టోక్యో ఒలింపిక్స్లో (Tokyo Olympics) రెండు వారాలుగా ఉత్కంఠభరిత క్రీడలను చూశాం. ఈ విశ్వక్రీడల వేదికగా ఎంతో మంది క్రీడాకారులు తమ ప్రతిభను నిరూపించుకొని పతకాలను సాధించగా.. మరికొంత మంది ఆటతో ప్రేక్షకుల మనసును గెలుచుకున్నారు. అయితే వీరితో చాలా తక్కువ మంది అథ్లెట్లు ఒలింపిక్స్లో పతకాలతో పాటు ప్రపంచ రికార్డులను తమ పేరుతో లిఖించుకున్నారు. పురుషుల 100 మీ. బటర్ఫ్లై స్విమ్మింగ్లో కాలేబ్ డ్రెస్సెల్ నుంచి.. మహిళల 400 మీ. హార్డిల్స్లో మెక్లాగ్లిన్ వరకు ఎంతోమంది క్రీడాకారులు ఈ వేదిక ద్వారా చరిత్రకెక్కారు. అలా టోక్యో ఒలింపిక్స్లో నమోదైన సరికొత్త ప్రపంచ రికార్డులు ఏవో తెలుసుకుందాం.
మహిళల ట్రాక్ సైక్లింగ్ టీమ్ ఈవెంట్లో జర్మనీ ప్రపంచ రికార్డు:
జర్మనీకి చెందిన మహిళల ట్రాక్ సైక్లింగ్ టీమ్.. టోక్యో ఒలింపిక్స్లో సరికొత్త రికార్డును నెలకొల్పింది. ఫ్రాంజిస్కా బ్రౌసే(Franziska Brausse), లీసా బ్రెన్నౌర్(Lisa Brennauer), లీసా క్లెయిన్(Lisa Klein), మైక్ క్రోజెర్(Mieke Kroeger).. కలిసి ఈ ఘనతను సాధించారు. ఈ ట్రాక్లో ఉన్న ప్రపంచ రికార్డును(4:06.166) రెండు సెకన్లు ముందుగా అంటే 4:04.242 సమయంలో ఈ రేసును పూర్తి చేసి స్వర్ణ పతకం సాధించారు. ఈ పోటీలో ఇప్పుడిదే రికార్డు!
పురుషుల సైక్లింగ్ పర్స్యూట్ ఫైనల్లో ఇటలీ టీమ్ సరికొత్త రికార్డు:
సైక్లింగ్ పర్స్యూట్ ఈవెంట్లో ఇటలీ పురుషుల జట్టు(Italian pursuit team) ప్రపంచ రికార్డును నెలకొల్పింది. 3:42.032 సమయంలో రేసును పూర్తి చేసి విజేతగా నిలిచింది. 61 ఏళ్లగా ఈ ఈవెంట్లో ఇటలీకి ఇదే తొలి స్వర్ణం.
200 మీ. బ్రెస్ట్ స్ట్రోక్ ఈవెంట్లో మహిళా స్విమ్మర్ రికార్డు:
దక్షిణాఫ్రికాకు చెందిన మహిళా స్విమ్మర్ తజన స్కోన్ మేకర్(Tatjana Schoenmaker).. ఒలింపిక్స్ 200 మీ. బ్రెస్ట్ స్ట్రోక్ ఈవెంట్లో ప్రపంచ రికార్డు నెలకొల్పింది. అంతకుముందు ఈ రికార్డు డెన్మార్క్కు చెందిన రిక్కే మోల్లెర్ పెడెర్సెన్(2:19.11) పేరిట ఉండగా.. ఇప్పుడా రికార్డు తజన స్కోన్ మేకర్(2:18.95) సొంతం చేసుకుంది.1996 తర్వాత దక్షిణాఫ్రికాకు స్వర్ణ పతకం సాధించిన తొలి స్విమ్మర్గా స్కోన్ ఘనత సాధించింది.
100 మీ. బటర్ఫ్లై ఈవెంట్లో అమెరికా స్విమ్మర్ వరల్డ్ రికార్డు:
భారీ అంచనాలతో టోక్యోలో అడుగుపెట్టిన అమెరికన్ స్విమ్మర్ డ్రెసెల్‌(Caeleb Dressel).. ఒలింపిక్స్లో సరికొత్త రికార్డును నమోదు చేశాడు. పురుషుల 100 మీ. బటర్ఫ్లై ఈవెంట్ ఫైనల్లో 49.45 సెకన్లలో రేసును పూర్తి చేసి.. ప్రపంచ రికార్డుతో స్వర్ణం గెలుచుకున్నాడు. 2019 ప్రపంచ ఛాంపియన్‌షిప్స్‌లో అతనే నెలకొల్పిన రికార్డును (49.50సె) ఇప్పుడు మెరుగుపర్చుకున్నాడు.
4x100 మీ. మెడ్లీ రిలే పోటీల్లో అమెరికా టీమ్ రికార్డు:
4x100 మీటర్ల మెడ్లే రిలే ఈవెంట్లో అమెరికా టీమ్ విజేతగా నిలిచింది. ఈ పోటీని ర్యాన్ మర్ఫీ(Ryan Murphy), మైకేల్ ఆండ్రూ(Michael Andrew), కెలెబ్ డ్రెస్సెల్(Caeleb Dressel), జాక్ యాపిల్(Zach Apple) బృందం కేవలం 3:26.78 సమయంలో పూర్తి చేసి ప్రపంచ రికార్డును నెలకొల్పి.. తమ దేశానికి బంగారు పతకాన్ని సాధించి పెట్టారు.
మహిళల స్పీడ్ క్లైంబింగ్లో అలెక్జాండ్రా మిరోస్లా ప్రపంచ రికార్డు:
పోలాండ్కు చెందిన అలెక్సాండ్రా మిరోస్లా(Aleksandra Mirosław).. టోక్యో ఒలింపిక్స్ వేదికగా మహిళల స్పీడ్ క్లైంబింగ్లో ప్రపంచ రికార్డును నెలకొల్పింది. 15 మీటర్ల ఎత్తును 6.84 సెకన్లలో స్పీడ్ క్లైంబ్ చేసి.. ఈ ఘనత సాధించింది. అంతకు ముందు ఈ రికార్డు రష్యాకు చెందిన ఇయులియా కల్పినా(6.96 సెకన్లు) పేరుతో ఉంది.
వెయిట్లిఫ్టింగ్లో జార్జియా క్రీడాకారుడు రికార్డు:
జార్జియాకు చెందిన లాషా తలఖడే (Lasha Talakhadze).. అంతకుముందు తన పేరుతో ఉన్న ప్రపంచ రికార్డును తానే అధిగమించాడు. వెయిట్లిఫ్టింగ్ ఈవెంట్లో మొత్తంగా 488 కేజీల బరువునెత్తాడు. స్నాచ్ రౌండ్లో 223 కేజీలు.. క్లీన్ అండ్ జెర్క్ రౌండ్లో 265 కేజీల బరువు ఎత్తి, రెండు విభాగాల్లోనూ వరల్డ్ రికార్డును నమోదు చేశాడు. వివిధ క్రీడల్లో బంగారు పతకాలను సాధించిన తొలి జార్జియా క్రీడాకారుడిగా లాషా తలఖడే నిలిచాడు.
4x100 మీ. ఫ్రీస్టైల్ ఈవెంట్లో ఆస్ట్రేలియా టీమ్ వరల్డ్ రికార్డు:
టోక్యో ఒలింపిక్స్ మహిళల 4x100 మీటర్ల రిలే స్విమ్మింగ్ పోటీల్లో ఆస్ట్రేలియా బృందం ప్రపంచ రికార్డును నెలకొల్పింది. ఎమ్మా మెక్కియాన్(Emma McKeon), మెగ్ హారిస్(Meg Harris), కేట్ కాంప్బెల్(Cate Campbell), బ్రోంటే కాంప్బెల్(Bronte Campbell).. ఈ పోటీని కేవలం 3:29.69 సమయంలో పూర్తి చేసి స్వర్ణ పతకం సాధించారు.
ట్రిపుల్ జంప్లో వెనిజువెలా అథ్లెట్ ప్రపంచ రికార్డు:
వెనిజువెలాకు చెందిన మహిళా అథ్లెట్ యులిమార్ రోజాస్(Yulimar Rojas).. ట్రిపుల్ జంప్లో ప్రపంచ రికార్డును నెలకొల్పింది. 15.67 మీటర్లు జంప్ చేసి ప్రపంచ రికార్డు నమోదు చేసింది. అంతకుముందు ఉక్రెయిన్కు చెందిన ఇనెస్సా క్రావెట్స్(15.50 మీటర్లు) పేరిట ఈ ఘనత ఉంది.
400 మీటర్ల హర్డిల్స్లో నార్వే అథ్లెట్ ప్రపంచ రికార్డు:
నార్వేకు చెందిన వార్హోమ్(Karsten Warholm) 400 మీ. హర్డిల్స్ విభాగంలో ప్రపంచ రికార్డును నమోదు చేశాడు. 45.94 సెకన్లలో లక్ష్యాన్ని చేరి సరికొత్త ఘనతను సృష్టించాడు. గతనెలలో కెవిన్ యంగ్ పేరిట ఉన్న 46.70 సెకన్ల రికార్డును 46 సెకన్లలో అధిగమించిన వార్హోమ్.. ఇప్పుడు తన రికార్డును ఒలింపిక్స్ వేదికగా తానే అధిగమించాడు.
టోక్యో ఒలింపిక్స్లో వ్యక్తిగత రికార్డులు..
ఎమ్మా మెక్కియాన్
ఒలింపిక్స్ చరిత్రలో ఒకేసారి ఏడు పతకాలు సాధించిన మహిళగా ఆస్ట్రేలియాకు చెందిన స్విమ్మర్ ఎమ్మా మెక్కియాన్ ఘనత సాధించింది. అంతకుముందు ఈస్ట్ జర్మన్ క్రిస్టిన్ ఓట్టో పేరిట ఉన్న ఆరు పతకాల రికార్డును కేలీ మెక్కియాన్ అధిగమించింది. 1952 నుంచి ఇప్పటివరకు జరిగిన విశ్వక్రీడల్లో ఇంతటి ఘనత సాధించిన ఏకైక మహిళగా చరిత్ర పుటలకెక్కింది. ఆమె సాధించిన పతకాల్లో నాలుగు స్వర్ణ, మూడు కాంస్య పతకాలున్నాయి.
బోల్ట్ వారసుడు
ప్రపంచమంతా ఎంతో ఆసక్తిగా ఎదురు చూసిన 100 మీటర్ల పరుగు పందెంలో ఎవరి ఊహకూ అందని రీతిలో ఇటలీకి చెందిన అథ్లెట్ లామోంట్‌ మార్సెల్‌ జాకబ్స్‌(Lamont Marcell Jacobs) విజయం సాధించాడు. ఒలింపిక్స్లో జరిగిన పోటీలో కేవలం 9.80 సెకన్లలో అతడు గమ్యాన్ని చేరుకున్నాడు.
వైఫల్యంతో ఒకే పతకం
రియోలో నాలుగు స్వర్ణాలు, ఓ కాంస్యం సాధించిన రికార్డును.. అమెరికా అగ్రశ్రేణి జిమ్నాస్ట్ సిమోన్ బైల్స్(Simone Biles) టోక్యో ఒలింపిక్స్లోనూ కొనసాగిస్తుందని అంతా అనుకున్నారు. ఈ విశ్వక్రీడల్లోని ఆరు ఈవెంట్లలో ఆమె బరిలో నిలిచింది. కానీ ఆమె అనూహ్యంగా మానసిక సమస్య 'ట్విస్టీస్‌' వల్ల వరుసగా ఈవెంట్స్ నుంచి తప్పుకుంది. కానీ, చివరిగా మహిళల బ్యాలన్స్ బీమ్ ఫైనల్ విభాగంలో కాంస్య పతకం గెలుపొందింది. 14.000 స్కోరు సాధించిన బైల్స్ బ్రాంజ్తో సరిపెట్టుకుంది.
టెన్నిస్ స్టార్స్ నిరాశ
ఈ ఏడాది 3 గ్రాండ్స్లామ్ టైటిళ్లు నెగ్గిన టెన్నిస్ స్టార్ జకోవిచ్(Novak Djokovic).. టోక్యో ఒలింపిక్స్లో కనీసం కాంస్య పతకం కూడా గెలుచుకోలేక పోయాడు. మరోవైపు ఫేవరేట్గా బరిలో దిగిన స్థానిక టెన్నిస్ స్టార్ నవోమి ఒసాకా(Naomi Osaka) కూడా నిరాశ పరిచింది.
ఇదీ చూడండి.. India at Olympics: ఫేవరేట్లుగా వెళ్లి.. ఉసూరుమనిపించారు!
