IPL 2023 KKR VS LSG Playoffs : ఐపీఎల్ 2023లో భాగంగా జరుగుతున్న కీలక మ్యాచ్లో లఖ్నవూ సూపర్ జెయింట్స్-కోల్కతా నైట్ రైడర్స్ తలపడ్డా. ప్లే ఆఫ్స్కు అర్హత సాధించాలంటే తప్పక గెలవాల్సిన ఈ మ్యాచ్లో మొదట బ్యాటింగ్ చేసిన లఖ్నవూ సూపర్ జెయింట్స్.. నిర్ణీత 20 ఓవర్లలో 8 వికెట్లు కోల్పోయి 176 పరుగులు చేసింది. క్వింటన్ డికాక్ (28; 27 బంతుల్లో), ప్రేరక్ మన్కడ్ (26; 20 బంతుల్లో), ఆయుష్‌ బదోని (25; 21 బంతుల్లో) ఫర్వాలేదనిపించగా.. చివర్లో వచ్చిన నికోలస్ పూరన్ (58; 30 బంతుల్లో 4 ఫోర్లు, 5 సిక్స్‌లు) హాఫ్ సెంచరీతో మెరుపులు మెరిపించాడు. కోల్కతా బౌలర్లలో సునీల్ నరైన్, వైభవ్‌ అరోరా, శార్దూల్ ఠాకూర్ రెండేసి వికెట్లు పడగొట్టగా.. హర్షిత్ రాణా, వరుణ్ చక్రవర్తి ఒక్కో వికెట్ తీశారు.
అనంతరం 177 పరుగుల భారీ లక్ష్యంతో బరిలోకి దిగిన కేకేఆర్.. 16 ఓవర్లు పూర్తయ్యేసరికి ఐదు వికెట్లు కోల్పోయి 121 పరుగులు చేసింది. జాసన్ రాయ్(45), వెంకటేశ్ అయ్యర్(24), నితీశ్ రానా(8), రెహ్మానుల్లా గుర్బాజ్(10), ఆండ్రూ రసెల్(7) పరుగులు చేశారు. లఖ్నవూ బౌలర్లలో రవి బిష్ణోయ్ రెండు వికెట్లు పడగొట్టగా.. కృనాల్ పాండ్య, కృష్ణప్ప గౌతమ్, యశ్ థాకూర్ తలో వికెట్ తీశారు.
73/5. 10.1 ఓవర్లలో లఖ్నవూ పరిస్థితి ఇది. ప్రేరక్ మన్కడ్, కరన్‌ శర్మ, డికాక్, స్టాయినిస్‌, కృనాల్ వరుసగా ఔటయ్యారు. 7 నుంచి 10 ఓవర్ల మధ్య లఖ్‌నవూకు కేవలం 19 పరుగులు మాత్రమే వచ్చాయి. దీంతో ఆ జట్టు తక్కువ స్కోరుతోనే సరిపెట్టుకునేలా కనిపించింది. కానీ చెలరేగి ఆడిన పూరన్ ఆ జట్టుకు మెరుగైన స్కోరును అందించాడు. విధ్వంసక బ్యాటింగ్‌తో ఇన్నింగ్స్‌కు ఊపు తెచ్చాడు. ఇక పూరన్.. వస్తూనే బాదుడు మొదలెట్టాడు. ఎదుర్కొన్న తొలి మూడు బంతుల్లోనే.. వరుణ్ వరుసగా 4, 4, 6 దంచేశాడు.
మరోవైపు బదోని అండగా నిలవగా.. పూరన్ ఎడాపెడా ఫోర్లు, సిక్స్‌లు బాదడం వల్ల స్కోరు బోర్డు పరుగులు పెట్టింది. దీంతో 18వ ఓవర్లో బదోని నిష్క్రమించేటప్పటికి స్కోరు 147. తర్వాతి ఓవర్లో పూరన్ రెండు సిక్స్‌లు కొట్టి పెవిలియన్కు చేరుకున్నాడు. చివరి ఓవర్లో (రసెల్) ఆఖరి రెండు బంతుల్లో గౌతమ్ వరుసగా 6, 4 దంచేశాడు. పూరన్ జోరుతో చివరి పది ఓవర్లలో లఖ్నవూ 103 పరుగులను పిండుకుంది. అతడు బదోనితో ఆరో వికెట్‌కు 74 పరుగులు జోడించాడు.
ఇదీ చూడండి: CSK Playoffs : దటీజ్ చెన్నై.. 14 సీజన్లలో 12 సార్లు.. జర్నీ సాగిందిలా..
