ఆ ఫ్లాట్లకు భారీగా దరఖాస్తులు.. ఈ నెల 27 నుంచి కేటాయింపులు

బండ్లగూడ, పోచారం రాజీవ్ స్వగృహ ఫ్లాట్లకు భారీగా దరఖాస్తులు వచ్చాయి. బండ్లగూడలోని ఫ్లాట్ల కోసం 33,161 మంది, పోచారంలోని రాజీవ్ స్వగృహ కోసం 5,921 మంది దరఖాస్తు చేసుకున్నారు. ఈ నెల 27 నుంచి లాటరీ పద్ధతిలో ఫ్లాట్లు కేటాయించనున్నారు.

హైదరాబాద్​ బండ్లగూడ, పోచారంలోని రాజీవ్ స్వగృహ ఫ్లాట్లను ఈ నెల 27 నుంచి లాటరీ ద్వారా కేటాయింపులు చేయనున్నారు. ఫ్లాట్ల కొనుగోలు కోసం భారీ సంఖ్యలో దరఖాస్తులు వచ్చాయి. బండ్లగూడలోని ఫ్లాట్ల కోసం 33,161 దరఖాస్తులు రాగా.. పోచారం ఫ్లాట్ల కోసం 5,921 దరఖాస్తులు వచ్చాయి. బండ్లగూడలోని 3 బీహెచ్​కే డీలక్స్ ఫ్లాట్ల కోసం 16,679 మంది దరఖాస్తు చేసుకున్నారు.

పూర్తి పారదర్శకంగా దరఖాస్తుదారుల సమక్షంలోనే లాటరీ ద్వారా ఫ్లాట్ల కేటాయింపు చేయాలని నిర్ణయించారు. ఈ నెల 27 నుంచి వచ్చే నెల 1 వరకు లాటరీ ప్రక్రియ కొనసాగుతుంది. మొదట బండ్లగూడ, ఆ తర్వాత పోచారం ఫ్లాట్లు కేటాయిస్తారు. దరఖాస్తుదారులకు టోకెన్ నంబర్లు ఇచ్చి లాటరీ తీస్తారు. మొత్తం లాటరీ ప్రక్రియను చిత్రీకరించి ప్రత్యక్ష ప్రసారం చేస్తారు. లాటరీ షెడ్యూల్, ఇతర పూర్తి వివరాలను రాజీవ్ స్వగృహ, హెచ్​ఎమ్​డీఏ వెబ్​సైట్​లో అందుబాటులో ఉంచుతారు. ఒక వ్యక్తికి ఒక ఫ్లాటును మాత్రమే కేటాయిస్తారు. ఆధార్ సంఖ్యను ఇందుకు ప్రాతిపదికగా తీసుకుంటారు.

ఇవీ చూడండి..