సుదీర్ఘ ఫార్మాట్లో ప్రపంచకప్గా భావిస్తున్న ప్రపంచ టెస్ట్ ఛాంపియన్షిప్ ఫైనల్ మ్యాచ్ తొలి రోజు వర్షం కారణంగా తుడిచిపెట్టుకుపోయింది. కనీసం టాస్ కూడా పడకుండానే మ్యాచ్ను తర్వాతి రోజుకు వాయిదా వేస్తున్నట్లు ఫీల్డ్ అంపైర్లు ప్రకటించారు. ఒక రోజు ఆట పూర్తిగా వృథా కావడం వల్ల ఇప్పుడు అందరి కళ్లు రిజర్వ్ డే మీద పడింది. అయితే ఈ రిజర్వ్ డేను ఎలా వాడుతారు. దీని విషయంలో ఐసీసీ గతంలో విడుదల చేసిన మార్గదర్శకాలు ఎలా ఉన్నాయనేది ఓ సారి చూద్దాం.
వర్షం వల్ల మొదటి రోజు ఆటలో ఒక్క బంతి కూడా పడలేదు. అయితేనేం రిజర్వ్ డే ఉందిగా అని అభిమానులతో పాటు పలువురు అభిప్రాయపడుతుండొచ్చు. కానీ, వృథా అయిన మొత్తం రోజుకు రిజర్వ్ డేను కేటాయించరు. కేవలం ఫలితం వస్తుందనుకున్న సందర్భంలో లేదా రోజువారీగా ఎన్ని ఓవర్లు తక్కువగా వేశారో అంత మేరకు ఆట సాగడానికి ఈ అదనపు రోజును వాడుకోవాల్సి ఉంటుంది. అంటే ఈ అదనపు రోజు అనేది పూర్తి ఐదు రోజులకు సంబంధించింది. అది కూడా నిర్వాహకులు అవసరమని భావిస్తేనే అది అమల్లోకి వస్తుంది. లేదంటే మ్యాచ్ను డ్రా లేదా టైగా ప్రకటించే అవకాశం ఉంటుంది.
ఇందుకు సంబంధించిన మార్గదర్శకాలను 2018 జూన్లోనే విడుదల చేసింది ఐసీసీ. ఐదో రోజు ఆట ముగిసే సమయానికి.. మరి కొద్ది సమయం ఉంటే ఫలితం వస్తుందని భావించినప్పుడు ఈ రిజర్వ్ డేను ఉపయోగించుకుంటారు. అంటే కొన్ని ఓవర్ల మేర ఆరో రోజును వాడొచ్చేమో కానీ, మొత్తం ఓవర్లకు వాడడం కుదరదన్న మాట! అది కూడా ఐదో రోజు ఆట పరిస్థితులపై ఆధారపడి ఉంటుంది.
క్రీడాలోకం ఎంతో ఆత్రుతగా ఎదురుచూసిన డబ్ల్యూటీసీ ఫైనల్ మ్యాచ్ను నిర్వహించడానికి పలుమార్లు అంపైర్లు ప్రయత్నించారు. పిచ్పై కవర్లు తొలగించే సమయానికే మళ్లీ వర్షం రావడం వల్ల సమయం వృథా అయింది. ఏకధాటిగా కురిసిన వర్షం వల్ల ఔట్ ఫీల్డ్ చిత్తడిగా మారింది. దీంతో పలుమార్లు వికెట్ను పరిశీలించిన అంపైర్లు చివరికి ఆటను తర్వాతి రోజుకు వాయిదా వేశారు.
ఇదీ చదవండి: Sachin Tendulkar: 'నేను కొవిడ్ జయించడానికి వాళ్లే కారణం'
