చెన్నై సూపర్ కింగ్స్ కెప్టెన్ మహేంద్ర సింగ్ ధోనీ ఇండియన్ ప్రీమియర్ లీగ్‌లో అత్యంత క్రేజ్ ఉన్న ఆటగాడు అనడంలో ఎటువంటి సందేహం లేదు. ఐతే ఈ ఏడాది జరగబోయే ఐపీఎల్ సీజన్లో మహేంద్ర సింగ్ ధోనీని ఎప్పుడెప్పుడు చూస్తామా అని అభిమానులు ఉత్కంఠగా ఎదురుచూస్తున్నారు. ఎందుకంటే ఈ ఏడాది జరిగే 16వ ఐపీఎల్ సీజన్తోనే ధోనీ తన క్రికెట్ కెరీర్కు కచ్చితంగా ముగింపు పలికే అవకాశాలు ఉన్నాయని తెలుస్తోంది. ఇప్పటివరకు చెన్నై సూపర్ కింగ్స్ టీమ్కు సారథ్యం వహిస్తూ వస్తున్న మహీ.. ఆ జట్టుకు 4 టైటిళ్లను అందించాడు. ఇప్పటివరకు జరిగిన 15 ఐపీఎల్ సీజన్లలో 13 సార్లు ఆడిన సీఎస్కే 11 సార్లు ప్లే ఆఫ్స్కు చేరింది. ఇది పక్కన పెడితే ఐపీఎల్ మ్యాచ్ల ద్వారానే కాకుండా మిగతా మార్గాల ద్వారా ఇప్పటివరకు ధోనీ సంపాదించిన మొత్తం ఎంతో ఇప్పుడు తెలుసుకుందాం.
ఐపీఎల్లో ధోనీ రికార్డుల మోత..
ఝార్ఖండ్లోని రాంచీలో పుట్టిన మహేంద్ర సింగ్ ధోనీ.. బ్యాటర్గా అద్భుతమైన గణాంకాలను నమోదు చేశాడు. ఇండియన్ ప్రీమియర్ లీగ్ చరిత్రలో అత్యధిక పరుగులు చేసిన ఆటగాళ్లలో మహేంద్ర సింగ్ ధోనీ కూడా ఒకడు. ఇప్పటివరకు ఆడిన ఐపీఎల్ మ్యాచుల్లో మొత్తంగా 4978 పరుగులు చేసి అత్యధిక పరుగులు చేసిన ప్లేయర్ల జాబితాలో 9వ స్థానంలో కొనసాగుతున్నాడు. అంతేగాక 39.2 సగటుతో, 135 స్ట్రైక్ రేట్తో ఉత్తమ ఆటగాడిగా ఉన్నాడు. ఇక ఐపీఎల్ సీజన్లు మొత్తం కలిపి 24 హాఫ్ సెంచరీలను తన పేరిట నమోదు చేసుకున్నాడు.
ఐపీఎల్ ధోనీ సంపాదన..
ఈ ఏడాది ఐపీఎల్ సీజన్కు జరిగిన వేలంలో ఎంఎస్ ధోనీను సీఎస్కే ఫ్రైంచైజీ అక్షరాల రూ.12 కోట్లకు కొనుగోలు చేసింది. అయితే ఈ లీగ్ ప్రారంభ సీజన్ 2008 వేలంలో ధోనీని రూ.6 కోట్లకు కొనింది సీఎస్కే ఫ్రాంఛైజీ. ఆ సీజన్లో రాజస్థాన్ రాయల్స్తో జరిగిన ఫైనల్ మ్యాచ్లో సీఎస్కే రన్నరప్గా నిలిచింది. అనంతరం మహీ కెప్టెన్సీలోనే 2010లో టైటిల్ను కైవసం చేసుకుంది. అనంతరం మహీ.. ఆ జట్టు తరఫున 2011లో 8.2కోట్లు అందుకున్నాడు. ఆ తర్వాత 2014లో సీఎస్కే.. 12.5కోట్లకు అతడిని రిటైన్ చేసుకుంది. అయితే 2016,2017లో సీఎస్కే బ్యాన్ అయిన సమయంలో మహీ.. రైజింగ్ పుణె సూపర్ జెయింట్స్ తరఫున ఆడాడు. అప్పుడు అతడిని ఆ ఫ్రాంచైజీ రూ.12.5కోట్లకు దక్కించుకుంది. మళ్లీ 2018లో సీఎస్కే రీఎంట్రీ ఇచ్చాక మహీని రూ.15కోట్లకు రిటైన్ చేసుకుంది. అయితే 2022లో మాత్రం ధోనీ సూచన మేరకు జడేజాను రూ.16కోట్లకు కొనుగోలు చేసి, తనను రూ.12కోట్లకు రిటైన్ చేసుకుంది. మొత్తంగా ఇప్పటి వరకు ఐపీఎల్లో అతడు రూ.176.8.కోట్లను ఆర్జించినట్లు తెలిసింది. అయితే ఈ మెగాలీగ్లో రెమ్యునరేషన్ ద్వారా ఇప్పటివరకు అత్యధికంగా ఆర్జించిన ఆటగాళ్ల జాబితాలో.. రూ.178.6 కోట్లతో రోహిత్ శర్మ మొదటి స్థానంలో కొనసాగుతుండగా.. రాయల్ ఛాలెంజర్స్ బెంగళూరు తరఫున ఆడుతున్న స్టార్ బ్యాటర్ విరాట్ కోహ్లీ రూ.173.2 కోట్ల సంపాదనతో మూడో స్థానాన్ని దక్కించుకున్నాడు.
ధోనీ@రూ.1030 కోట్లు..
అయితే ఐపీఎల్ ద్వారానే కాకుండా బీసీసీఐ సహా ప్రముఖ బ్రాండ్ల అడ్వర్టైజ్మెంట్స్ వంటి వాటి ద్వారా కూడా భారత మాజీ కెప్టెన్ మహేంద్ర సింగ్ ధోనీ ఇప్పటివరకు రూ.1030 కోట్ల వరకు సంపాదించి ఉండొచ్చని అంచనా. ఒక్కో బ్రాండ్ ఎండోర్స్మెంట్కు రూ.3.5 నుంచి రూ.6 కోట్ల వరకు మహీ తీసుకుంటాడని సమాచారం. ఇకపోతే ఇండియన్ ప్రీమియర్ లీగ్(ఐపీఎల్)2023 సీజన్ డిజిటల్ ప్రసార హక్కులను దక్కించుకున్న జియో సినిమాతో కూడా ధోనీ భాగస్వామ్యం ఉంది.
