గత నెలలో దిల్లీ వేదికగా షూటింగ్ ప్రపంచకప్ జరగాల్సింది. కానీ కరోనా ప్రభావం వల్ల మే నెలకు వాయిదా వేశారు. ప్రస్తుతం ఈ వైరస్ వ్యాప్తి తీవ్రమవుతున్న నేపథ్యంలో టోర్నీని పూర్తిగా రద్దు చేస్తున్నట్లు ప్రకటించింది అంతర్జాతీయ షూటింగ్ స్పోర్ట్స్ ఫెడరేషన్(ఐఎస్ఎస్ఎఫ్).
"కరోనా తీవ్రత వల్ల, న్యూదిల్లీ నిర్వహక కమిటీ ఒత్తిడి మేరకు రైఫిల్/పిస్టోల్, షాట్గన్ ప్రపంచకప్ను రద్దు చేస్తున్నాం. ఈ రెండు టోర్నీలు దిల్లీ వేదికగా జరగాల్సింది" -ఐఎస్ఎస్ఎఫ్ ప్రకటన
ఈ టోర్నీని తొలుత రెండు భాగాలుగా నిర్వహించాలని అనుకున్నారు. రైఫిల్/పిస్టోల్ పోటీల్ని మే 5-12 మధ్య, షాట్గన్ టోర్నీని జూన్ 2-9 మధ్య జరపాలని భావించారు. అయితే ప్రస్తుత పరిస్థితుల వల్ల ఐఎస్ఎస్ఎఫ్ రద్దుకే మొగ్గు చూపింది.
