క్రికెట్ అభిమానులు.. ఎంతగానో మెచ్చే ఇండియన్ ప్రీమియర్ లీగ్ అట్టహాసంగా ప్రారంభమైంది. పది జట్లు.. తమ బలాబలాలను చూపిస్తూ మ్యాచ్లను ఆడుతున్నాయి. అయితే 15 ఏళ్లుగా భారత క్రికెట్ అభిమానులను అలరిస్తున్న ఐపీఎల్.. తొలిసారి ఈశాన్య భారతంలో అడుగుపెడుతోంది. 2008లో లీగ్ ప్రారంభమైన తర్వాత మొదటి సారి ఈ సీజన్లో అసోంలోని గువహటిలో ఉన్న బర్సపారా స్టేడియం రెండు మ్యాచ్లకు వేదిక కానుంది.
అందులో ఒకటి బుధవారమే (ఏప్రిల్ 5) రాజస్థాన్ రాయల్స్, పంజాబ్ కింగ్స్ మధ్య జరుగుతోంది. మరో మ్యాచ్ ఏప్రిల్ 8న దిల్లీ క్యాపిటల్స్తో రాజస్థాన్ రాయల్స్ ఆడనుంది. అయితే ఎప్పుడూ లేనిది ఈసారి గువహటి.. ఐపీఎల్ మ్యాచ్లకు ఎందుకు ఆతిథ్యమిస్తోందో తెలుసా?.. రాజస్థాన్ రాయల్స్ టీమ్ ఈ స్టేడియాన్ని తన సెకండ్ హోమ్గా మార్చుకుంది. అంటే ఆ టీమ్ జైపుర్తోపాటు గువహటిలోనూ హోమ్ మ్యాచ్లు ఆడుతుంది. ఐదు మ్యాచ్లు జైపుర్లో, రెండు మ్యాచ్లు గువహాటిలో జరుగుతాయి.
ఈశాన్య భారతంలో క్రికెట్ అభివృద్ధి కోసం రాజస్థాన్ రాయల్స్ నడుం బిగించింది. అందులో భాగంగానే గువహటిని తమ సెకండ్ హోమ్గా ఎంచుకుంది. ఇక్కడ రెండు మ్యాచ్ లు ఆడాలని నిర్ణయించింది. నిజానికి ఐపీఎల్ను నార్త్ ఈస్ట్లోకి తీసుకురావడానికి అసోం క్రికెట్ అసోసియేషన్ తీవ్రంగా ప్రయత్నించింది. 2020లోనే రెండు మ్యాచ్లు ఫిక్స్ చేసింది. కానీ ఆ ఏడాది కరోనా కారణంగా ఐపీఎల్ యూఏఈకి తరలిపోయింది. ఈ ఏడాది మళ్లీ ఇంటా, బయట పద్ధతిలో మ్యాచులు నిర్వహించాలని నిర్ణయించడంతో గువాహటిలో మ్యాచ్లు నిర్వహించే అవకాశం దక్కింది. అయితే రాజస్థాన్ జట్టు.. గువహటిలో మ్యాచ్లు నిర్వహించడమే కాకుండా అక్కడి యువ క్రికెటర్లకు కూడా అవకాశాలు ఇవ్వాలని నిర్ణయించింది.
అయితే గువహటిలోని బర్సపారా స్టేడియంలో ఇప్పటికే పలు అంతర్జాతీయ మ్యాచ్లు జరిగాయి. ఈ మధ్యే జనవరి 10న భారత్, శ్రీలంక మధ్య వన్డే జరిగింది. గతేడాది అక్టోబర్ 2న టీమ్ఇండియా- సౌతాఫ్రికా జట్ల మధ్య టీ20, 2018లో ఇండియా- వెస్టిండీస్ మధ్య వన్డే, 2017లో ఇండియా- ఆస్ట్రేలియా మధ్య టీ20 జరిగాయి. ఈశాన్య భారతదేశంలో అతిపెద్ద స్టేడియం అయిన బర్సపారాలో 40 వేల మంది మ్యాచ్ చూసే అవకాశం ఉంది.
మరోవైపు, లీగ్లో రాజస్థాన్ రాయల్స్, పంజాబ్ జట్లు తమ తొలి మ్యాచుల్లో విజయాలు సాధించాయి. సన్రైజర్స్తో జరిగిన మ్యాచ్లో రాజస్థాన్ జట్టు.. 72 పరుగుల తేడాతో భారీ విజయం సాధించింది. కోల్కతాతో తలపడిన పోరులో పంజాబ్.. డక్ వర్త్ లాయిస్ పద్ధతిలో గెలుపొందింది.
