టోక్యో ఒలింపిక్స్పై కీలక వ్యాఖ్యలు చేశారు కేంద్ర క్రీడా శాఖ మంత్రి కిరణ్ రిజిజు. ఈ ఏడాది ప్రకటించిన తేదీల ప్రకారమే ఒలింపిక్స్ను నిర్వహిస్తారని స్పష్టం చేశారు. ఆ ఆటలపై వస్తున్న వదంతులను నమ్మవద్దని ప్రజలను కోరారు మంత్రి. అంతర్జాతీయ మహిళా దినోత్సవం సందర్భంగా.. యువజన వ్యవహారాల కార్యదర్శి ఉషా శర్మ ఆధ్వర్యంలో ఏర్పాటు చేసిన వాకథాన్లో రిజిజు పాల్గొన్నారు.
గతేడాది టోక్యో వేదికగా జరగాల్సిన ఒలింపిక్స్ను కరోనా కారణంగా వాయిదా వేశారు. ఈ ఏడాది జులై 23 నుంచి ఆగష్టు 8 వరకు ఈ క్రీడలను నిర్వహించనున్నారు.
ఒలింపిక్స్ గురించి ఏమైనా వదంతులు ఉంటే వాటిని నమ్మొద్దు.. ఈ మెగా ఈవెంట్ ఖరారు అయిపోయింది. ముందుగా నిర్ణయించిన విధివిధానాల ప్రకారం ఆ క్రీడలు జరుగుతాయి. త్వరలోనే తేదీల ప్రకటన వస్తుంది.
-కిరణ్ రిజిజు, కేంద్ర యువజన వ్యవహారాలు, క్రీడా శాఖ మంత్రి.
అంతర్జాతీయ మహిళా దినోత్సవం సందర్బంగా దిల్లీలోని జవహర్ లాల్ నెహ్రూ స్టేడియంలో ఏర్పాటు చేసిన వాకథాన్లో రిజిజు పాల్గొన్నారు. యువజన వ్యవహారాల కార్యదర్శి ఉషా శర్మ.. ఈ వాకథాన్కు నాయకత్వం వహించారు. పెద్ద ఎత్తున మహిళలు, వలంటీర్లు ఈ కార్యక్రమానికి వచ్చారని తెలిపారు. మహిళలు తలచుకుంటే ఏదైనా చేయగలరని ఈ కార్యక్రమం ద్వారా చాటి చెప్పామని మంత్రి పేర్కొన్నారు.
అంతర్జాతీయంగా ఏ ఈవెంట్ తీసుకున్నా.. వాటిల్లో మహిళలు ఉంటున్నారు. మెరుగైన ప్రదర్శన చేస్తున్నారు. మహిళకు సమాన వేదికను కల్పిస్తున్నాం. వారు గొప్పగా రాణించాలన్నదే మా అభిమతం.
-కిరణ్ రిజిజు, కేంద్ర యువజన వ్యవహారాలు, క్రీడా శాఖ మంత్రి.
ఒలింపిక్స్కు వెళ్లేముందు అథ్లెట్లకు కరోనా టీకా ఇస్తామని రిజిజు తెలిపారు. వారి సంక్షేమమే మా ధ్యేయమని చెప్పారు. ప్రతి ఆటగాడికి వీలైనంత త్వరగా టీకా పంపిణీ ప్రారంభిస్తామని పేర్కొన్నారు.
ఇదీ చదవండి: 'బయో బుడగ వల్ల ఆటే కాదు బంధమూ బలపడింది'
