ప్రపంచంలోనే అత్యంత ప్రేక్షదారణ పొందిన లీగ్‌లలో ఒకటైన ఐపీఎల్.. 5 నెలల వ్యవధిలోనే మరోసారి అలరించేందుకు సిద్ధమైంది. యావత్ దేశాన్ని కరోనా మహమ్మారి రెండో దశ కమ్మేస్తున్న వేళ.. ప్రేక్షకులు లేకుండానే లీగ్ నిర్వహించనున్నారు. ఈ సీజన్ను మొత్తం 6 నగరాల్లో జరపనున్నారు. తొలి మ్యాచ్లో చెన్నై వేదికగా బెంగళూరు- ముంబయి జట్లు తలపడనున్నాయి.
కొన్ని గంటల్లో ఈ సంరంభానికి తెరలేవనుండగా.. గత సీజన్లానే ఈసారి కూడా పూర్తి బయోబబుల్ వాతావరణంలో నిర్వహించేందుకు బీసీసీఐ అన్ని ఏర్పాట్లు చేసింది. కరోనా పంజా విసురుతున్నప్పటికీ.. అన్ని జాగ్రత్తలూ తీసుకొని లీగ్ జరిపేందుకు సిద్ధమైంది.
డిపెండిగ్ ఛాంపియన్ ముంబయి ఇండియన్స్ కెప్టెన్ రోహిత్‌శర్మపైనే ఈసారి అందరి దృష్టి ఉంది. మరోసారి కప్పు కొడతాడా అని అందరూ ఆలోచిస్తున్నారు. టీమ్ఇండియా సారథిగా ఎన్నో విజయాలు అందించిన కోహ్లీ ఈసారైనా బెంగళూరును విజేతగా నిలపాలని అభిమానులు కోరుకుంటున్నారు. కొన్ని నెలల నుంచి ఆటకు దూరంగా ఉన్న ధోనీని, మైదానంలో చూసేందుకు క్రికెట్ ప్రేమికులు ఆశగా ఎదురు చూస్తున్నారు.
వీటితో పాటే యువ క్రికెటర్లు చేసే బ్యాటింగ్ విన్యాసాలు, ఫ్లడ్‌లైట్లపై నుంచి వెళ్లే భారీ సిక్సులు, చివరి ఓవర్లలో నరాలు తెగే ఉత్కంఠ భరిత క్షణాలను ఈ సారి కూడా ఇళ్లలో టీవీల్లో నుంచే చూడాలి. ఇప్పటికే కొందరు క్రికెటర్లకు, జట్టు సిబ్బందికి కొవిడ్ పాజిటివ్ తేలినప్పటికీ కఠినమైన బయో బబుల్ నిబంధనలతో టోర్నీని నిర్వహిస్తున్నారు. ఈ ఏడాదే భారత్‌లో టీ20 ప్రపంచ కప్ జరగనున్న నేపథ్యంలో ఐపీఎల్లో భారత క్రికెటర్ల ప్రదర్శనపైనా అందరూ దృష్టి సారిస్తున్నారు.
