కొవిడ్ నేపథ్యంలో ఐపీఎల్ నుంచి ఆటగాళ్లు ఒక్కొక్కరుగా నిష్క్రమిస్తున్న వేళ దిల్లీ క్యాపిటల్స్ ప్రధాన కోచ్ రికీ పాంటింగ్ స్పందించాడు. ఇప్పుడు బయో బబుల్ లాంటి సురక్షితమైన ప్రదేశం మరొకటి లేదని అభిప్రాయపడ్డాడు. బయట పరిస్థితులు అత్యంత భయంకరంగా ఉన్నాయని తెలిపాడు. ఈ నేపథ్యంలో ఐపీఎల్ను స్వాగతించాల్సిందేనని పేర్కొన్నాడు.
"విరామ సమయాల్లో నేను తరచుగా ఆటగాళ్లతో మాట్లాడతాను. బయటి పరిస్థితులు ఎలా ఉన్నాయి.. మీ కుటుంబ సభ్యులు ఎలా ఉన్నారని అడుగుతుంటాను. అది చాలా ముఖ్యం కూడా. ఐపీఎల్ వల్ల మేము సురక్షితమైన ప్రదేశంలో ఉన్నాము. తాజా పరిస్థితుల్లో లీగ్ అనేది ప్రజలకు ఎంతో కొంత ఆనందాన్ని ఇస్తుందనుకుంటున్నాను."
-రికీ పాంటింగ్, దిల్లీ క్యాపిటల్స్ ప్రధాన కోచ్.
"ఇన్ని రోజులు కుర్రాళ్లు చెన్నైలో సొంత గడ్డపై ఉన్నారు. అయినా కుటుంబ సభ్యులను కలవలేకపోయారు. ఇది చాలా క్లిష్టమైన అంశం. సన్రైజర్స్తో మ్యాచ్ అనంతరం అశ్విన్ లీగ్ను వీడుతున్నట్లు తెలిపాడు. తమ కుటుంబ సభ్యులు కరోనా పోరాడుతున్నారని వెల్లడించాడు" అని దిల్లీ కోచ్ చెప్పాడు.
ఇదీ చదవండి: 'పీఎం కేర్స్'కు ఆసీస్ పేసర్ కమిన్స్ విరాళం
దిల్లీ జట్టు అనేది ఒక కుటుంబం లాంటిందని పాంటింగ్ అభిప్రాయపడ్డాడు. మహమ్మారి సమయంలో కుటుంబాలకు దూరంగా గడపడం ఇబ్బందికరంగా ఉంటుందన్నాడు. బయట ఉన్న ప్రజలందరూ క్షేమంగా ఉండాలని కోరుకుంటున్నట్లు పేర్కొన్నాడు.
బబుల్లోనే సేఫ్: నైల్
కరోనా నేపథ్యంలో ఆసీస్ ఆటగాళ్లు ఒక్కొక్కరు స్వదేశానికి వెళ్తున్న నేపథ్యంలో ఆ దేశ క్రికెటర్ కౌల్టర్ నైల్ స్పందించాడు. ప్రస్తుతం ముంబయి ఇండియన్స్కు ఆడుతున్న ఈ ఆల్రౌండర్.. బయో బబులే సురక్షితమైన ప్రాంతం అని తెలిపాడు. ఇప్పటికే ఆడం జంపా, రిచర్డ్సన్, ఆండ్రూ టై.. లీగ్ను వీడుతున్నట్లు పేర్కొన్నారు. అన్ని జాగ్రత్తలు పాటిస్తూ ఇక్కడే ఉండడం క్షేమమని నైల్ అభిప్రాయపడ్డాడు.
ఇదీ చదవండి: కామన్వెల్త్ క్రీడల్లో పాల్గొనే క్రికెట్ జట్లు ఇవే...
