ఎన్నో రికార్డులను సాధించిన భారత దిగ్గజ క్రికెటర్ సునీల్ గావస్కర్(Gavaskar).. తనదైన శైలి ఆటతో ఎందరో అభిమానులను సంపాదించుకున్నాడు. ఆటకు సంబంధించిన మెలకువలను, విలువైన సలహాలను ఇస్తూ ఇప్పటికీ ఎంతో మంది క్రికెటర్లకు స్ఫూర్తిగా నిలిచిన అతడు.. కామెంటేటర్గానూ సేవలందిస్తున్నాడు. ఈ క్రమంలోనే ఓ ఇంటర్వ్యూలో పాల్గొన్న ఇతడు.. తన కెరీర్లో జాతీయ జట్టుకు ఎందుకు కోచ్గా వ్యవహరించలేదో వెల్లడించాడు.
"నేను మైదానంలో ఆడేటప్పుడు సహా మిగతా సమయాల్లోనూ క్రికెట్ను చాలా ఎక్కువగా చూస్తాను, గమనిస్తాను. అయితే ఒక్కసారి అందులో నుంచి బయటకు వస్తే మాత్రం అడపాదడపా చూస్తాను. మిగతా వ్యాపకాలతో కొంచెం బిజీ అయిపోతాను. జీఆర్ విశ్వనాథ్ లేదా మాధవ్ మంత్రిలా ప్రతి బంతిని క్షుణ్ణంగా పరిశీలించలేను. ఒకవేళ కోచ్ లేదా సెలక్టర్ అవ్వాలని అనుకుంటే మ్యాచ్లోని ప్రతిబంతిని క్షుణ్ణంగా గమనించగలగాలి. అయినా నేనెప్పుడు కోచ్ అవ్వాలని అనుకోలేదు"
-గావస్కర్, టీమ్ఇండియా మాజీ క్రికెటర్
దిగ్గజ క్రికెటర్లు సచిన్ తెందుల్కర్(Sachin), రాహుల్ ద్రవిడ్(Dravid), వీవీఎస్ లక్ష్మణ్(VVS Laxman), గంగూలీతో(Ganguly) కలిసి ఆటకు సంబంధించిన విషయాలను పంచుకోవడం, సలహాలు ఇవ్వడం, దానిపై చర్చించుకోవడం ఎంతో సంతోషంగా ఉందని చెప్పాడు గావస్కర్.
"నా దగ్గరకు వచ్చిన చాలా మంది ఆటగాళ్లకు ఆటకు సంబంధించి విలువైన సలహాలు ఇచ్చాను. సచిన్, ద్రవిడ్, గంగూలీ, సెహ్వాగ్, లక్ష్మణ్లతోనూ నా ఆలోచనలను పంచుకోవడం, వారితో కలిసి చర్చించడం ఎంతో సంతోషంగా ఉంది. నా వంతుగా సలహాలు, మెలకువలు ఎంతో మందికి చెబుతూనే ఉన్నాను. కానీ పూర్తిస్థాయిలో కోచ్ కావలనుకోలేదు" అని గావస్కర్ చెప్పాడు.
ఇదీ చూడండి Yuvaraj: 'టీమ్ఇండియాకు అది మైనస్.. కానీ'
