రాష్ట్ర రాజధానికి కొత్త తరహా మాదక ద్రవ్యాల అక్రమ రవాణా కొనసాగుతోంది. బెంగుళూరు, చెన్నై, ముంబై, దిల్లీ లాంటి మెట్రో నగరాల నుంచి పార్శిళ్ల ద్వారా కొత్త తరహా మాదక ద్రవ్యాలు దిగుమతి అవుతున్నట్లు ఆబ్కారీ శాఖ అధికారులు గుర్తించారు. విశాఖ ఏజెన్సీలో గంజాయి ఆకుల నుంచి తీసిన హసీస్ ఆయిల్ తెచ్చి.. అక్రమార్కులు విక్రయాలు సాగిస్తున్నట్లు ఆదివారం అమీర్పేటలో పట్టుబడిన మాదక ద్రవ్యాల సరఫరా ముఠా ద్వారా వెల్లడి కావడం వల్ల ఆబ్కారీ శాఖ అప్రమత్తమైంది.
నిందితులు ఈ ఆయిల్ను బోరబండ నివాసి ఆదిత్య వద్ద కొనుగోలు చేసినట్టు విచారణలో వెలుగులోకి వచ్చింది. ఔషధాల పేరిట ఈ ఆయిల్ను నగరానికి తెప్పించినట్లు అధికారుల విచారణలో తేలింది. పరారీలో ఉన్న ఆదిత్య వద్ద భారీగా హసీస్ ఆయిల్ ఉండొచ్చని ఆబ్కారీ శాఖ ఎన్‌ఫోర్స్‌మెంట్ విభాగం భావిస్తోంది.
హసీస్ ఆయిల్ దందాలో అధిక లాభాలున్నట్లు గుర్తించి.. నిందితులు ఈ ఆయిల్ సరఫరాపై దృష్టిసారించినట్లు అధికారుల విచారణలో వెల్లడైంది. విశాఖ ఏజెన్సీ నుంచి ఈ ఆయిల్ను తెప్పిస్తున్నట్లు తెలిసింది. అక్కడ లీటర్ రూ.50 వేల నుంచి రూ. 60 వేల వరకు వెచ్చించి కొనుగోలు చేసి.. హైదరాబాద్‌లో డిమాండ్ను బట్టి రూ.1 లక్ష నుంచి 1.5 లక్షల వరకు అమ్ముతారని వెల్లడైంది. ఈ ఆయిల్ను సిగిరెట్లకు పైపూత పూసి వాడొచ్చని.. లీటర్ ఆయిల్‌తో దాదాపు రూ. 3 లక్షల వరకు ఆర్జించవచ్చని తెలిసింది. గంజాయి కంటే అధికంగా మత్తు ఇచ్చే ఈ ఆయిల్ను ఎక్కువ మంది ఇష్టపడతారని తెలుసుకున్న అక్రమార్కులు.. ఈ దందాపై దృష్టి సారించారు.
పట్టుబడిన ముఠా సభ్యుల ఫోన్‌లలోని నంబర్లను, వాట్సాప్‌ సంక్షిప్త సమాచారాలను ఆబ్కారీ శాఖ ఎన్‌ఫోర్స్‌మెంట్ అధికారులు పరిశీలిస్తున్నారు. ఈ ముఠాకు ఎవరెవరితో సంబంధాలు ఉన్నాయి.. ఎప్పటి నుంచి ఈ అక్రమ మాదక ద్రవ్యాలను అమ్మి సొమ్ము చేసుకుంటున్నారు తదితర వివరాలను తెలుసుకునే పనిలో నిమగ్నమయ్యారు. ఈ ముగ్గురితో పాటు పరారీలో ఉన్న మరో ఆరుగురు నిందితుల కోసం ఆరా తీస్తున్నారు.
ఇదీచూడండి: బినామీ ఖాతా తీగలాగితే.. సైబర్‌ నేరగాళ్ల గుట్టురట్టు
