ఐపీఎల్ రెండో దశను విజయంతో ఆరంభించిన కోల్కతా నైట్ రైడర్స్.. ముంబయి ఇండియన్స్తో(MI vs KKR 2021) తలపడేందుకు సిద్ధమైంది. నేడు(సెప్టెంబరు 23) అబుదాబి వేదికగా ఇరు జట్లు పోటీ పడుతున్నాయి. తొలి మ్యాచ్లో చెన్నై సూపర్కింగ్స్ చేతిలో ఓడిన ముంబయి(MI vs CSK).. ఈ పోరులో ఎలాగైనా గెలవాలని పట్టుదలతో ఉండగా.. కేకేఆర్ కూడా విజయం సాధించి పాయింట్ల పట్టికలో ముందుకు వెళ్లాలని కసితో ఉంది. ఈ నేపథ్యంలో ఇరు జట్ల బలాబలాలపై ఓ లుక్కేద్దాం..
ముంబయికి విజయం దక్కేనా?
రెండో విడత తొలి మ్యాచ్లో సీఎస్కే చేతిలో ఓడిన ముంబయి టీమ్లో సారథి రోహిత్ శర్మ(Rohit Sharma news), స్టార్ ఆల్రౌండర్ హార్దిక్ పాండ్య లేని లోటు స్పష్టంగా కనిపించింది. ప్రత్యర్థి జట్టు నిర్దేశించిన 156 పరుగుల లక్ష్యాన్ని ఛేదించే క్రమంలో సౌరభ్ తివారి(50*) మినహా మిగతా బ్యాట్స్మెన్ విఫలమయ్యారు. అయితే కేకేఆర్తో జరిగే మ్యాచ్లోనూ రోహిత్, హార్దిక్ ఆడతారో లేదో స్పష్టత లేదు. హిట్మ్యాన్ అందుబాటులోకి వస్తాడని హెడ్ కోచ్ మహేళా జయవర్దనే చెప్పగా..ఆడే అవకాశం తక్కువని పేసర్ ట్రెంట్ బౌల్ట్ అన్నాడు. ఇద్దరు కీలక ఆటగాళ్లు లేకుండా ముంబయి ఎలా ఆడుతుందనేది ప్రస్తుతం ఆసక్తికరంగా మారింది. బౌలింగ్ విషయానికొస్తే బుమ్రా, బౌల్ట్, మిల్నే, చాహర్తో పటిష్ఠంగానే ఉంది.
ఫామ్లో కేకేఆర్
తొలి దశలో పేలవమైన ప్రదర్శనతో చతికిలపడినా.. రెండో దశ ఆరంభంలోనే రాయల్ ఛాలెంజర్స్ బెంగళూరును అలవోకగా ఓడించి ఘన విజయాన్ని అందుకుంది కోల్కతా నైట్ రైడర్స్. ఆర్సీబీ పేలవ ప్రదర్శన ఈ విజయానికి ఓ కారణమని చెప్పాలి. ఆర్సీబీ నిర్దేశించిన 93 పరుగుల స్వల్ప లక్ష్యాన్ని.. మిగతా ఆటగాళ్లకు అవకాశం ఇవ్వకుండా ఓపెనర్లుగా దిగిన శుభమన్ గిల్, వెంకటేశ్ అయ్యర్ సునాయసంగా ఛేదించారు. బౌలింగ్ విభాగంలోనూ వరుణ్ చక్రవర్తి, ఫెర్గుసన్, రసెల్ అద్భుత ప్రదర్శన చేశారు. ప్రత్యర్థి బ్యాట్స్మెన్ను ఏ దశలోనూ కోలుకోనివ్వకుండా చేశారు. ఈ ఓపెనర్లు. బౌలర్లు ఇదే ఫామ్ను కొనసాగిస్తే ముంబయి జట్టును బలంగా అడ్డుకోవడానికి తోడ్పడుతుంది. ఏదేమైనప్పటికీ వీరి ఫామ్కు మిగతా ఆటగాళ్ల సహకారం లభిస్తే ముంబయిని ఓడించొచ్చు.
అయితే ముంబయిపై కోల్కతాకు చెత్త రికార్డు ఉంది. ఐపీఎల్లో ఇరు జట్లు 28 సార్లు తలపడగా.. ముంబయి 22 మ్యాచ్ల్లో గెలిచింది. కోల్కతా కేవలం 6 సార్లు మాత్రమే పైచేయి సాధించింది.
ఇదీ చదవండి:
