మిక్స్డ్ మార్షల్ ఆర్ట్స్ (ఎమ్ఎమ్ఏ)లో భారత సంతతి ఆటగాడు అర్జాన్ భల్లార్ సంచలనం సృష్టించాడు. ఈ టోర్నీలో వరల్డ్ హెవీ వెయిట్ చాంపియన్‌గా నిలిచాడు. తద్వారా ఈ టైటిల్ నెగ్గిన తొలి భారత సంతతి వ్యక్తిగా చరిత్ర నెలకొల్పాడు.
ఫైనల్లో డిఫెండింగ్ ఛాంపియన్ బెండ్రన్ వెరాను మట్టికరిపించాడు అర్జాన్. సింగపూర్‌ ఇండోర్‌ స్టేడియంలో జరిగిన ఈ పోటీలో బౌట్ మొత్తం భల్లార్ అద్భుత ప్రదర్శన కనబర్చాడు. ఇతడు 2010 కామన్వెల్త్ పోటీల్లో కెనడా తరఫు స్వర్ణ పతకం సాధించి గుర్తింపు పొందాడు.
మహిళల విభాగంలో భారత స్టార్ రెజ్లర్ రీతూ ఫోగట్ పోరు ముగిసింది. ఆమె అమెరికాకు చెందిన బీ గుయెన్ చేతులో ఓటమిపాలైంది. ఎమ్ఎమ్ఏ కెరీర్లో ఫోగట్కు ఇదే తొలి ఓటమి కావడం గమనార్హం. ఓటమిని ఒప్పుకొంటూ.. తదుపరి బౌట్లో మళ్లీ పుంజుకుంటానని ఆశాభావం వ్యక్తం చేసింది రీతు.
