'కుటుంబ పార్టీలు రాష్ట్రానికి న్యాయం చేయలేవు'

కుటుంబ పార్టీలు తెలంగాణకు న్యాయం చేయలేవని, దేశాన్ని మరో మెట్టు ఎక్కించిన.. భాజపా ఎమ్మెల్సీ అభ్యర్థి రాంచంద్ర రావుకు ఓటు వేయాలని కేంద్ర మంత్రి, భాజపా నేత ప్రకాశ్​ జావడేకర్ కోరారు. సికింద్రాబాద్​లో పార్టీ నిర్వహించిన సదస్సులో ఆయన ముఖ్య అతిథిగా హాజరయ్యారు. రాంచంద్ర రావు కౌన్సిల్​లో ఏం మాట్లాడలేదు అంటున్నారని.. అందుకే ఆయన ప్రసంగాల పుస్తకం విడుదల చేస్తున్నట్లు ఆయన పేర్కొన్నారు.

భాజపా అభ్యర్థి రాంచంద్ర రావు ఎమ్మెల్సీగా మళ్లీ గెలిస్తే కౌన్సిల్​లో సమస్యగా ఉంటుందని సీఎం కేసీఆర్ భావిస్తున్నారని కేంద్ర మంత్రి, భాజపా నేత ప్రకాశ్​ జావడేకర్ అన్నారు. ఆత్మ నిర్భర్ భారత్ నిర్మాణంలో పట్టభద్రుల పాత్ర అనే అంశంపై.. సికింద్రాబాద్​లో భాజపా నిర్వహించిన సదస్సులో ఆయన ముఖ్య వక్తగా పాల్గొన్నారు. రాంచంద్ర రావు కౌన్సిల్ ప్రసంగాల పుస్తకాన్ని ఆయన విడుదల చేశారు.

100 శాతం బదిలీ

కుటుంబ పార్టీలు తెలంగాణకు న్యాయం చేయలేవని, దేశాన్ని మరో మెట్టు ఎక్కించిన కమలం అభ్యర్థికి ఓటు వేయాలని ఆయన కోరారు. దేశం మొత్తం భాజపాను ఇష్టపడుతున్నారని.. ఇటీవల గుజరాత్ స్థానిక సంస్థల ఎన్నికలు మరోసారి నిరూపించాయని కేంద్ర మంత్రి అన్నారు. రాజీవ్ గాంధీ కాలంలో వంద రూపాయలు పేదల కోసం కేటాయిస్తే.. కేవలం 15 రూపాయలు ప్రజలకు వెళ్లేవన్నారు. ఇప్పుడు ప్రత్యక్ష నగదు బదిలీ ద్వారా.. 100 శాతం పేదలకు చేరుతున్నాయన్నారు. బెంగాల్లో ఈ సారి గెలవబోతున్నామని ధీమా వ్యక్తం చేశారు. కాంగ్రెస్ కాలంలో మన దేశం చాలా ప్రాంతాలను కోల్పోయామని.. కానీ ఇప్పుడు మొదటి సారిగా ప్రత్యర్ధులు వెనక్కి వెళ్తున్నారని చెప్పారు.

ఇప్పుడు కూడా అంతే నిరుద్యోగులు

ఎమ్మెల్సీ ఎన్నికలు దగ్గరవుతున్న కొద్దీ అధికార పార్టీ.. అబద్ధపు ప్రచారాలకు శ్రీకారం చుట్టిందని భాజపా ఎమ్మెల్సీ అభ్యర్థి రాంచంద్ర రావు ఆరోపించారు. రాష్ట్ర ఏర్పాటు సమయంలో ఎంత మంది నిరుద్యోగులు ఉన్నారో.. ఇప్పుడు కూడా అంతే ఉన్నారని తెలిపారు. కేటీఆర్​ విడుదల చేసిన ఉద్యోగాల సంఖ్యలో.. పర్మినెంట్ చేసిన వారి సంఖ్య కూడా ఉందని వెల్లడించారు.

అందుకే పుస్తకం విడుదల

రాంచంద్ర రావు కౌన్సిల్​లో ఏం మాట్లాడలేదు అంటున్నారని.. అందుకే పుస్తకం విడుదల చేశానని పేర్కొన్నారు. 100 శాతం కౌన్సిల్ మీటింగ్​లకు హాజరైన.. ఒకే ఒక్క ఎమ్మెల్సీ తానేనని ఆయన చెప్పారు. ప్రభుత్వానికి వ్యతిరేకంగా ఎక్కువ నిమిషాలు మాట్లాడానని తెలిపారు. లాయర్లకు నిధులు విడుదలలో కీలక పాత్ర పోషించానని ఆయన వ్యాఖ్యనించారు. కరోనా, వరదల సమయంలో ప్రజల మధ్యే ఉన్నానని రాంచంద్ర రావు అన్నారు.

ప్రైవేటు రంగంలోనే..

ఆత్మనిర్భర్‌ భారత్‌ అంటే ప్రొటెక్షనిజం కాదని.. పోటీ పడే ధోరణి అని ఏపీ మాజీ ప్రభుత్వ ప్రధాన కార్యదర్శి ఐవీఆర్‌ కృష్ణారావు అన్నారు. కొందరు వైజాగ్‌ స్టీల్‌ ప్లాంట్‌ను ప్రభుత్వ రంగంలో ఉంచాలని.. డిమాండ్ చేస్తున్నారని..అందువల్ల అది మూతపడే అవకాశం ఉందన్నారు. ప్రైవేటు రంగంలోనే ఇంకా మంచి ప్రదర్శన కనపడుతుందన్నారు. ఈ కార్యక్రమంలో భాజపా నేతలు వివేక్, మోత్కుపల్లి నర్సింహులు, తదితరులు పాల్గొన్నారు.

ఇదీ చూడండి : గ్రేటర్‌ హైదరాబాద్‌ నేతలతో కేటీఆర్ భేటీ