IPL 2022 Ravi Shastri CSK: ఈ సీజన్‌లో చెన్నై జట్టు రవీంద్ర జడేజాను కెప్టెన్గా చేసి తప్పు చేసిందని, అతడికి బదులు మాజీ ఓపెనర్‌ ఫాఫ్ డుప్లెసిస్ను అట్టిపెట్టుకొని కెప్టెన్గా నియమించాల్సిందని టీమ్ఇండియా మాజీ కోచ్ రవిశాస్త్రి అభిప్రాయపడ్డాడు. ప్రస్తుతం జరుగుతోన్న మెగా టోర్నీలో ఆ జట్టు ఇప్పటివరకు ఒక్క మ్యాచ్‌ కూడా గెలవలేదు. ఆడిన నాలుగు మ్యాచ్‌ల్లోనూ ఓటమిపాలై పాయింట్ల పట్టికలో చివర్లో కొనసాగుతోంది. శనివారం హైదరాబాద్‌తో జరిగిన మ్యాచ్‌లోనూ ఆ జట్టు ఓటమిపాలైన నేపథ్యంలో ఓ క్రీడా ఛానల్‌తో మాట్లాడిన శాస్త్రి ఈ వ్యాఖ్యలు చేశాడు.
"జడేజా లాంటి ఆటగాడు తన ఆటపై దృష్టిసారించాలని నేను అనుకుంటున్నా. స్టార్‌ ప్లేయర్‌ డుప్లెసిస్ను చెన్నై వదులుకోవాల్సింది కాదు. ధోనీ కెప్టెన్సీ బాధ్యతల నుంచి తప్పుకొన్న సమయంలో.. జడేజాకు బదులుగా డుప్లెసిస్‌కు ఆ బాధ్యతలు అప్పగించి ఉంటే బాగుండేది. జడేజా తన ఆటపైనే దృష్టిపెట్టేవాడు. ఎలాంటి ఒత్తిడి లేకుండా తన సహజసిద్ధమైన ఆట కొనసాగించేవాడు. అలా చేసుంటే చెన్నై పరిస్థితి మరోలా ఉండేది" అని శాస్త్రి వివరించాడు. కాగా.. ఈ సీజన్ ప్రారంభానికి రెండు రోజుల ముందే ధోనీ కెప్టెన్సీ వదులుకున్నాడు.
ఇదీ చూడండి:
ఐపీఎల్లో హైదరాబాద్ బోణీ.. చెన్నై నాలుగో ఓటమి
