మిడ్​-సీజన్ బదిలీలు సీఎస్కేను బలోపేతం చేసేనా?

ఐపీఎల్​ ప్రస్తుత సీజన్​ నుంచి సురేశ్​ రైనా, హర్భజన్​ సింగ్​ తప్పుకున్న తర్వాత.. వారి స్థానాల్లో ఇతర ఆటగాళ్లను సీఎస్కే చేర్చుకోలేదు. మురళీ విజయ్​, కేదార్ జాదవ్​ వంటి ఆటగాళ్లు విఫలమవ్వడం వల్ల మిడ్​-సీజన్​ బదిలీ ప్రక్రియ ద్వారా కొంతమంది భారత ఆటగాళ్లను తీసుకునే అవకాశం ఉందని తెలుస్తోంది. ఈ నేపథ్యంలో సీఎస్కే ఫ్రాంచైజీ మొగ్గుచూపే అవకాశం ఉన్న ఆ ముగ్గురు ఆటగాళ్లు ఎవరో తెలుసుకుందాం.

ఇండియన్​ ప్రీమియర్​ లీగ్​(ఐపీఎల్​) చరిత్రలో అత్యంత స్థిరమైన జట్లలో చెన్నై సూపర్​కింగ్స్​ ఒకటి. ప్రతి సీజన్​లో ప్లే ఆఫ్​కు చేరుకునే ధోనీసేన.. ప్రస్తుత సీజన్​లో ఆ స్థాయి ప్రదర్శన చేయలేకపోతోంది. బెంచ్​లో కొంతమంది విదేశీ ఆటగాళ్లు ఉన్నప్పటికీ.. రిజర్వ్​లో సరైన భారత క్రికెటర్లు లేకపోవడం వల్లే టోర్నీలో ఎక్కువ పరాజయాలను ఎదుర్కొంటుంది.

ఓపెనర్లలో ఒకడిగా ఉన్న మురళీ విజయ్​, మిడిల్​ ఆర్డర్​లో కేదార్​ జాదవ్​ వంటి ఆటగాళ్లు అంచనాలకు తగ్గట్టుగా రాణించలేకపోతున్నారు. మరోవైపు సురేశ్​ రైనా, హర్భజన్ సింగ్​ ప్రస్తుత సీజన్​ నుంచి తప్పుకోగా.. వారిద్దరి స్థానంలో ఇతర ఆటాగాళ్లేవరూ ఒప్పందానికి సంతకం చేయలేదు. అయితే ఫ్రాంచైజీకి మిడ్​-సీజన్​ మార్క్​ వద్ద కొంతమంది ఆటగాళ్లను అంతర్గత బదిలీ చేసే అవకాశం ఉంది. ఈ నేపథ్యంలో సీఎస్కే జట్టులోకి వచ్చే అవకాశం ఉన్న ఆ ముగ్గురు భారత క్రికెటర్లను పరిశీలిద్దాం.

అజింక్య రహానె: టీమ్​ఇండియాలో అనుభవజ్ఞుడైన రహానె.. ప్రస్తుత సీజన్​లో దిల్లీ క్యాపిటల్స్​ జట్టుకు ఎంపికయ్యాడు. ఓపెనర్లుగా పృథ్వీషా, శిఖర్​ ధావన్​లపై యాజమాన్యం ఆసక్తి చూపగా రహానె ప్రస్తుతం బెంచ్​కు పరిమితమయ్యాడు. ఈ నేపథ్యంలో సురేశ్​ రైనా స్థానంలో అతడిని జట్టులో తీసుకునే అవకాశం ఉంది.

రహానె తన ఐపీఎల్​ కెరీర్​లో ఇప్పటివరకు ఆడిన 140 మ్యాచ్​ల్లో 32.93 సగటుతో 3820 పరుగులు చేశాడు. అందులో రెండు సెంచరీలు, 27 హాఫ్​సెంచరీలు ఉన్నాయి.

పార్థివ్ పటేల్​: గత రెండు సీజన్లలో రాయల్​ ఛాలెంజర్స్​ బెంగళూరు జట్టులో ఓపెనర్​గా రాణించాడు పార్థివ్​ పటేల్​. ఆ జట్టులో ప్రస్తుతం యువ ఆటగాడు దేవదత్​ పడిక్కల్​ రాకతో పార్థివ్​ పటేల్​ స్థానానికి గండిపడినట్లైంది. ఆర్సీబీలో బెంచ్​కే పరిమితమైన ఈ ఆటగాడిని చెన్నై సూపర్​కింగ్స్​ ఓపెనర్​ షేన్​ వాట్సన్​తో పాటు బ్యాటింగ్​ బరిలో దించడానికి పరిశీలించే అవకాశం ఉంది.

ఐపీఎల్​లో ఇప్పటివరకు 139 మ్యాచ్​లు ఆడిన పార్థివ్​ పటేల్​.. 120.78 స్ట్రైక్​రేట్​తో 2,848 పరుగులు చేశాడు.

విరాట్​ సింగ్​: దేశవాళీ క్రికెట్​లో ఝార్ఘండ్​ తరపున ప్రాతినిధ్యం వహించి గుర్తింపు పొందాడు విరాట్​ సింగ్​. ఈ సీజన్​ తర్వాత రూ.1.9 కోట్లతో విరాట్ సింగ్​ను సన్​రైజర్స్​ హైదరాబాద్​ జట్టు సొంతం చేసుకుంది. విజయ్​ హజారే ట్రోఫీలో 7 మ్యాచ్​లు ఆడిన విరాట్​ సింగ్​ 335 పరుగులు చేశాడు. సయ్యద్​ ముష్తాక్​ అలీ ట్రోఫీలో 142.32 స్ట్రైక్​రేట్​తో 342 రన్స్​ రాబట్టాడు.

ప్రస్తుతం సన్​రైజర్స్​ హైదరాబాద్​ ప్రియమ్​ గార్గ్​ను ఆడించడం వల్ల తుదిజట్టులో విరాట్​సింగ్​కు అవకాశం రాలేదు. దీంతో చెన్నై సూపర్​కింగ్స్​ తరపున ఆడేందుకు విరాట్​ సింగ్​ను పరిశీలించే అవకాశాలు కనిపిస్తున్నాయి.