ప్రస్తుత తరం క్రికెటర్లలో విరాట్ కోహ్లీ ఘనతల గురించి ప్రత్యేకంగా చెప్పాల్సిన పనిలేదు. పరుగుల్లో, సెంచరీల్లో ఎన్నో రికార్డులు తనపేరిట నమోదు చేశాడు. ప్రస్తుతం అంతర్జాతీయ కెరీర్లో 70 సెంచరీలతో ఉన్నాడు. ఈ విషయాన్నే గుర్తుచేస్తూ ఆసీస్ క్రికెటర్ డేవిడ్ వార్నర్ ఇన్స్టా స్టోరీస్లో పోస్ట్ పెట్టాడు. 'మేం కోహ్లీని అందుకోలేకపోతున్నాం అనేది నిజం' అని రాసుకొచ్చాడు.
ప్రస్తుతమున్న క్రికెటర్లలో ఎక్కువ సెంచరీలు చేసిన వారిలో కోహ్లీ తర్వాత వార్నర్(43) ఉన్నాడు. వీరిద్దరి మధ్య అంతరం 27 శతకాలు. కాబట్టి వార్నర్ చెప్పినట్లు ఇప్పట్లో కోహ్లీని చేరుకోవడం, అధిగమించడం గానీ అతడి సహచర ఆటగాళ్లకు చాలా కష్టం.
త్వరలో ఇంగ్లాండ్ పర్యటనకు వెళ్లనున్న కోహ్లీ ఆ జట్టుతో ఐదు టెస్టుల సిరీస్ ఆడనున్నాడు. అంతకంటే ముందు ప్రపంచ టెస్టు ఛాంపియన్షిప్ ఫైనల్లోనూ పాల్గొన్నాడు. దాదాపు రెండేళ్లుగా సెంచరీ చేయలేకపోతున్న విరాట్.. ఈ పర్యటనతో తన శతకాల సంఖ్యను పెంచుకునే అవకాశం కనిపిస్తోంది.
ఇది చదవండి: 'తర్వాతి మ్యాచ్లో కోహ్లీ సెంచరీ పక్కా'
