'ఆ ఒక్కటి జరగకపోయుంటే.. రోహిత్​కు ఎప్పుడో కెప్టెన్సీ'

Pragyan Ojha About Rohit: రోహిత్​ శర్మ.. ప్రస్తుతం టీమ్​ఇండియాకు అన్ని ఫార్మాట్లలో విజయవంతమైన కెప్టెన్​గా కొనసాగుతున్నాడు. ఐపీఎల్​లో ముంబయి ఇండియన్స్​ను ఐదుసార్లు ఛాంపియన్​గా నిలిపాడు. అయితే.. 2013లో తొలిసారి సారథ్య బాధ్యతలు నిర్వర్తించిన హిట్​మ్యాన్​.. 2011లోనే కెప్టెన్​ అయ్యుండేవాడట. అయితే ముంబయికి కాదు. మరే టీమ్​కు..? అసలేమైంది మరి?

Pragyan Ojha About Rohit: 2013 ఐపీఎల్​ మధ్యలో పాంటింగ్​ నుంచి ముంబయి ఇండియన్స్​ సారథ్య బాధ్యతలు స్వీకరించాడు రోహిత్​ శర్మ. అదే సీజన్​లో జట్టుకు టైటిల్​ అందించాడు. ఆ తర్వాత వెనుదిరిగి చూసుకోవాల్సిన అవసరం రాలేదు. 2015, 2017, 2019, 2020లో కూడా ముంబయిని ఐపీఎల్​ విజేతగా నిలిపాడు. ఏ జట్టుకు సాధ్యంకాని రీతిలో రోహిత్​ కెప్టెన్సీలో ముంబయి ఇండియన్స్​ ఐదుసార్లు ఛాంపియన్స్​గా అవతరించింది. ఇండియన్​ ప్రీమియర్​ లీగ్​లో సక్సెస్​ఫుల్​ కెప్టెన్​గా కొనసాగుతున్నాడు హిట్​మ్యాన్​. ప్రస్తుతం టీమ్​ఇండియాకు మూడు ఫార్మాట్లలో కెప్టెన్​ కూడా ఇతడే.

అయితే రోహిత్​ శర్మ కెప్టెన్సీ గురించి ఆసక్తికర వ్యాఖ్యలు చేశాడు గతంలో డెక్కన్​ ఛార్జర్స్(డీసీ)​, ముంబయి ఇండియన్స్​కు ఆడిన టీమ్​ఇండియా క్రికెటర్​ ప్రజ్ఞాన్​ ఓజా. 2011 ఐపీఎల్​కు ముందు​ వేలం జరగకపోయినా, ముంబయి కొనకపోయినా ఆ సీజన్​లో రోహిత్​ డెక్కన్​ ఛార్జర్స్​కు కెప్టెన్​గా వ్యవహరించేవాడని అన్నాడు.

రోహిత్​ నాయకత్వ లక్షణాలను అప్పడి డీసీ కెప్టెన్​ గిల్లీ గుర్తించాడని, తన తర్వాత జట్టు​ పగ్గాలు అతడికే అప్పగించాలనుకున్నట్లు గిల్​క్రిస్ట్​ భావించాడని ఓజా గుర్తుచేసుకున్నాడు. రోహిత్​ తొలి 3 ఐపీఎల్​ సీజన్లలో ఆడమ్​ గిల్​క్రిస్ట్​ సారథ్యంలో డెక్కన్​ ఛార్జర్స్​కు ఆడాడు. ఆ తర్వాత వేలం నిర్వహించగా.. ముంబయి ఇండియన్స్​ భారీ మొత్తానికి హిట్​ మ్యాన్​ను దక్కించుకుంది.

''బ్యాటర్​గా రోహిత్​లో అసాధారణ ప్రతిభ ఉంది. దేశవాళీల్లోనూ ముంబయి.. రోహిత్​ను కెప్టెన్​గా చూడలేదు. కానీ రోహిత్​ డెక్కన్​ ఛార్జర్స్​కు ఆడుతున్నప్పుడు అతడిలో కెప్టెన్సీ నైపుణ్యాలను గిల్లీ గుర్తించాడు. రోహిత్​ బ్యాటింగ్​ తీరు, అతడికి ఉన్న స్పష్టత, ఒత్తిడిలో ఆడే విధానం.. గిల్​క్రిస్ట్​కు నచ్చాయి. అప్పుడే డెక్కన్​ ఛార్జర్స్​కు నెక్ట్స్​ కెప్టెన్​ రోహితే అని నేను అనుకున్నా.''

- ప్రజ్ఞాన్​ ఓజా, క్రికెటర్​

అందుకే ఐపీఎల్​ నాలుగో సీజన్​కు ముందు వేలం నిర్వహించకపోయుంటే.. రోహితే డెక్కన్​ ఛార్జర్స్​ కెప్టెన్​ అయ్యేవాడని చెప్పాడు ఓజా. అప్పటికే రోహిత్​ సిద్ధంగా ఉన్నాడని గిల్లీ భావించినట్లు తెలిపాడు. అయితే.. 'సచిన్​ తర్వాత ముంబయి ఇండియన్స్​కు కెప్టెన్​గా రోహిత్​ను చేయాలని భావించిన ఆ జట్టు యాజమాన్యం అతడిని వేలంలో భారీ ధరకు దక్కించుకుందని' వివరించాడు. 2012 వరకు ఐపీఎల్​లో కొనసాగిన డెక్కన్​ ఛార్జర్స్​ ఫ్రాంఛైజీ ఆ తర్వాత రద్దయింది. 2013లో 9 జట్లతోనే ఐపీఎల్​ నిర్వహించగా.. 2014లో హైదరాబాద్​ కేంద్రంగానే సన్​రైజర్స్​ జట్టు కొత్తగా వచ్చి చేరింది.

ఇవీ చూడండి: ఆ ఒక్క ఇన్నింగ్స్​.. తెలుగు కుర్రాడిని స్టార్​ని చేసింది..!