టీమ్ఇండియా కెప్టెన్ విరాట్ కోహ్లీపై ఓ ఆసక్తికర ట్వీట్ చేశాడు పాకిస్థాన్ ఫాస్ట్ బౌలర్ మహ్మద్ అమీర్. ఓ టర్కిష్ టీవీ సిరీస్లోని పాత్రధారి ఫొటోను జతచేస్తూ.. "బ్రదర్ ఇది మీరేనా? నేను తేల్చుకోలేకున్నా" అని నవ్వుతున్న ఎమోజీతో ట్వీట్ చేశాడు. ఆ చిత్రంలో పాత్రధారి కోహ్లీని పోలి ఉండటం వల్ల ఈ విషయాన్ని ప్రస్తావించినట్లు తెలిపాడు అమీర్.
బ్యాటింగ్ మాస్ట్రో కోహ్లీ
అమీర్, కోహ్లీ మైదానంలో ప్రత్యర్థులే అయినా.. బయట ఒకరికి ఒకరు మద్దతు ఇచ్చుకుంటారు. 2016లో కోల్కతా వేదికగా జరిగిన టీ20 ప్రపంచకప్లో భారత్, పాక్ తలపడ్డాయి. ఆ మ్యాచ్ కంటే ముందు అమీర్కు కోహ్లీ తన బ్యాట్ను బహుకరించాడు. ఇటీవలే ఐసీసీ ప్రకటించిన 'స్పిరిట్ ఆఫ్ ది క్రికెట్' పురస్కారాన్ని గెలుచుకున్న కోహ్లీపై అమీర్ ప్రశంసలు కురిపించాడు. బ్యాటింగ్ మాస్ట్రో అని కోహ్లీని అభివర్ణించాడు.
