తెలంగాణ సంస్కృతి సంప్రదాయాలకు ప్రతీకగా నిలిచే బతుకమ్మ సంబురాలు రాష్ట్రంలో మెుదలయ్యాయి. ఊరూ.. వాడా.. పల్లె.. పట్నం తేడా లేకుండా తీరొక్క పూలతో అందంగా బతుకమ్మను పేర్చి ఆడిపాడుతున్నారు. చిన్నారులు, యువతులు, మహిళలు ఒక్కచోట చేరి సందడి చేస్తున్నారు. సంవత్సరమంతా ఈ పండుగ కోసమే ఆడబిడ్డలు ఎదురుచూస్తారు. పుట్టింట్లో కొందరు.. అత్తారింట్లో మరికొందరు.. ఎవరి వీలును బట్టి వారు ఈ పండుగను సంతోషంగా జరుపుకుంటారు. కష్టం, సుఖం, భక్తి, భయం, ప్రేమ, బంధుత్వం, చరిత్ర, పురాణాలు కలగలిపి పాడే పాటలు.. ఈ పండుగ రోజుల్లో వీధి వీధినా మార్మోగుతాయి.
ప్రస్తుతం కరోనా వైరస్.. పండుగ సందడిని కాస్త తగ్గించింది. ప్రతి ఒక్కరూ కొవిడ్‌ నిబంధనలు పాటించాల్సి ఉంటుంది. మరి భారీగా జనం గుమికూడరాదన్న నియమాలతో.. జాగ్రత్తలు పాటిస్తూ బతుకమ్మ పండుగను జరుపుకుంటున్నారు. ఓ వైపు కరోనా, మరోవైపు వరదల వల్ల తొలిరోజు బతుకమ్మ సంబురాల సందడి కాస్త తగ్గింది. రాబోయే రోజుల్లో ఈ ఉత్సాహం పెరుగుతుందని భావిస్తున్నారు.
ఇదీ చదవండి: రాష్ట్ర ప్రజలకు బతుకమ్మ శుభాకాంక్షలు తెలియజేసిన గవర్నర్
