అబుదాబి వేదికగా నేడు (బుధవారం) జరిగే మ్యాచ్లో రాయల్ ఛాలెంజర్స్ బెంగళూరు, ముంబయి ఇండియన్స్ తలపడనున్నాయి. ఈ పోరులో గెలిచిన వారికి ప్లే ఆఫ్స్ బెర్తు ఖాయం. ప్రస్తుతం పాయింట్ల పట్టికలో రోహిత్ సేన అగ్రస్థానంలో ఉండగా.. కోహ్లీ సేన మూడో స్థానంలో కొనసాగుతోంది.
ఈ సారి కూడా రోహిత్ లేకుండానే!
ముంబయి ఇండియన్స్.. సారథి రోహిత్ లేకుండానే మళ్లీ బరిలో దిగనుందని సమాచారం. బ్యాటింగ్ యూనిట్ సూర్యకుమార్ యాదవ్, సౌరభ్ తివారీ, ఇషాన్ కిషన్ పొలార్డ్, పాండ్యా సోదరులతో బలంగానే ఉంది. రాజస్థాన్తో జరిగిన గత మ్యాచ్లో ఆల్రౌండర్ హార్దిక్ పాండ్యా మంచి ఫామ్లోకి వచ్చాడు. డికాక్ మాత్రం విఫలమయ్యాడు. బౌలింగ్ యూనిట్లో బుమ్రా, బౌల్ట్, చాహర్, జేమ్స్ ప్యాటిన్సన్ బాగానే రాణిస్తున్నారు. కానీ గత మ్యాచ్లో వీరందరూ తేలిపోయారు. మొత్తంగా జట్టులోని ఆటగాళ్లంతా తమ ప్రదర్శనను కొంచెం మెరుగుపరుచుకుంటే ఈ మ్యాచ్లో సానుకూల ఫలితం లభించొచ్చు.
సమష్టిగా రాణిస్తే విజయం పక్కా
బెంగళూరు జట్టు ప్రస్తుతం మంచి ఫామ్లో ఉంది. లీగ్ ప్రారంభంలో తేలిపోయినా గత కొన్ని మ్యాచుల నుంచి కోహ్లీ(415) బాగా రాణిస్తున్నాడు. ఆరోన్ ఫించ్(236), దేవదత్ పడిక్కల్(343), డివిలియర్స్ ఇంకాస్త నిలకడగా ఆడితే సరిపోతుంది. మిడిల్ ఆర్డర్లో ఉన్న క్రిస్ మోరిస్, మొయిన్ అలీ, గుర్కీరత్ మన్ అంచనాల్ని అందుకోలేకపోతున్నారు. బౌలింగ్ యూనిట్ చాహల్, నవ్దీప్ సైనీ, మహ్మద్ సిరాజ్తో బలంగా ఉంది. వీరూ కూడా సమష్టిగా రాణిస్తే విజయం ఖాయం.
జట్ల అంచనా
ముంబయి ఇండియన్స్ : క్వింటన్ డికాక్, ఇషాన్ కిషన్, సూర్యకుమార్ యాదవ్, సౌరభ్ తివారీ, హార్దిక్ పాండ్యా, కీరన్ పొలార్డ్ (సారథి), కృనాల్ పాండ్యా, జేమ్స్ ప్యాటిన్సన్, రాహుల్ చాహర్, ట్రెంట్ బౌల్ట్, జస్ప్రిత్ బుమ్రా
బెంగళూరు: దేవ్దత్, ఫించ్, కోహ్లీ(కెప్టెన్), డివిలియర్స్, మొయిన్ అలీ, గుర్కీరత్ సింగ్, మోరిస్, సుందర్, సైనీ, సిరాజ్, చాహల్
ఇదీ చూడండి 'యోయో టెస్టులో కోహ్లీనే మించిపోయాడు'
