2020కి సంబంధించి భారత ఫస్ట్క్లాస్ క్రికెటర్లకు ప్రకటించిన పరిహారం ఇంకా అందించలేదు భారత క్రికెట్ నియంత్రణ బోర్డు(బీసీసీఐ). అందుకు సంబంధించిన ప్రణాళిక రాష్ట్రాల నుంచి రాకపోవడమే చెల్లింపులు ఆలస్యమవ్వడానికి కారణమని బీసీసీఐ కోశాధికారి అరుణ్ ధుమాల్ వెల్లడించారు.
"మేము రాష్ట్రాలతో చర్చించాల్సి ఉంది. ఎందుకంటే ఎవరెన్ని మ్యాచ్లు ఆడారు? ఎన్ని మ్యాచ్లు జరిగాయి? రిజర్వ్లో ఉన్న ఆటగాళ్ల సంఖ్య ఎంత? అనే విషయాల గురించి రాష్ట్రాలు సమాచారం పంపాల్సి ఉంది. కానీ, ఇంతవరకు ఏ ఒక్క రాష్ట్రం ఇందుకు సంబంధించి ప్రతిపాదనలు పంపలేదు. అందుకే చెల్లింపులు ఆలస్యమయ్యాయి" అని అరుణ్ ధుమాల్ స్పష్టం చేశారు.
కొవిడ్ కారణంగా గతేడాది జరగాల్సిన రంజీ ట్రోఫీ రద్దైంది. దీంతో ఫస్ట్ క్లాస్ ఆటగాళ్లకు పరిహార ప్యాకేజీ ప్రకటించింది బీసీసీఐ.
గతేడాది ఆసీస్లో జరిగిన మహిళల టీ20 ప్రపంచకప్కు సంబంధించి.. భారత క్రికెటర్లకు రావాల్సిన రన్నరప్ ప్రైజ్మనీ గురించి ఇటీవల వార్తలు వెలువడ్డాయి. త్వరలోనే ఆ ప్రైజ్మనీని వారి ఖాతాల్లోకి చేరవేస్తామని బోర్డు తెలిపింది. దీంతో ఈ విషయం బయటపడింది.
ఇదీ చదవండి: త్వరలోనే వారికి ప్రపంచకప్ ప్రైజ్మనీ
