Tilak Varma Asia Cup : తిలక్ వర్మ.. ఇప్పుడితడే సెన్సేషన్​​.. రయ్యిరయ్యిమంటూ దూసుకెళ్తున్నాడుగా!

Tilak Varma Asia Cup 2023 : భారత క్రికెట్​లో కొత్త స్టార్‌ వచ్చేస్తున్నాడు అంటూ... గత కొద్ది రోజులుగా ఓ పేరు తెగ వినిపిస్తోంది. అదే తిలక్‌ వర్మ. అనుకున్నట్లుగానే అతడి ఆసియా కప్‌ జట్టుకు సెలెక్ట్ అయ్యాడు. ఇక మిగిలింది వన్డే వరల్డ్​ కప్‌. ఈ మెగాటోర్నికి కూడా అతడు ఎంపికయ్యే అవకాశముందని అంటున్నారు. ఆ వివరాలు..

Tilak Varma Asia Cup 2023 : తిలక్ వర్మ.. ఇప్పుడీ పేరు భారత క్రికెట్​లో చర్చనీయాంశంగా మారింది. అందుకు కారణం ప్రతిష్టాత్మక ఆసియా కప్‌ (Asia Cup 2023)లో టీమ్ఇండియా వన్డే జట్టుకు ఎంపిక కావడమే. దీంతో అతడు ప్రపంచకప్‌ (ODI World Cup 2023)లోనూ ఆడే అవకాశముందని అభిప్రాయాలు వినిపిస్తున్నాయి. 20 ఏళ్లకే ఐపీఎల్​లో అదరగొట్టి.. టీమ్​ఇండియా టీ20 జట్టులోకి ఎంట్రీ ఇచ్చిన ఈ హైదరాబాదీ కుర్రాడు.. అతి తక్కువ కాలంలోనే ఎదిగిన తీరు అందర్నీ ఆశ్చర్యపరుస్తోంది.

Tilak Varma Family Background : మధ్య తరగతి కుటుంబం.. 140 కోట్ల జనాభా ఉన్న మన దేశంలో.. హైదరాబాద్​ నుంచి టీమ్​ఇండియాకు ఎంపికైన వారు చాలా అరుదు. ప్రస్తుత క్రికెటర్లలో మహ్మద్ సిరాజ్ తర్వాత ఇతడే సెలెక్ట్ అయింది. సిరాజ్ తరహాలోనే తిలక్‌ది కూడా ఓ సాధారణ మధ్యతరగతి ఫ్యామిలీ. తండ్రి నాగరాజు వర్మ ఎలక్ట్రీషియన్. తల్లి గృహిణి. తిలక్‌కు చిన్నతనం నుంచి క్రికెట్ అంటే ఎక్కువ ఆసక్తి.

Tilak Varma Cricket Career : అలా మొదలైంది... 11 ఏళ్ల వయసులో టెన్నిస్ బాల్​తో క్రికెట్ ఆడుతూ కోచ్ సలీం దృష్టిలో పడటం, ఆ తర్వాత ఆయన తిలక్‌కు లింగంపల్లిలోని ఒక అకాడమీలో శిక్షణ ఇప్పించడం.. దీంతో అతడు రోజూ 20 కిలోమీటర్లు జర్నీ చేసి క్రికెట్ సాధన చేయడం.. ఇలా తిలక్ క్రికెట్ జర్నీ మొదలైంది. అతడు ముందుగా స్కూల్ లీగ్స్‌లో సత్తా చాటాడు. ఆ తర్వాత హైదరాబాద్‌ తరఫున 2018–19 సీజన్​లో 16 ఏళ్లకే రంజీ ఎంట్రీ ఇచ్చాడు. మొదటి సీజన్​లోనే ఏడు మ్యాచ్‌లలో 215 స్కోరు చేసి ఆకట్టుకున్నాడు. అనంతరం టీ20 ఫార్మాట్​ ముస్తాక్ అలీ ట్రోఫీలోనూ మంచిగా రాణించాడు. లిస్ట్-ఏ క్రికెట్లోనూ అద్భుతంగా ఆకట్టుకున్నాడు.

Tilak Varma IPL Career : ఐపీఎల్​లో ధనాధన్​.. తిలక్​ ధనాధన్ బ్యాటింగ్​.. పార్ట్ టైం స్పిన్‌ చూసిన ముంబయి ఇండియన్స్.. 2022 సీజన్ ముందు జరిగిన వేలంలో రూ.20 లక్షల బేస్ ప్రైజ్​కు కొనుగోలు చేసింది. తుది జట్టులోనూ అవకాశమిచ్చింది. దీంతో అతడు తన మొదటి సీజన్​లోనే 14 మ్యాచ్‌ల్లో 36కు పైగా యావరేజ్​తో 303 రన్స్​ సాధించాడు. ఈ ఏడాది ఐపీఎల్‌లోనూ అదే జోరు కొనసాగించాడు. 11 మ్యాచ్‌ల్లో 43 యావరేజ్​తో 200కు పైగా స్కోర్​ చేశాడు. ముఖ్యంగా మిడిలార్డర్​ఒత్తిడిలోనూ అద్భుతంగా బ్యాటింగ్ చేయడం అందర్నీ ఆకట్టుకుంది. లెఫ్ట్ హ్యాండర్ అవ్వడం కూడా అతడికి బాగా కలిసొచ్చింది.

రీసెంట్​గా ముగిసిన వెస్టిండీస్‌తో టీ20 సిరీస్‌కు మొదటిసారి టీమ్​ఇండియా జట్టులో చోటు సంపాదించుకున్నాడు. అంచనాలకు తగ్గట్టు 5 మ్యాచుల్లో 173 పరుగులు చేశాడు. ఈ ప్రదర్శనే అతడి ఆసియా కప్ వన్డే జట్టులో చోటు దక్కేలా చేసింది.

Tilak Varma ODI World Cup : మరి ప్రపంచ కప్పులో?.. ఆసియా కప్​లో తిలక్ వర్మకు చోటు దక్కడంతో.. వరల్డ్ కప్​ రేసులోకి వస్తాడని అనుకుంటున్నారు. ఎందుకంటే ఆసియా కప్​ జట్టే వరల్డ్ కప్​ కూడా ఉంటుంది. వన్డే టీమ్​లో రెగ్యులర్ ప్లేయర్స్​గా ఉన్న శ్రేయస్ అయ్యర్, కేఎల్ రాహుల్ ఫిట్‌నెస్‌ సమస్యలతో బాధ పడుతున్నారు. అది తిలక్‌కు కలిసొచ్చే అంశం. వీరిద్దరు కూడా ఆసియా కప్‌కు జట్టుకు ఎంపికయ్యారు. కానీ ఈ టోర్నీలో ఫిట్​నెస్​ చూపించలేకపోతే...

వన్డే ప్రపంచకప్‌కు ఎంపిక కావడం కష్టమనే చెప్పాలి. అసలే టీమ్​ఇండియా.. చాలా కాలంగా నాలుగో స్థానంలో ప్లేయర్​ లేక చాలా ఇబ్బంది పడుతోంది. అందుకు సరైన ప్రత్యామ్నాయం తిలక్​ అనే అంటున్నారు. కాబట్టి వరల్డ్​కప్​కు శ్రేయస్ లేకపోతే తిలక్ సెలెక్ట్ అయ్యే ఛాన్స్ ఎక్కువగా ఉంటుంది. కానీ అంతకన్నా ముందు ఈ ఆసియా కప్​ తుది జట్టులో అతడికి ఛాన్స్​ దక్కుతుందా లేదా అన్నది ప్రస్తుతం ఆసక్తికరంగా మారింది. ఒకవేళ ఛాన్స్ దక్కి.. అక్కడ అతడు రెచ్చిపోతే.. ప్రపంచకప్​లో పక్కా ఉంటాడు.