టోక్యో ఒలింపిక్స్లో పాల్గొంటున్న తమ రాష్ట్ర అథ్లెట్లకు బంపర్ ఆఫర్ ప్రకటించింది హరియాణా ప్రభుత్వం. రానున్న ఒలింపిక్స్లో బంగారు పతకం సాధిస్తే.. రూ.6 కోట్లను నజరానాగా ఇవ్వనున్నట్లు తెలిపింది. దీంతో పాటు ప్రభుత్వ ఉద్యోగం కూడా ఇవ్వనున్నట్లు పేర్కొంది.
సిల్వర్ మెడల్ గెలిచిన వారికి రూ.4 కోట్లు, కాంస్య పతక విజేతలకు రూ.2.5 కోట్లు ఇవ్వనున్నట్లు ప్రభుత్వం స్పష్టం చేసింది. ఒలింపిక్ డే సందర్భంగా పాల్గొన్న కార్యక్రమంలో రాష్ట్ర క్రీడా మంత్రి సందీప్ సింగ్ ఈ విషయాన్ని వెల్లడించారు. రానున్న టోక్యో ఒలింపిక్స్లో తమ రాష్ట్రం నుంచి 30 మంది ప్లేయర్లు పాల్గొంటున్నారని తెలిపారు. వీరి శిక్షణ కోసం ప్రభుత్వం ఒక్కొక్కరికీ రూ.5 లక్షల చొప్పున కేటాయించిందని పేర్కొన్నారు.
యువకులను ప్రోత్సహించడానికే..
టోక్యో మెగా ఈవెంట్లో మెడల్ విజేతలకు ప్రభుత్వ ఉద్యోగం ఇవ్వనున్నట్లు హరియాణా ముఖ్యమంత్రి మనోహర్ లాల్ ఖట్టర్ వెల్లడించారు. రాబోయే రోజుల్లో యువ క్రీడాకారులను ప్రోత్సాహించడానికే ఈ నిర్ణయం తీసుకున్నట్లు పేర్కొన్నారు. క్రీడలను ప్రోత్సహించడానికి ప్రభుత్వం ఒక విధానాన్ని రూపొందించినట్లు తెలిపారు. దీని కింద ప్రభుత్వ ఉద్యోగాలలో 3 శాతం రిజర్వేషన్ను కల్పించనున్నట్లు చెప్పారు. తద్వారా రాష్ట్రంలో క్రీడాభివృద్ధికి పాటుపడుతున్నామని సీఎం పేర్కొన్నారు.
ఇదీ చదవండి: 'తెలుగువారికి ఉపకారం చేయాలని ఉంది'
