సామాజిక న్యాయం ద్వారానే దేశాభివృద్ధి సాధ్యమని హిమాచల్ప్రదేశ్ గవర్నర్ బండారు దత్తాత్రేయ అన్నారు. బాల్యంలో తాను చదువుకోవటం వల్లే ఈ స్థాయికి ఎదిగానని ఆయన తెలిపారు. అట్టడుగు వర్గాల ప్రజలకు ప్రభుత్వ సంక్షేమ పథకాలు చేరేందుకు కృషి చేస్తానని చెప్పారు. రాష్ట్ర ప్రజలు కూడా వీలైనప్పుడు తప్పకుండా హిమాచల్ ప్రదేశ్ సందర్శించాలని కోరారు. హైదరాబాద్ రవీంద్రభారతిలో తెలంగాణ బీసీ సంక్షేమ సంఘం ఆధ్వర్యంలో దత్తాత్రేయకు పౌర సన్మాన సభ ఏర్పాటు చేశారు. కేంద్రమంత్రిగా ఉండి ప్రధాన మంత్రి దగ్గర బీసీ సమస్యల పరిష్కారం కోసం పోరాడిన గొప్పనేత దత్తాత్రేయ అని ఆర్.కృష్ణయ్య అన్నారు. గవర్నర్ హోదాలో ఉన్నప్పటికీ బీసీ సమస్యల పరిష్కారం కోసం కృషి చేయాలని విజ్ఞప్తి చేశారు. దత్తాత్రేయకు గవర్నర్ పదవి వచ్చిందంటే భాగ్యనగరం అంతా సంతోషించిందన్నారు ఆచార్య కోదండరాం. రాజకీయాల్లో శత్రువులులేని వ్యక్తి బండారు అని పేర్కొన్నారు.
సిద్ధాంతాలు వేరైనా...తమ లక్ష్యం సమాజ శ్రేయస్సే అని సీపీఐ రాష్ట్ర కార్యదర్శి చాడ వెంకట్ రెడ్డి తెలిపారు. ఆనాడు మహారాష్ట్ర గవర్నర్గా నియమించబడ్డ విద్యాసాగర్కు రాష్ట్ర ప్రభుత్వమే సన్మాన కార్యక్రమం నిర్వహించి...ఈరోజు దత్తాత్రేయను గౌరవించకపోవడం సరైన పద్ధతి కాదని ఆయన పేర్కొన్నారు. నీతి, నిజాయతీలకు నిలువుటద్దం గవర్నర్ దత్తాత్రేయ అని తెతెదేపా రాష్ట్ర అధ్యక్షుడు రమణ కొనియాడారు. కార్యక్రమంలో పలు రాజకీయ పార్టీల నేతలతోపాటు ప్రజా, కుల సంఘాల నాయకులు పాల్గొన్నారు.
ఇవీ చూడండి:ఫాలో అవడం అంటే మరీ ఇలా చేయాలా...!
