టీ20 ప్రపంచకప్ను భారత్ నుంచి యూఏఈకి తరలించనున్నట్లు బీసీసీఐ అధ్యక్షుడు సౌరభ్ గంగూలీ ప్రకటించాడు. టోర్నీ నిర్వహించనున్న అక్టోబర్-నవంబర్ నెల నాటి కొవిడ్ పరిస్థితులను ఇప్పుడే అంచనా వేయలేమని తెలిపాడు. అందుకే టోర్నీ వేదికను భారత్ నుంచి మార్చాలని ఐసీసీకి విన్నవించింది బీసీసీఐ.
"టీ20 ప్రపంచకప్ వేదికను భారత్ నుంచి యూఏఈకి తరలించాలని నిర్ణయించాం. ఈ విషయాన్ని ఐసీసీకి విన్నవించాం. సంబంధిత విషయాలు త్వరలోనే వెల్లడిస్తాం" అని గంగూలీ పేర్కొన్నాడు.
కొవిడ్ వైరస్ విజృంభణతో దేశంలో టోర్నీ నిర్వహణ కష్టమైంది. దీంతో ఈ విషయంపై స్పష్టత ఇవ్వాలని ఐసీసీ.. బీసీసీఐని మేలోనే అడిగింది. అందుకు నెల సమయం కోరింది బీసీసీఐ. జూన్ 28తో ఆ గడువు ముగియనుంది. దీంతో టోర్నీ తరలింపు విషయం అధికారికంగా ఐసీసీకి తెలిపింది బీసీసీఐ.
ఇదీ చదవండి: Team India: టీమ్ఇండియా.. మరో ఛాలెంజ్కు సిద్ధం
ప్రణాళిక ఇలా..
టీ20 ప్రపంచకప్ను అక్టోబర్ 17 నుంచి ప్రారంభించాలని ఐసీసీ భావిస్తోంది. ఇంతకంటే ముందు యూఏఈ వేదికగా ఐపీఎల్ రెండో దశ జరగనుంది. మధ్యలో ఆగిపోయిన ఐపీఎల్ను సెప్టెంబర్ 19 నుంచి అక్టోబర్ 15 వరకు జరపాలని యోచిస్తోంది బీసీసీఐ. అంటే ఈ రెండు టోర్నీలకు మధ్య రెండు రోజుల సమయం మాత్రమే ఉంటుందన్న మాట. రెండు టోర్నీల మధ్య సమయం తక్కువగా ఉండడం వల్ల ఆటగాళ్లకు ఇబ్బంది కదా అనిపించొచ్చు. అయితే ఐపీఎల్లో ఆడే అగ్రశ్రేణి ఆటగాళ్లకు సమస్యేమీ ఉండదు. టీ20 ప్రపంచకప్ తొలి రౌండ్లో టాప్-8 జట్లు పోటీ పడవు. అవి నేరుగా సూపర్-12 మ్యాచ్లు ఆడతాయి. టాప్-8లో లేని బంగ్లాదేశ్, శ్రీలంక, ఐర్లాండ్, నెదర్లాండ్స్, స్కాట్లాండ్, నమీబియా, ఒమన్, పపువా న్యూ గినియా తొలి రౌండ్లో తలపడతాయి.
ఈ ఎనిమిది జట్లలో నాలుగు సూపర్-12 దశకు అర్హత సాధిస్తాయి. తొలి రౌండ్ మ్యాచ్లను యూఏఈతో పాటు ఒమన్లో నిర్వహిస్తారు. ఐపీఎల్ జరిగే దుబాయ్, అబుదాబి, షార్జా మైదానాల్లో పిచ్లకు మళ్లీ మెరుగులు దిద్ది వాటినే సూపర్-12 దశ నుంచి టీ20 ప్రపంచకప్ కోసం వినియోగిస్తారు. అంటే ప్రధాన జట్లు అక్టోబర్ 24 నుంచి బరిలోకి దిగుతాయి. ఐపీఎల్లో పాల్గొన్న ఆటగాళ్లకు అప్పటికే వారం రోజుల సమయం ఉంటుంది. ప్రస్తుతం ఇంగ్లాండ్ పర్యటనలో ఉన్న టీమ్ఇండియా అట్నుంచి అటే యూఏఈకి వెళ్లనుంది. అందులో లేని క్రికెటర్లంతా సెప్టెంబర్ తొలి వారంలో అక్కడికి చేరుకుంటారు.
ఇదీ చదవండి: బయోబబుల్ అతిక్రమణ.. క్రికెటర్లపై విచారణకు ఆదేశం
