అహ్మదాబాద్ నరేంద్రమోదీ స్టేడియం వేదికగా దిల్లీ-బెంగళూరు మధ్య ఆసక్తికర పోరుకు రంగం సిద్ధమైంది. బలాబలాలలో ఇరు జట్లు దాదాపు సమానంగానే కనిపిస్తున్నాయి. ఐదు మ్యాచ్ల్లో నాలుగేసి విజయాలతో ఉన్న రెండు జట్లకూ.. ఈ మ్యాచ్ ముఖ్యమైనది. రెండింటికీ 8 పాయింట్ల చొప్పున ఉన్నప్పటికీ.. రన్రేట్ మెరుగ్గా ఉన్న కారణంగా ఆర్సీబీ కంటే దిల్లీ ముందంజలో ఉంది. ఇవ్వాళ గెలిచిన జట్టు.. చెన్నైను దాటి అగ్రస్థానాన్ని కైవసం చేసుకుంటుంది.
ఆర్సీబీ పుంజుకుంటుందా?
చివరగా చెన్నైతో జరిగిన మ్యాచ్లో ఏకంగా 69 పరుగుల తేడాతో ఓడిన కోహ్లీ సేన.. సీజన్లో తొలి పరాజయాన్ని చవిచూసింది. 191 పరుగుల భారీ లక్ష్య ఛేదనలో ఆర్సీబీ పూర్తిగా తడబాటుకు గురైంది. ప్రధాన బ్యాట్స్మెన్ కోహ్లీ, డివిలియర్స్, మ్యాక్స్వెల్ తక్కువ పరుగులకే వెనుదిరిగారు. ఓపెనర్ దేవ్దత్ పడిక్కల్ ధాటిగా ఆడినప్పటికీ.. ఎక్కువసేపు క్రీజులో నిలవలేదు. వీరంతా గత మ్యాచ్ల్లో చూపిన పట్టుదలను ప్రదర్శిస్తే బెంగళూరుకు ఎదురుండదు.
బౌలింగ్లోనూ అద్భుతమైన ప్రదర్శన చేస్తోంది ఆర్సీబీ. టీమ్ఇండియా యువ పేసర్ మహ్మద్ సిరాజ్తో పాటు హర్షల్ పటేల్ ప్రత్యర్థి బ్యాట్స్మెన్ను కట్టడి చేయడంలో సఫలమవుతున్నాడు. విదేశీ పేసర్ జేమిసన్ ఈ జట్టుకు అదనపు బలం. అయితే గత మ్యాచ్లో తొలుత బౌలింగ్లో గొప్పగా రాణించిన కోహ్లీ సేన.. చివరి ఓవర్లో ఏకంగా 37 పరుగులు సమర్పించుకుంది.
ఇదీ చదవండి: 'అలా ఉండటం కష్టం.. ఒక్కడే మ్యాచ్ లాగేసుకున్నాడు'
దిల్లీ విజయాలను కొనసాగిస్తుందా?
ఈ సీజన్లో అత్యుత్తమంగా రాణిస్తున్న జట్లలో దిల్లీ ఒకటి. లీగ్ ఆరంభానికి ముందు పూర్తి స్థాయి కెప్టెన్ శ్రేయస్ అయ్యర్ గాయపడ్డప్పటికీ.. యువ సారథి పంత్ టీమ్ను బాగానే నడిపిస్తున్నాడు. సన్రైజర్స్తో సూపర్ ఓవర్కు దారి తీసిన గత మ్యాచ్లో పంత్ సేన గట్టెక్కింది. బ్యాటింగ్లో టాపార్డర్తో పాటు మిడిలార్డర్ రాణిస్తోంది. పృథ్వీ షా, శిఖర్ ధావన్, స్టీవ్ స్మిత్, స్టోయినిస్, లలిత్ యాదవ్, పంత్లతో బ్యాటింగ్ ఆర్డర్ దుర్భేద్యంగా ఉంది.
ఇక బౌలింగ్లోనూ దిల్లీ సత్తా చాటుతోంది. అమిత్ మిశ్రా, అవేశ్ ఖాన్ పొదుపుగా బౌలింగ్ చేస్తూ వికెట్లు తీస్తున్నారు. కగిసో రబాడా ఫర్వాలేదనిపిస్తున్నాడు. వీరితో పాటు గత మ్యాచ్లో రాణించిన అక్షర్ పటేల్ బౌలింగ్లో అదనపు బలంగా కనిపిస్తున్నాడు. సొంత మైదానంలో అతడు ఏ మేర రాణిస్తాడో చూడాలి మరి.
ఇదీ చదవండి: భారత్కు పాకిస్థాన్ కెప్టెన్ బాబర్ సంఘీభావం
