వచ్చే ఏడాది జరగబోయే టోక్యో ఒలింపిక్స్లో బంగారు పతకాన్ని సాధించాలని తీవ్రంగా కృషి చేస్తున్నట్లు తెలిపాడు రెజ్లర్ భజరంగ్ పునియా. 2008 బీజింగ్లో జరిగిన విశ్వక్రీడల్లో భారత్కు తొలి వ్యక్తిగత స్వర్ణాన్ని అందించిన షూటర్ అభినవ్ బింద్రా విజయాన్ని తాను రిపీట్ చేస్తానని ఆశాభావం వ్యక్తం చేశాడు. ఈ విషయాన్ని 'ఈటీవీ-భారత్' ఎక్స్క్లూజివ్ ఇంటర్వ్యూలో వెల్లడించాడు.
ఒలింపిక్స్లో రెండో వ్యక్తిగత స్వర్ణ పతకాన్ని మీరు సాధిస్తారని యావత్తు భారతదేశం మీపై ఆశలు పెట్టుకుంది. మీరేమంటారు?
దేశ ప్రజలంతా నాపై నమ్మకం పెట్టుకోవడం పట్ల ఎంతో గర్వంగా ఉంది. వారి ఆశలను నీరుగార్చను. 2008లో భారత్ తరఫున అభినవ్ బింద్రా తొలి వ్యక్తిగత స్వర్ణం సాధించారు. అలానే నేను కూడా బంగారు పతకాన్ని సాధిస్తానని పూర్తి విశ్వాసం ఉంది.
లాక్డౌన్ నిబంధనలు మీరు పాటిస్తున్నారా?
లాక్డౌన్లో నేను ప్రభుత్వ నియమ నిబంధనలు పాటిస్తున్నా. రెజ్లింగ్ టోర్నీలు వాయిదా పడటం వల్ల ఇంటికే పరిమితమయ్యా. భౌతిక దూరం, మాస్క్ ధరించడం వంటి స్వీయ జాగ్రత్తలు తీసుకుంటున్నా.
ప్రస్తుత పరిస్థితుల్లో టోక్యో ఒలింపిక్స్ కోసం ఎలా సన్నద్ధమవుతున్నారు?
ఇంటివద్దనే ప్రాక్టీస్, కసరత్తులు చేస్తున్నా. నాలో ఉన్న లోపాలను సరిచేసుకుంటున్నా. కాకపోతే ప్రాక్టీస్ చేసేటప్పుడు ఓ భాగస్వామి ఉంటే బాగుండేది. క్యాంప్లో భాగస్వామితో కలిసి ప్రాక్టీస్ చేస్తుంటాను. కానీ ఇంటి వద్ద కుదరదుగా.
మీకు బాగా గుర్తుండిపోయిన సంఘటన ఏమిటి?
2013 ప్రపంచ ఛాంపియన్షిప్లో తొలిసారిగా పతకాన్ని సాధించినప్పుడు ఎంతో సంతోషించా. అప్పుడు నాకు 18 , 19ఏళ్లు ఉంటాయి.
మీ కెరీర్లో స్వల్ప తేడాతో ఓడిపోయిన మ్యాచ్ ఏమిటి?
2015 రెజ్లింగ్ ఛాంపియన్షిప్లో నా ప్రత్యర్థి చేతిలో 12 సెకన్ల తేడాతో ఓడిపోయా. ఆ సంఘటన నేను మర్చిపోను.
మీ తల్లిదండ్రుల గురించి చెప్పగలరా?
నా తల్లిదండ్రుల ప్రోత్సాహంతోనే ఇంత సాధించగలిగా. వారే నా తొలి గురువులు. మాది ఓ సాధారణ కుటుంబం. తండ్రి ఏ ఉద్యోగం చేయలేదు. ఆయనో రైతు. మా ఆర్థిక పరిస్థితి అంతంత మాత్రంగానే ఉండేది. కానీ నన్ను ఏ కొరత లేకుండా చూసుకునేవారు. నాకు కావాల్సిన ప్రతిదీ సమకూర్చేవారు.
ఒలింపిక్స్ వాయిదాపై మీ అభిప్రాయం ఏమిటి?
ఒలింపిక్స్ వాయిదా పడటం మంచిదే. నా బలహీనతలపై దృష్టి పెట్టా. ఒకవేళ షెడ్యూల్ ప్రకారం టోర్నీ నిర్వహించినా నేను సిద్ధంగానే ఉన్నా. అయినా ప్రస్తుత పరిస్థితుల్లో ఒలింపిక్స్ గురించి ఆలోచించడం కన్నా కరోనాను ఎలా అంతమొందించాలి? అనే దానిపై దృష్టి సారించాలి.
ఇది చూడండి : 'ఉత్తమ ఫ్రాంచైజీ అంటే చెన్నై సూపర్ కింగ్స్'
