కరోనా కారణంగా ఐపీఎల్ను వాయిదా వేశారు నిర్వాహకులు. బయోబబుల్లోని ఆటగాళ్లకు కరోనా సోకడం వల్ల ఈ నిర్ణయం తీసుకున్నారు. అయితే లీగ్ను వాయిదా వేయడం వల్ల బీసీసీఐకి దాదాపు 2 వేల నుంచి 2,500 కోట్ల నష్ట వాటిల్లబోతుంది. తాజాగా ఈ విషయంపై స్పందించారు బోర్డుకు చెందిన ఓ అధికారి.
"అర్ధాంతరంగా ఐపీఎల్ను వాయిదా వేయడం వల్ల మేము రూ.2000 నుంచి రూ. 2,500 కోట్ల వరకు నష్టపోయే అవకాశం ఉంది. అది 2,200 కోట్ల వరకు ఉంటుందని అంచనా." అని బోర్డు అధికారి తెలిపారు.
మొత్తంగా ఐపీఎల్ ఈ సీజన్లో మే 30 వరకు 52 రోజుల పాటు 60 మ్యాచ్లు జరగాలి. కానీ 24 రోజుల్లోనే కరోనాతో ఈ సీజన్ను వాయిదా వేశారు. ఇప్పటివరకు కేవలం 29 మ్యాచ్లు మాత్రమే పూర్తయ్యాయి.
నష్టాలు ఇలా ఉన్నాయి..
- ఈ టోర్నీ వాయిదా వల్ల బీసీసీఐ ఎక్కువగా నష్టపోయేది బ్రాడ్కాస్టర్ స్టార్ స్పోర్ట్స్ నుంచి వచ్చే ఆదాయమే. ఏడాదికి రూ.3269.4 కోట్ల చొప్పున ఐదేళ్లకు గానూ రూ.16,347 కోట్లకు స్టార్ స్పోర్ట్స్తో కాంట్రాక్ట్ కుదుర్చుకుంది బీసీసీఐ. ప్రతి సీజన్కు 60 మ్యాచ్లు ఉంటాయని అనుకుంటే.. ప్రతి మ్యాచ్కు దాదాపు 54.5 కోట్ల విలువ ఉంటుంది. దీని ప్రకారం 29 మ్యాచ్లకు స్టార్ స్పోర్ట్స్ దాదాపు రూ.1580 కోట్లు చెల్లించాలి. ఒకవేళ టోర్నీ మొత్తం జరిగితే ఇది రూ.3270 కోట్లుగా ఉండేది. దీంతో బోర్డు దాదాపు రూ.1690 కోట్లు నష్టపోవాల్సి వస్తోంది.
- అలాగే ఐపీఎల్కు టైటిల్ స్పాన్సర్గా వ్యవహరిస్తోన్న వివో ప్రతి సీజన్కు రూ.440 కోట్లకు డీల్ కుదుర్చుకుంది. ఈ సీజన్ వాయిదాతో దాదాపు సగానికిపైగా నష్టాలు భరించాల్సి వస్తోంది.
- అలాగే అసోసియేట్ స్పాన్సర్స్ అన్అకాడమీ, డ్రీమ్ 11, క్రెడ్, అప్స్టాక్స్, టాటా మోటార్స్లతో ఒక్కొక్కరి ద్వారా బీసీసీఐకి రూ.120 కోట్లు రావాల్సి ఉంది. మరికొందరు సబ్సిడరీ స్పాన్సర్స్ కూడా ఉన్నారు. ఈ ఆదాయం కూడా కోల్పోవాల్సి ఉంటుంది.
వాయిదానే ఉత్తమం
ఐపీఎల్ వాయిదా వల్ల బీసీసీఐకి నష్టాలు వస్తుంటే.. ప్రసారదారు, స్పాన్నర్స్ మాత్రం హర్షం వ్యక్తం చేస్తున్నారు. వారు ఏవరేమన్నారో చూద్దాం.
- ఐపీఎల్ వాయిదా వేయాలన్న బీసీసీఐ నిర్ణయంతో ఏకీభవిస్తున్నాం. భారత్లో ప్రస్తుతం నెలకొన్న పరిస్థితులపై దృష్టిసారించడం ఉత్తమం. బిజినెస్ కంటే ఆటగాళ్ల రక్షణే ముఖ్యం -హర్ష్ జైన్, డ్రీమ్ 11 సీఈఓ, కో ఫౌండర్
- ఎవరైతే కరోనా బారినపడ్డారో వారంతా త్వరగా కోలుకోవాలని ప్రార్థిస్తున్నా. ప్రస్తుతమున్న పరిస్థితుల్లో ఇంకేమీ చెప్పలేం. -టాటా మోటర్స్ ప్రతినిధి
- ఐపీఎల్ వాయిదా నిర్ణయాన్ని స్టార్ ఇండియా సమర్థిస్తోంది. లీగ్లో పాల్గొన్న ఆటగాళ్లు, సిబ్బంది ప్రతి ఒక్కరి రక్షణ మాకు చాలా ముఖ్యం. - స్టార్ ఇండియా ప్రకటన
