ఉమెన్స్ టీ20 ఛాలెంజ్లో ఎప్పటిలాగే మూడు టీమ్లతో ఈ ఏడాది టోర్నీ కొనసాగించనున్నట్లు భారత క్రికెట్ నియంత్రణ మండలి(బీసీసీఐ) వెల్లడించింది. ఐపీఎల్ ప్లేఆఫ్స్ జరిగే సమయంలో ఈ ఛాంపియన్షిప్ను నిర్వహించడం ఆనవాయితీగా వస్తోంది. అయితే ప్రస్తుత సీజన్లో నాలుగు టీమ్లతో టోర్నీ నిర్వహించాలనుకున్నా.. కరోనా సంక్షోభం కారణంగా మూడు జట్లతోనే మహిళల టీ20 ఛాలెంజ్ను జరుపుతామని బోర్డు స్పష్టం చేసింది.
"ప్రస్తుతానికైతే మూడు టీమ్లతో టోర్నీ నిర్వహించాలని భావిస్తున్నాం. అయితే త్వరలోనే మా నిర్ణయాన్ని వెల్లడిస్తాం. ఈ మ్యాచ్లన్నీ దిల్లీలోనే నిర్వహించేందుకు సన్నాహాలు చేస్తున్నాం. ఆస్ట్రేలియా, ఇంగ్లాండ్కు చెందిన స్టార్ మహిళా క్రికెటర్లతో మాట్లాడిన తర్వాత ఓ నిర్ణయానికి వస్తాం".
- బీసీసీఐ అధికారి
యూఏఈ వేదికగా గతేడాది జరిగిన మహిళల టీ20 ఛాలెంజ్ జరిగింది. అయితే ప్రస్తుత సీజన్లో టోర్నీని ఎప్పుడు నిర్వహించాలనే దానిపై మాత్రం ఏప్రిల్ 16న జరగనున్న అపెక్స్ కౌన్సిల్ మీటింగ్ తర్వాత స్పష్టత రానుంది. దీంతో పాటు భారత క్రికెట్ భవిష్యత్ కార్యచరణపై కూడా ఓ నిర్ణయం వెలువడనుంది.
ఇదీ చూడండి: టాస్ గెలిచిన రాజస్థాన్.. పంజాబ్ బ్యాటింగ్
