BJP Dharna On March 25 On TSPSC Paper Leakage: టీఎస్పీఎస్సీ ప్రశ్నాపత్రాల లీకేజీని నిరసిస్తూ మార్చి 25న ఎలాంటి కార్యక్రమాలు చేపట్టాలనే విషయంపై బీజేపీ రాష్ట్ర నాయకులతో రాష్ట్ర అధ్యక్షుడు బండి సంజయ్ చర్చించారు. అందుబాటులో ఉన్న పార్టీ నాయకులతో హైదరాబాద్లోని రాష్ట్ర పార్టీ కార్యాలయంలో సమావేశమయ్యారు. ఈ సందర్భంగా బండి సంజయ్ పార్టీ నేతలకు దిశా నిర్దేశం చేశారు. టీఎస్పీఎస్సీ పేపర్ లీకేజీలో ప్రశ్నిస్తున్న గొంతుకులను ప్రభుత్వం సిట్ ద్వారా నోటీసులు జారీ చేస్తూ నొక్కాలని చూస్తోందని చెప్పారు.
ఈ ప్రశ్నించే గొంతుకులను కాపాడుకోవాలని బీజేపీ నేతలకు బండి సంజయ్ వివరించారు. ప్రశ్నించే వారిపై, యూట్యూబ్ ఛానల్స్పై ప్రైవేటు వ్యక్తులతో దాడులు చేయించి ఈ ప్రభుత్వం భయానక వాతావరణాన్ని సృష్టిస్తోందని మండిపడ్డారు. అయితే ఈ పేపర్ లీకేజీ, మీడియాపై దాడులు, జర్నలిస్టుల అరెస్టుల అంశాలపై పార్టీ నేతలతో చర్చించి.. అందుకు అనుగుణంగా నడుచుకుంటామని తెలిపారు. తీన్మార్ మల్లన్న అరెస్టును ఖండిస్తూ.. తనకు బెయిల్ ఇప్పించేందుకు బీజేపీ లీగల్ సెల్ కృషి చేయాలని ఆదేశించారు. ఈ సమావేశంలో విజయశాంతి, వివేక్ ,ఏవీఎన్ రెడ్డి, రామచందర్ రావు, కొండా విశ్వేశ్వర్రెడ్డి, కాసం వెంకటేశ్వర్లు పాల్గొన్నారు.
తన ఇంటికి ఎటువంటి నోటీసులు అంటించలేదు: టీఎస్పీఎస్సీ పేపర్ లీకేజీలో విమర్శలు చేస్తున్న బండి సంజయ్కు సిట్ అధికారులు మంగళవారం నోటీసులు ఇచ్చారు. ఈ నెల 24న విచారణకు హాజరుకావాలన్నారు. నోటీసులు ఇచ్చే క్రమంలో ఇంటిలో ఎవరు లేకపోవడంతో తలుపుకు అంటించి వెళ్లిపోయారు. ఈ విషయంపై బండి సంజయ్ స్పందిస్తూ సిట్ అందించిన నోటీసులు తనకు అందలేదని పేర్కొన్నారు. ఏ ఇంటికి అధికారులు నోటీసులు అంటించారో.. తను ఇంటికి వెళ్లేసరికి చిరిగిపోయిన కాగితం ఉందని తెలిపారు. సిట్ అధికారులు నోటీసులు తనకు కాకుండా సీఎం కేసీఆర్.. ఐటీ మంత్రి కేటీఆర్కు ఇవ్వాలని సూచించారు. ఎందుకంటే పేపర్ లీకేజీలు సర్వసాధారణమని ఓ మంత్రి అనడం ఏంటని ప్రశ్నించారు.
నిరుద్యోగ మార్చ్ చేపడతాం: తీన్మార్ మల్లన్న, విఠల్, సతీష్ కమల్లను అరెస్టు చేయడం సిగ్గు చేటని సంజయ్ అన్నారు. ఏమీ లేని సీఎం కేసీఆర్కు రూ. వేల కోట్లు ఎక్కడి నుంచి వచ్చాయని ప్రశ్నించారు. రాష్ట్రంలో బీజేపీ అధికారంలోకి రాగానే జాబ్ క్యాలెండర్ ప్రకటిస్తామని హామీ ఇచ్చారు. మిలియన్ మార్చ్ స్ఫూర్తితో నిరుద్యోగ మార్చ్ కూడా చేపడతామని తెలిపారు. టీఎస్పీఎస్సీ పేపర్ లీకేజీ వ్యవహారంలో దోషులకు శిక్షపడేవరకు తమ పోరాటం సాగుతుందని బండి సంజయ్ స్పష్టం చేశారు.
ఇవీ చదవండి:
