులు ఎలా అలవాటు చేయాలి? పిల్లలు కోల్పోతున్న బాల్యాన్ని ఎలా అందించాలి?
- రాధిక, నిజాంపేట
పసిపిల్లలున్న కుటుంబాల్లో తల్లే గురువుగా మారాలి. రేపటి కోసం ఈ రోజే ప్రణాళిక తయారుచేసుకోవాలి. చిన్నారుల మనస్తత్వం, విద్యకు సంబంధించి అందుబాటులో ఉన్న కోర్సులు చేయాలి. ఇంట్లోనే వారి కోసం కొంత స్థలం కేటాయించాలి. అది కేవలం మీ కోసమే అనే భావన పిల్లల్లో కలిగించాలి. సౌకర్యంగా ఉండేలా చూసుకోవాలి. ఆన్‌లైన్‌ తరగతులు పూర్తయ్యాక ఖాళీ సమయాన్ని మరికొన్ని యాక్టివిటీస్‌ కోసం కేటాయించాలి. స్నేహితులు, బంధువులతో వీడియోకాల్స్‌ మాట్లాడించాలి. జట్టుగా కలిసి చేసే పనులను అప్పగించాలి. అప్పుడు ఒంటరి అనే భావన వారిలో కనిపించదు.
ఇద్దరు పిల్లలు. వారి దినచర్య తారుమారైంది. ఎప్పుడు నిద్రపోతున్నారు? ఎప్పుడు తింటున్నారనే దానికి సమయపాలన లేకుండా ఉంది. కొవిడ్ మూడో దశ పిల్లలపై ప్రభావం చూపుతుందనే వార్తలు ఆందోళన కలిగిస్తున్నాయి. దీంతో వాళ్లను మరింత క్రమశిక్షణగా ఉంచుతున్నాం? గడప దాటకుండా చేస్తున్నాం? వీళ్లను కట్టడి చేయటం, రోగ నిరోధక శక్తిని పెంచటం ఎలానో తెలియడం లేదు?
- రేవతి, బంజారాహిల్స్‌
ఎదిగే పిల్లలకు విద్య, జీవన నైపుణ్యాలు చాలా అవసరం. శారీరక శ్రమ దూరమైతే ఊబకాయం వస్తుంది. ప్రస్తుతం సమస్యలకు ఇంట్లోనే పరిష్కారం చూపాలి. వ్యాయామం కోసం ఎగరటం, గెంతటం, కూర్చుని లేవటం, సంగీతం వింటూ నృత్యం చేయటం, యోగాసనాలు సాధన చేయించొచ్చు. తక్కువ కేలరీలు, ఎక్కువ పోషకాలున్న ఆహారం ఇవ్వాలి. జంక్‌ఫుడ్‌కు దూరంగా ఉంచాలి. పండ్లు, ఇంట్లో వండిన పదార్థాలు పిల్లల్లో వ్యాధి నిరోధకతను పెంచుతాయి. వంటింట్లో లభించే వాటితో తయారు చేసిన సంప్రదాయ ఆహారాన్ని అలవాటు చేయాలి. రోజూ నిర్దిష్టమైన సమయంలో నిద్రలేవటం/నిద్రపోవటం, ఆహారం, చదువు, ఆటపాటలు, టీవీ చూడటాన్ని అలవాటుగా మార్చాలి.
బాబు వయసు 8 ఏళ్లు. 18 నెలలుగా ఇంట్లోనే ఉంటున్నాడు. కొత్తవారు ఇంటికి వస్తే సిగ్గు పడుతున్నాడు. ఒక్కడే ఉండేందుకు ఆసక్తి చూపుతున్నాడు. స్వతహాగా గ్రహించాల్సిన విషయాలకు దూరమవుతున్నాడు. సమయానికి విలువ లేకుండా పోయింది. బరువు కూడా పెరిగాడు. దీని నుంచి బయటపడేయటం సవాల్‌గా మారింది?
- అనూరాధ, గచ్చిబౌలి
పిల్లల వయసును బట్టి తల్లిదండ్రులు మెలగాలి. పసిపిల్లలు కన్నవారిని.. చుట్టూ ఉండే సమాజాన్ని గమనిస్తూ, అనుకరిస్తూ ఎదుగుతారు. కరోనా లాక్‌డౌన్‌తో బందీ అయ్యామనే భావనకు వచ్చారు. ఇటువంటి క్లిష్ట సమయంలో కన్నవారు ఓపికగా వ్యవహరించాలి. నాణ్యమైన సమయం కేటాయించాలి. ఇంట్లోనే వ్యాయామం చేయించాలి. ఫోన్‌ ద్వారా స్నేహితులు, బంధువులతో మాట్లాడిస్తూ బిడియం నుంచి బయట పడేయవచ్చు.
ఇంట్లోనే ఉండటం వల్ల మా పిల్లల్లో సంఘ వ్యతిరేక ఆలోచనలు పెరుగుతున్నాయి. మానవ సంబంధాలకు దూరమవుతున్నారు. వారిలో పెరిగిన కోపం, ఆందోళన భయపెడుతున్నాయి. సెల్‌ఫోన్లకు బానిసలయ్యారు. దుర్వినియోగం చేస్తున్నారు?
-చంద్రమోహన్‌
ఎదిగే పిల్లల విషయంలో కాస్త జాగ్రత్తగా ఉండాలి. కొన్నిసార్లు చూసీచూడనట్టుగా వదిలేయాలి. తల్లిదండ్రులతో పంచుకుంటే సమస్యకు పరిష్కారం దొరుకుతుందనే నమ్మకం వారిలో కలిగించాలి. వారు ఏదో ఒక వ్యాపకంలో నిమగ్నమయ్యేలా చూడాలి. ఖాళీగా ఉంటే పనికిరాని ఆలోచనలు వస్తాయి. చిత్రలేఖనం, సంగీతం, నృత్యం, బొమ్మల తయారీ వంటి అభిరుచులు, నైపుణ్యాలు.. సృజనాత్మకతను పెంపొందిస్తాయి. స్నేహితులతో కలసి జట్టుగా చేసే యాక్టివిటీస్‌ ద్వారా మానవ సంబంధాలు మెరుగుపరచవచ్చు.
పిల్లల్లో అన్ని రకాల అభివృద్ధి ఆగిపోయింది. సమాజంతో కలసిపోవటం తగ్గింది. ఎమోషనల్‌గా ఎదగలేకపోతున్నారు. తెలియని నిర్లక్ష్యం, బద్దకం కనిపిస్తుంది. గతంలో ఉన్నంత ఉత్సాహం కనిపించడం లేదు. ఏదైనా సాధించాలనే తపన దూరమవుతోంది? ఆన్‌లైన్‌ పాఠాలపై శ్రద్ధ చూపలేకపోతున్నారు?
- శైలజ, కొండాపూర్‌
యుక్త వయసుకు చేరుతున్న పిల్లల పట్ల స్నేహితులుగా మెలగాలి. స్వేచ్ఛనిస్తూనే వారి కదలికలపై కన్నేయాలి. అంతమాత్రాన వారి తప్పొప్పులను గమనిస్తూ దొంగలను చూసినట్టు చూడటం తగదు. దీనివల్ల మరింత మొండిగా మారే అవకాశం ఉంది. కథల రూపంలో వాస్తవికతను తెలియజేస్తూ వారిలో మార్పు తీసుకురావచ్చు. మంచి చెడుల విచక్షణ, లాభనష్టాలు వివరించాలి. స్మార్ట్‌ఫోన్లు, ల్యాప్‌టాప్, కంప్యూటర్లు వాడే సమయంలో కొన్నిసార్లు చెడ్డవి కూడా చూస్తుంటారు. తల్లిదండ్రులకు సాంకేతిక పరిజ్ఞానంపై అవగాహన లేకపోవటం వల్ల తలెత్తే సమస్యలివి. మాకు రాదు.. తెలియదు అనే మాటలు పక్కనబెట్టి సాంకేతిక అంశాల గురించి తల్లిదండ్రులు కూడా పట్టు పెంచుకోవాలి.
కొవిడ్ సమయంలో నాలుగు గోడలకే పరిమితమైన చిన్నారులు మానసికంగా నలిగిపోతున్నారు. ఆడిపాడాల్సిన వయసులో ఇంటికే పరిమితం కావడంతో ప్రవర్తన లోపాలు మరింత ఆందోళనకు కారణమవుతున్నాయి. మారిన దినచర్యతో పసితనంలోనే బద్దకం, తిండి, నిద్రవేళల్లో మార్పులు వచ్చాయి. మిత్రులను కలిసే అవకాశం దూరమవటంతో స్మార్ట్‌ఫోన్లు కాలక్షేపంగా మారాయి. సున్నితమైన సమస్యలను బయటకు పంచుకోలేక.. పరిష్కారం కనిపించక మహానగరంలో వేలాది మంది తల్లిదండ్రులు మనోవేదనకు గురవుతున్నారు. సలహాలకు కొందరు మానసిక కౌన్సెలింగ్‌ నిపుణుల వద్దకు వెళుతున్నారు.
ఎన్నో సందేహాలు.. మరెన్నో ఆవేదనలు
కౌన్సెలింగ్‌ సైకాలజిస్టు గీతా
ఆన్‌లైన్‌ ద్వారా కౌన్సెలింగ్‌ సైకాలజిస్టు గీతా చల్లా నిర్వహించిన సమావేశంలో దాదాపు 80-90 శాతం మంది తల్లిదండ్రులు పిల్లల మానసిక ఎదుగుదల, ఊబకాయం, సెల్‌ఫోన్ల ప్రభావం, ఒంటరితనం, బద్దకం తదితరమైనవి ప్రధాన సమస్యలని వెల్లడించారు. మరికొందరు స్వేచ్ఛగా ఎదగాల్సిన చిన్నారులు నాలుగు గోడల మధ్య బందీగా ఉండటంపై ఆవేదన వెలిబుచ్చారు. కొందరు కన్నవారు వెలిబుచ్చిన కొన్ని సందేహాలు. కౌన్సెలింగ్‌ సైకాలజిస్టు గీతా చల్లా ఇచ్చిన పరిష్కారాలు ఇలా ఉన్నాయి.
ఆన్‌లైన్‌ తరగతులు ఎలా వినాలి
నాలుగేళ్ల బాబు. ఆన్‌లైన్‌ తరగతులు ఎలా వినాలో తెలియట్లేదు. స్మార్ట్‌ఫోన్‌ ద్వారా ఉపాధ్యాయులకు చేరువ కాలేకపోతున్నాడు. చూసి నేర్చుకోవటం కష్టంగా మారుతోంది. పాఠం పూర్తయ్యేంత వరకూ పక్కనే ఉండాల్సి వస్తుంది. చిన్నపిల్లలకు ఆన్‌లైన్‌ క్లాసులు ఎలా అలవాటు చేయాలి? పిల్లలు కోల్పోతున్న బాల్యాన్ని ఎలా అందించాలి?
- రాధిక, నిజాంపేట
పసిపిల్లలున్న కుటుంబాల్లో తల్లే గురువుగా మారాలి. రేపటి కోసం ఈ రోజే ప్రణాళిక తయారుచేసుకోవాలి. చిన్నారుల మనస్తత్వం, విద్యకు సంబంధించి అందుబాటులో ఉన్న కోర్సులు చేయాలి. ఇంట్లోనే వారి కోసం కొంత స్థలం కేటాయించాలి. అది కేవలం మీ కోసమే అనే భావన పిల్లల్లో కలిగించాలి. సౌకర్యంగా ఉండేలా చూసుకోవాలి. ఆన్‌లైన్‌ తరగతులు పూర్తయ్యాక ఖాళీ సమయాన్ని మరికొన్ని యాక్టివిటీస్‌ కోసం కేటాయించాలి. స్నేహితులు, బంధువులతో వీడియోకాల్స్‌ మాట్లాడించాలి. జట్టుగా కలిసి చేసే పనులను అప్పగించాలి. అప్పుడు ఒంటరి అనే భావన వారిలో కనిపించదు.
ఇద్దరు పిల్లలు. వారి దినచర్య తారుమారైంది. ఎప్పుడు నిద్రపోతున్నారు? ఎప్పుడు తింటున్నారనే దానికి సమయపాలన లేకుండా ఉంది. కొవిడ్ మూడో దశ పిల్లలపై ప్రభావం చూపుతుందనే వార్తలు ఆందోళన కలిగిస్తున్నాయి. దీంతో వాళ్లను మరింత క్రమశిక్షణగా ఉంచుతున్నాం? గడప దాటకుండా చేస్తున్నాం? వీళ్లను కట్టడి చేయటం, రోగ నిరోధక శక్తిని పెంచటం ఎలానో తెలియడం లేదు?
- రేవతి, బంజారాహిల్స్‌
ఎదిగే పిల్లలకు విద్య, జీవన నైపుణ్యాలు చాలా అవసరం. శారీరక శ్రమ దూరమైతే ఊబకాయం వస్తుంది. ప్రస్తుతం సమస్యలకు ఇంట్లోనే పరిష్కారం చూపాలి. వ్యాయామం కోసం ఎగరటం, గెంతటం, కూర్చుని లేవటం, సంగీతం వింటూ నృత్యం చేయటం, యోగాసనాలు సాధన చేయించొచ్చు. తక్కువ కేలరీలు, ఎక్కువ పోషకాలున్న ఆహారం ఇవ్వాలి. జంక్‌ఫుడ్‌కు దూరంగా ఉంచాలి. పండ్లు, ఇంట్లో వండిన పదార్థాలు పిల్లల్లో వ్యాధి నిరోధకతను పెంచుతాయి. వంటింట్లో లభించే వాటితో తయారు చేసిన సంప్రదాయ ఆహారాన్ని అలవాటు చేయాలి. రోజూ నిర్దిష్టమైన సమయంలో నిద్రలేవటం/నిద్రపోవటం, ఆహారం, చదువు, ఆటపాటలు, టీవీ చూడటాన్ని అలవాటుగా మార్చాలి.
బాబు వయసు 8 ఏళ్లు. 18 నెలలుగా ఇంట్లోనే ఉంటున్నాడు. కొత్తవారు ఇంటికి వస్తే సిగ్గు పడుతున్నాడు. ఒక్కడే ఉండేందుకు ఆసక్తి చూపుతున్నాడు. స్వతహాగా గ్రహించాల్సిన విషయాలకు దూరమవుతున్నాడు. సమయానికి విలువ లేకుండా పోయింది. బరువు కూడా పెరిగాడు. దీని నుంచి బయటపడేయటం సవాల్‌గా మారింది?
- అనూరాధ, గచ్చిబౌలి
పిల్లల వయసును బట్టి తల్లిదండ్రులు మెలగాలి. పసిపిల్లలు కన్నవారిని.. చుట్టూ ఉండే సమాజాన్ని గమనిస్తూ, అనుకరిస్తూ ఎదుగుతారు. కరోనా లాక్‌డౌన్‌తో బందీ అయ్యామనే భావనకు వచ్చారు. ఇటువంటి క్లిష్ట సమయంలో కన్నవారు ఓపికగా వ్యవహరించాలి. నాణ్యమైన సమయం కేటాయించాలి. ఇంట్లోనే వ్యాయామం చేయించాలి. ఫోన్‌ ద్వారా స్నేహితులు, బంధువులతో మాట్లాడిస్తూ బిడియం నుంచి బయట పడేయవచ్చు.
ఇంట్లోనే ఉండటం వల్ల మా పిల్లల్లో సంఘ వ్యతిరేక ఆలోచనలు పెరుగుతున్నాయి. మానవ సంబంధాలకు దూరమవుతున్నారు. వారిలో పెరిగిన కోపం, ఆందోళన భయపెడుతున్నాయి. సెల్‌ఫోన్లకు బానిసలయ్యారు. దుర్వినియోగం చేస్తున్నారు?
-చంద్రమోహన్‌
ఎదిగే పిల్లల విషయంలో కాస్త జాగ్రత్తగా ఉండాలి. కొన్నిసార్లు చూసీచూడనట్టుగా వదిలేయాలి. తల్లిదండ్రులతో పంచుకుంటే సమస్యకు పరిష్కారం దొరుకుతుందనే నమ్మకం వారిలో కలిగించాలి. వారు ఏదో ఒక వ్యాపకంలో నిమగ్నమయ్యేలా చూడాలి. ఖాళీగా ఉంటే పనికిరాని ఆలోచనలు వస్తాయి. చిత్రలేఖనం, సంగీతం, నృత్యం, బొమ్మల తయారీ వంటి అభిరుచులు, నైపుణ్యాలు.. సృజనాత్మకతను పెంపొందిస్తాయి. స్నేహితులతో కలసి జట్టుగా చేసే యాక్టివిటీస్‌ ద్వారా మానవ సంబంధాలు మెరుగుపరచవచ్చు.
పిల్లల్లో అన్ని రకాల అభివృద్ధి ఆగిపోయింది. సమాజంతో కలసిపోవటం తగ్గింది. ఎమోషనల్‌గా ఎదగలేకపోతున్నారు. తెలియని నిర్లక్ష్యం, బద్దకం కనిపిస్తుంది. గతంలో ఉన్నంత ఉత్సాహం కనిపించడం లేదు. ఏదైనా సాధించాలనే తపన దూరమవుతోంది? ఆన్‌లైన్‌ పాఠాలపై శ్రద్ధ చూపలేకపోతున్నారు?
- శైలజ, కొండాపూర్‌
యుక్త వయసుకు చేరుతున్న పిల్లల పట్ల స్నేహితులుగా మెలగాలి. స్వేచ్ఛనిస్తూనే వారి కదలికలపై కన్నేయాలి. అంతమాత్రాన వారి తప్పొప్పులను గమనిస్తూ దొంగలను చూసినట్టు చూడటం తగదు. దీనివల్ల మరింత మొండిగా మారే అవకాశం ఉంది. కథల రూపంలో వాస్తవికతను తెలియజేస్తూ వారిలో మార్పు తీసుకురావచ్చు. మంచి చెడుల విచక్షణ, లాభనష్టాలు వివరించాలి. స్మార్ట్‌ఫోన్లు, ల్యాప్‌టాప్, కంప్యూటర్లు వాడే సమయంలో కొన్నిసార్లు చెడ్డవి కూడా చూస్తుంటారు. తల్లిదండ్రులకు సాంకేతిక పరిజ్ఞానంపై అవగాహన లేకపోవటం వల్ల తలెత్తే సమస్యలివి. మాకు రాదు.. తెలియదు అనే మాటలు పక్కనబెట్టి సాంకేతిక అంశాల గురించి తల్లిదండ్రులు కూడా పట్టు పెంచుకోవాలి.
