మరికొద్దిసేపట్లో భారత్, శ్రీలంక(IND Vs SL) మధ్య తొలి వన్డే ప్రారంభం కానుంది. కోచ్ రాహుల్ ద్రవిడ్ నేతృత్వంలో శిఖర్ ధావన్(Shikhar Dhawan) సారథ్యంలో టీమ్ఇండియా బరిలో దిగనుంది. ఈ మ్యాచ్లో కెప్టెన్ శిఖర్ ధావన్ ఓ మైలురాయిని చేరుకునే అవకాశం ఉంది. అంతర్జాతీయ కెరీర్లో 10 వేల పరుగుల మైలురాయిని చేరుకునేందుకు ధావన్ మరో 35 పరుగులు చేయాల్సి ఉంది. అయితే లంకతో జరగనున్న తొలి మ్యాచ్లోనే ఈ ఘనత సాధించే అవకాశం ఉంది. ఒకవేళ ఇదే జరిగితే ఆ ఘనతను సాధించిన 14వ భారత బ్యాట్స్మన్గా(261 ఇన్నింగ్స్లో) ధావన్ రికార్డుకెక్కుతాడు.
శిఖర్ ధావన్ కెరీర్లో ఇప్పటివరకు 142 వన్డేల్లో 45.28 సగటుతో 5,977 పరుగులు చేయగా.. అందులో 17 సెంచరీలు 32 అర్ధశతకాలున్నాయి. దీంతో పాటు భారత్ తరఫున 34 టెస్టులకు ప్రాతినిధ్యం వహించి 2,315 రన్స్ సాధించగా.. 65 టీ20లు ఆడి 1,673 పరుగులు నమోదు చేశాడు.
వన్డేల్లో 5,977 పరుగులు చేసిన ధావన్.. మరో 23 పరుగుల చేస్తే, వన్డేల్లో 6 వేల రన్స్ మైలురాయిని చేరుకుంటాడు. ఒకవేళ ఈ ఘనత సాధిస్తే.. 6వేల పరుగులు చేసిన 10వ భారత బ్యాట్స్మన్గా నిలుస్తాడు. అంతేకాకుండా విరాట్ కోహ్లీ(136 ఇన్నింగ్స్) తర్వాత అత్యంత వేగంగా ఈ మైలురాయిని చేరుకున్న భారత క్రికెటర్గా ధావన్(140 ఇన్నింగ్స్) ఘనత సాధిస్తాడు. 147 ఇన్నింగ్స్లు ఆడి 6 వేల పరుగులు చేసిన బ్యాట్స్మన్గా మాజీ కెప్టెన్ సౌరవ్ గంగూలీ నిలిచాడు.
ఇదీ చూడండి.. కోహ్లీ, బాబర్ లేకుండానే అక్తర్ 'ఆల్టైం వన్డే XI'
