ఆలోచించే ప్రతి ఒక్కరూ గులాబీ పార్టీకే ఓటు వేస్తారు : చిట్​ చాట్​లో కేటీఆర్​

రాబోయే అసెంబ్లీ ఎన్నికల్లో అన్ని వర్గాల వారు బీఆర్​ఎస్​ వైపు ఉన్నారని కేటీఆర్ ధీమా వ్యక్తం చేశారు. రాష్ట్రంలో ప్రస్తుతం కాంగ్రెస్​ హవా నడుస్తోందన్నది కేవలం అపోహ మాత్రమే అన్నారు. యువతకు బీఆర్ఎస్​ పట్ల పూర్తి విశ్వాసం ఉందన్నారు. ఎన్నికల్లో విజయం సాధించిన వెంటనే ఉద్యోగాల భర్తీ, జాబ్​ క్యాలెండర్​పై దృష్టి సారిస్తామని తెలిపారు.

KTR Chit Chat In Telangana Election Campaign 2023 : రాబోయే తెలంగాణ అసెంబ్లీ ఎన్నికల్లో(Telangana Assembly Elections) యువత, మహిళలు, మైనార్టీలు సహా అన్ని వర్గాల వారు తమ వైపే ఉన్నారని కేటీఆర్​ తెలిపారు. ఎన్నికల్లో 80కి పైగా సీట్లతో బీఆర్​ఎస్ (BRS​)మళ్లీ అధికారాన్ని కైవసం చేసుకుంటుందని ఆ పార్టీ కార్యనిర్వాహక అధ్యక్షుడు, మంత్రి కేటీఆర్ విశ్వాసం వ్యక్తం చేశారు. పలు అంశాలపై మీడియా ప్రతినిధులతో కేటీఆర్ ఇష్టాగోష్టిగా మాట్లాడారు. కాంగ్రెస్ హవా అనేది ఉట్టి ప్రచారం మాత్రమే అన్న ఆయన.. అదంతా సామాజిక మాధ్యమాల్లో మాత్రమే సాధ్యం అని పేర్కొన్నారు. క్షేత్రస్థాయిలో బీఆర్​ఎస్​కు ప్రజల నుంచి పూర్తి మద్ధతు ఉందన్న కేటీఆర్.. ఆలోచించే ప్రతి ఒక్కరూ గులాబీ పార్టీకే ఓటు వేస్తారని ధీమా వ్యక్తం చేశారు.

KTR Fires On Revanth Reddy : ఆరెస్సెస్ మూలాలు ఉన్న పీసీసీ అధ్యక్షుడు రేవంత్ రెడ్డి(Revanth Reddy) బీజేపీ సిద్ధాంతాలను.. కాంగ్రెస్​లో అమలు చేస్తున్నారని కేటీఆర్ ఆరోపించారు. ప్రధాని మోదీ గురించి రేవంత్ ఒక్కరోజు కూడా ఎందుకు విమర్శలు చేయడం లేదని ప్రశ్నించారు. కాంగ్రెస్​, బీజేపీ రెండు ఒక్కటే అని కేటీఆర్​ తెలిపారు. యువతకు ఉద్యోగ, ఉపాధి కల్పనకు కట్టుబడి ఉన్నామన్న ఆయన.. ఇప్పటికే భారీగా ఉద్యోగ నియామకాలు చేపట్టామని, వెబ్ సైట్​లో అన్ని వివరాలు పొందుపరిచినట్లు వివరించారు. హామీలో ఇచ్చిన వాటి కంటే ఎక్కువ ఉద్యోగాలు భర్తీ చేశామని చెప్పారు. యువతకు తమ పట్ల విశ్వాసం ఉందని కేటీఆర్ తెలిపారు. ఎన్నికల ఫలితాలు రాగానే ఉద్యోగాల భర్తీ, జాబ్ క్యాలెండర్​పై దృష్టి సారిస్తామని అన్నారు.

EC Does Not Allow Raithu Bandu Payments : తొమ్మిదిన్నరేళ్లలో మైనార్టీలకు చాలా చేశామని, వారి మద్ధతు తమకే ఉంటుందని కేటీఆర్ ధీమా వ్యక్తం చేశారు. రైతుబంధు చెల్లింపులకు అనుమతించాలని ఈసీని ఇప్పటికే రెండు సార్లు కోరినట్లు తెలిపారు. రైతుబంధు చెల్లింపులకు వెంటనే అనుమతి ఇవ్వాలన్న ఆయన.. పీఎం కిసాన్ సమ్మాన్ నిధి(Pradhan Mantri Kisan Samman Nidhi) విడుదలకు లేని అడ్డంకి రైతుబంధుకు ఎందుకని ప్రశ్నించారు. ఈసీ అనుమతించకపోతే ఎన్నికల ఫలితాలు వచ్చిన వెంటనే రైతుబంధు చెల్లింపులు చేస్తామని కేటీఆర్ తెలిపారు.