నాలుగో ఫ్రాంఛైజీకి ఆడుతున్నందుకు తనపై ఒత్తిడి ఉందని మాక్స్వెల్ అంటున్నాడు. జట్టులో తనకు ప్రత్యేక పాత్ర ఇచ్చారని తెలిపాడు. పరుగులు చేయడం తమకు ఇబ్బందైనప్పుడు ప్రత్యర్థికీ కష్టమేనని విరాట్ కోహ్లీ అభిప్రాయపడ్డాడు. వరుస ఓటములను జీర్ణించుకోలేక పోతున్నామని డేవిడ్ వార్నర్ పేర్కొన్నాడు. రాయల్ ఛాలెంజర్స్ బెంగళూరు నిర్దేశించిన 150 పరుగుల లక్ష్య ఛేదనకు దిగిన సన్‌రైజర్స్‌ హైదరాబాద్ 143/9కే పరిమితమైంది.
ఇక్కడా ఆసీస్ పాత్రే..!
(మాక్స్వెల్: 59; 41 బంతుల్లో 5×4, 3×6)
మా ఆరంభాలు చాలా బాగున్నాయి. ఇది నా కొత్త ఫ్రాంచైజీ. వారు నాకు ప్రత్యేక పాత్ర ఇచ్చారు. మన తర్వాత బ్యాటింగ్‌ చేసేవాళ్లుంటే స్వేచ్ఛగా ఆడగలుగుతాం. నా తర్వాత ఏబీ ఉండటంతో స్వేచ్ఛగా ఆడాను. ఆస్ట్రేలియా క్రికెట్‌ జట్టులోని పాత్రే ఇక్కడా పోషిస్తున్నాను. జట్టు యాజమాన్యం, సహాయ సిబ్బంది, ఆటగాళ్లు నాకు అండగా నిలిచారు. అనుభవంతో పరుగులు చేశాను. మొదటి బంతి నుంచే బాదుతూ చివరి వరకు తీసుకెళ్లడం నాకు అలవాటు లేని పని. ఇది నా నాలుగో ఐపీఎల్‌ జట్టు కాబట్టి ఒత్తిడి ఉంటుంది. నేను మరింత మెరుగ్గా ఆడేందుకు అదే కారణమవుతోంది. వాషింగ్టన్‌ సుందర్‌ మా జట్టులో సూపర్‌స్టార్‌. నేను బౌలింగ్‌ ఎక్కువగా చేయకపోతే బ్యాటుతో మరిన్ని పరుగులు చేయగలను.
వాళ్లకూ కష్టమేగా..
(విరాట్ కోహ్లీ: 33; 29 బంతుల్లో 4×4)
మేం అలసిపోలేదు. జట్టును చూసి గర్విస్తున్నా. వికెట్‌ సవాల్‌ విసిరింది. ముంబయి మ్యాచులోనూ ఇలాగే జరిగింది. ఇలాంటి పరిస్థితులు ఉన్నప్పుడు ఆఖరి వరకు పోరాడాలి. మాకు ఎక్కువ బౌలింగ్‌ వనరులు ఉన్నాయి. దాంతో మధ్య ఓవర్లలో ప్రభావం చూపించాం. 150 పరుగుల లక్ష్యం కాపాడుకోవచ్చన్న విశ్వాసం నాకుంది. ఇన్ని పరుగులు చేయడం మనకు కష్టమైనప్పుడు అవతలి వాళ్లకూ అంతే కదా. వికెట్లు పోతున్నప్పుడు ఒత్తిడిలో ఛేదన సవాలే. ఎందుకంటే మ్యాచు ఎటువైపైనా మొగ్గు చూపొచ్చు. పాత బంతిని ఎదుర్కోవడం కఠినంగా అనిపించింది. పవర్‌ప్లేలో కొన్ని బౌండరీలు బాది జోరు కొనసాగించాలని భావించా. మాక్సీ ఇన్నింగ్సే తేడా. మేం సాధిస్తున్న విజయాలకు పొంగిపోవడం లేదు. మా ప్రణాళికల్లో స్పష్టత ఉంది. ఒక్కో మ్యాచును లక్ష్యంగా చేసుకొని ముందుకు సాగుతున్నాం.
పిచ్ సహకారం
(షాబాజ్ అహ్మద్ 2-0-7-3)
హైదరాబాద్ ఇన్నింగ్స్‌లో 17వ ఓవర్‌ వేయడం కష్టంగా అనిపించింది. కెప్టెన్‌ నాపై నమ్మకంతో ఉండటం పట్ల సంతోషంగా ఉన్నాను. పిచ్ నుంచి నాకు సహకారం లభించింది. దానిని ఉపయోగించుకొని సన్‌రైజర్స్‌ను దెబ్బకొట్టాను. మరో ఓవర్‌ వేసేందుకూ సిద్ధంగానే ఉన్నా. కానీ సిరాజ్‌ అద్భుతంగా బౌలింగ్‌ చేశాడు. పరిస్థితులను బట్టి చూస్తే బెయిర్‌స్టో క్యాచ్‌ కీలకం. ఏదేమైనా నాకు మరో అవకాశం లభించినందుకు ఆనందంగా ఉంది.
నునుపుగా మారితే కష్టం
(హర్షల్‌ పటేల్‌ 4-0-25-2)
నా చేతులు చెమట పట్టాయి. నోబాల్స్‌ వేయడం మాత్రం తప్పే. ఇదో సాధారణ పొరపాటు. ఇలాంటివి మరోసారి పునరావృతం కాకుండా చూసుకుంటా. ఒత్తిడితో కూడిన ఓవర్లు వేయాల్సి ఉంటుందని నాకు నేనే తరుచూ చెప్పుకున్నాను. కెప్టెన్‌కు నాపై విశ్వాసం ఉండటం సంతోషకరం. బంతి గరకుగా ఉన్నప్పుడే పరుగులు చేయడం సులభం. ఒక్కసారి బంతి నునుపుగా మారిందా షాట్లు ఆడటం కష్టమైపోతుంది. ఇక్కడ అన్ని మ్యాచుల్లో ఇలాగే జరుగుతోంది. విజయంపై ఎప్పుడూ నమ్మకంతో ఉండటం అవసరం.
జీర్ణించుకోవడం ఇబ్బందే
(డేవిడ్ వార్నర్: 54; 37 బంతుల్లో 7×4, 1×6)
ఈ ఓటమిని జీర్ణించుకోవడం కష్టం. మా బౌలర్లు ప్రత్యర్థిని అద్భుతంగా నిలువరించారు. మాక్స్వెల్ మాత్రం చక్కగా బ్యాటింగ్‌ చేశాడు. చివర్లో నిలదొక్కుకున్న బ్యాట్స్‌మెన్‌ ఇద్దరు క్రీజులో ఉండాలని భావించాం. కానీ మేం అందులో విఫలమయ్యాం. భాగస్వామ్యాలు నిర్మించి చక్కని క్రికెట్‌ షాట్లు ఆడటం అవసరం. అయితే మేం క్రాస్‌ బ్యాటింగ్‌ షాట్లు ఆడాం. ఇక్కడ అలా ఆడకూడదు. వరుసగా రెండు మ్యాచుల్లో ఓడటం నిరాశపరిచింది. మున్ముందు మ్యాచుల్లో ఎలా ఆడాలో మాకు తెలుసు. ఇదే వేదికలో మాకు మరో మూడు మ్యాచులు ఉన్నాయి. పిచ్‌లు మెరుగవుతాయని భావిస్తున్నాం. పవర్‌ప్లే ఓవర్లలో తక్కువ నష్టం జరిగేలా బంతులు విసిరాలన్నది మా ప్రణాళిక. చెపాక్‌లో రెండోసారి బ్యాటింగ్‌ చేసిన జట్టే నాలుగు మ్యాచులు గెలవాల్సింది.
ఇదీ చదవండి: కుర్చీని తన్నేసిన కోహ్లీ- మందలించిన రిఫరీ
