90 మీటర్ల జావెలిన్ త్రో మార్క్ను ఎప్పుడు సాధిస్తారు అనే ప్రశ్నకు ఈ ఏడాదే సమాధానం చెబుతానని ఆశాభావం వ్యక్తం చేశాడు ఒలింపిక్ జావెలిన్ త్రో ఛాంపియన్ నీరజ్ చోప్రా. ఒలింపిక్లో స్వర్ణం గెలుచుకున్న నీరజ్.. గట్టి పోటీ ఉండే ప్రపంచ ఛాంపియన్షిప్లో రజతాన్ని ముద్దాడాడు. అంతేగాక గతేడాది స్వీడన్లో జరిగిన డైమండ్ లీగ్ టైటిల్నూ కైవసం చేసుకున్నాడు నీరజ్. కెరీర్లో ఎన్నో మైలు రాళ్లను చేరుకున్న నీరజ్ను ఎప్పుడు వెంటాడే ప్రశ్న.. 'నీరజ్ ఎప్పుడు 90 మీటర్ల త్రోను విసురుతాడు'..? అయితే తాజాగా దీనికి బదులిచ్చాడు నీరజ్ చోప్రా. ఈ ఏడాదే ఈ ప్రశ్నకు ముగింపు పలుకుతానని స్పష్టం చేశాడు. ఇటీవల జరిగిన ఐసీసీ మహిళల అండర్-19 టీ20 ప్రపంచకప్‌ గెలిచిన భారత క్రికెట్ జట్టుతో ముచ్చటించిన నీరజ్ చోప్రా.. ఈ విషయంపై మాట్లాడాడు.
"ఈ సంవత్సరమే నేను 90 మీటర్ల మార్క్ను అధిగమిస్తాను. దీనిని మీరు ఎప్పుడు ఛేదిస్తారని నన్ను చాలా మంది చాలా సార్లు నన్ను అడిగారు. అయితే ఈ ఏడాదే ఆ ప్రశ్నకు సమాధానం చెబుతానని అనుకుంటున్నాను."
--నీరజ్ చోప్రా, ఒలింపిక్ జావెలిన్ ఛాంపియన్
ఇదే అత్యుత్తమం..
గతేడాది జూన్‌లో స్వీడన్‌లోని స్టాక్‌హోమ్‌లో జరిగిన డైమండ్ లీగ్‌లో అత్యధిక దూరం విసిరాడు నీరజ్ చోప్రా. 89.94 మీటర్లు విసిరిన ఈ త్రోను కెరీర్లోనే అత్యుత్తమమైనదిగా చెప్పవచ్చు.
2022లో బర్మింగ్‌హామ్‌లో జరిగిన కామన్వెల్త్ గేమ్స్లో ఆడలేకపోయాడు ఈ స్టార్ ఇండియన్ జావెలిన్ త్రోయర్‌. అయితే ఈ ఏడాది సెప్టెంబర్లో చైనాలోని హాంగ్‌జౌలో జరగబోయే ఆసియా గేమ్స్లో అతడి ఆటని చూడటానికి అభిమానులు ఎంతో ఆసక్తిగా ఎదురుచూస్తున్నారు. ప్రస్తుతం దీనికి సంబంధించే నీరజ్ చోప్రా దక్షిణాఫ్రికాలో కఠోర శ్రమ చేస్తున్నాడు. దీంతో అతడిపై అంచనాలను భారీగానే పెట్టుకున్నారు ఫ్యాన్స్.
