క్రికెట్ కంటే ఫుట్బాల్ మ్యాచ్లను ఎక్కువగా చూస్తానంటున్నాడు టీమ్ఇండియా వైస్ కెప్టెన్ రోహిత్శర్మ. ఫుట్బాల్ మ్యాచ్లు చూడడం తనకు అమితమైన ఆనందాన్నిస్తుందని వెల్లడించాడు. స్పానిష్ ఫుట్బాల్ లీగ్ 'లా లిగా'కు భారతదేశంలో ప్రచారకర్తగా వ్యవహరిస్తున్న రోహిత్.. ఆ సంస్థకు చెందిన అధికారిక ఖాతా ఫేస్బుక్ లైవ్ చాట్లో ఈ విషయాన్ని వెల్లడించాడు.
"నేను ఫుట్బాల్ను అనుసరిస్తా. క్రికెట్ కంటే ఎక్కువగా ఆ మ్యాచ్లు చూస్తుంటా. ఇంట్లో ఉన్నప్పుడు క్రికెట్ అసలు చూడను. ఫుట్బాల్ మ్యాచ్లను చూస్తుంటే కళ్లకెంతో ఆనందంగా ఉంటుంది. ఇది చాలా నైపుణ్యంతో కూడిన ఆట. అందుకే నేను దాన్ని అంతలా ఇష్టపడతా".
-రోహిత్ శర్మ, టీమ్ఇండియా వైస్ కెప్టెన్
ఫుట్బాల్లో మీరు ఏ స్థానంలో ఆడతారని రోహిత్ను ప్రశ్నించగా..."నేను ఫుట్బాల్ ఆటగాడ్ని అయితే బహుశా మిడ్ఫీల్డ్లో ఆడొచ్చు. ఎందుకంటే నేను ఎక్కువగా పరుగెత్తలేను. ఆ స్థానం నుంచి గోల్ చేయాలంటే ఉత్తమ నైపుణ్యం కలిగి ఉండాలి" అని తెలిపాడు. అలాగే భారతదేశంలో ఫుట్బాల్ అభిమానులు చాలా మంది ఉన్నారని.. వారు 'లా లిగా'ను చూస్తున్నారని ఈ ఫేస్బుక్ లైవ్లో వెల్లడించాడు.
మార్చిలో జరగాల్సిన లా లిగా లీగ్ కరోనా కారణంగా వాయిదా పడింది. ఫుట్బాల్ టోర్నీలను తిరిగి ప్రారంభించడానికి స్పానిష్ ప్రభుత్వం తాజాగా అనుమతించడం వల్ల జూన్ 8 నుంచి 'లా లిగా'ను నిర్వహించనున్నారు.
ఇదీ చూడండి... 'జురాసిక్ వరల్డ్'లో కోహ్లీ.. టీజర్ విడుదల!
