ఆదివారంతో వింబుల్డన్ టోర్నీ పూర్తయింది. తాజాగా క్రీడాకారులకు ర్యాంకింగ్స్ ప్రకటించింది టెన్నిస్ అసోసియేషన్(ఏటీపీ). ఈ ర్యాంకింగ్స్లో వింబుల్డన్ విజేత నొవాక్ జకోవిచ్(సెర్బియా) అగ్రస్థానాన్ని నిలబెట్టుకున్నాడు. వింబుల్డన్లో ఓడినప్పటికీ మహిళల విభాగంలో తన ర్యాంక్ను పదిలపరచుకుంది ఆష్లీ బార్టీ(ఆస్ట్రేలియా).
పురుషుల విభాగంలో అగ్రస్థానంలో ఉన్న జకో 12,415 పాయింట్లతో కొనసాగుతున్నాడు. తర్వాత రఫెల్ నాదల్(స్పెయిన్) 7,945 పాయింట్లతో రెండో స్థానంలో ఉన్నాడు. స్విస్ దిగ్గజం ఫెదరర్ మూడో స్థానంలో నిలిచాడు. వింబుల్డన్ సెమీస్లో జకో చేతిలో కంగుతిన్న రాబర్టో బటిస్టా(స్పెయిన్) 9 స్థానాలు ఎగబాకి 13వ ర్యాంకులో నిలిచాడు.
టాప్ - 5లో నిలిచిన ఆటగాళ్లు..
- నొవాక్ జకోవిచ్(సెర్బియా) - 12,415 పాయింట్లు
- రఫెల్ నాదల్(స్పెయిన్)- 7,945 పాయింట్లు
- రోజర్ ఫెదరర్(స్విట్జర్లాండ్) - 7,460 పాయింట్లు
- డొమినిక్ థీమ్(ఆస్ట్రియా) - 4,595 పాయింట్లు
- అలెగ్జాండర్ జ్వెరేవ్(జర్మనీ) - 4,325 పాయింట్లు
మహిళల విభాగంలో ఆష్లే బార్టీ 6,605 పాయింట్లతో అగ్రస్థానంలో నిలిచింది. నొవామీ ఒసాకా(జపాన్) రెండో స్థానంలో ఉంది. వింబుల్డన్ ఫైనల్లో సెరెనాను ఓడించిన సిమోనా హలెప్ నాలుగో స్థానానికి చేరింది. సెరెనా ఒక్క స్థానం మెరుగుపర్చుకొని 9వ ర్యాంకులో నిలిచింది.
టాప్ - 5లో నిలిచిన క్రీడాకారిణిలు..
- ఆష్లే బార్టీ( ఆస్ట్రేలియా) - 6,605 పాయింట్లు
- నొవామి ఒసాకా(జపాన్) - 6,257 పాయింట్లు
- కరోలినా ప్లిస్కోవా(చెక్ రిపబ్లిక్) - 6,055 పాయింట్లు
- సిమోనా హలెప్ (రొమేనియా) - 5,933 పాయింట్లు
- కికి బెర్టెన్స్(నెదర్లాండ్స్) - 5,130 పాయింట్లు
ఇది చదవండి: WC19: ఐసీసీ ప్రపంచకప్ జట్టు ఇదే...!
