ముంబయి ఇండియన్స్ కెప్టెన్ రోహిత్ శర్మ.. ఐపీఎల్లో విజయవంతమైన కెప్టెన్లలో ఒకడిగా పేరు తెచ్చుకున్నాడు. ఇప్పటికే నాలుగుసార్లు(2013,15,17,19) జట్టును విజేతగా నిలిపాడు. ఈ క్రమంలోనే పలు ఘనతలు సాధించాడు. ఇప్పుడు మరో రెండు రికార్డులకు చేరువలో ఉన్నాడు.
ఆ రికార్డులు ఏంటి?
రోహిత్ మరో 56 పరుగులు చేస్తే.. ముంబయి జట్టు తరఫున 4000 పరుగులు చేసిన తొలి బ్యాట్స్మన్గా నిలుస్తాడు. అదే 96 పరుగులు చేస్తే, కోల్కతా నైట్రైడర్స్పై 1000 పరుగులు పూర్తవుతాయి. దీంతో టోర్నీలోనే ఓ జట్టుపై, ఈ ఘనత సాధించిన తొలి ఆటగాడిగా చరిత్ర సృష్టిస్తాడు. ఇదే సీజన్లో సెప్టెంబరు 23న ఇరుజట్ల మధ్య జరిగిన మ్యాచ్లో హిట్మ్యాన్ 80 పరుగులతో అదరగొట్టాడు. ఇప్పుడూ అదే ఫామ్ కొనసాగిస్తే ఒక్క దెబ్బకు రెండు రికార్డులు కొట్టిన బ్యాట్స్మన్గా నిలుస్తాడు.
కోల్కతాపై ముంబయిదే పైచేయి
ఇప్పటివరకు రెండుజట్ల మధ్య 26 మ్యాచ్లు జరగ్గా, ముంబయి 20 సార్లు గెలిచింది. దీనిబట్టి కోల్కతాపై ముంబయి ఎంతలా పైచేయి సాధించిందో అర్థమవుతుంది.
కోల్కతా కెప్టెన్ మారాడు
ఈ సీజన్లో వరుస ఓటములతో విమర్శలు ఎదుర్కొంటున్న దినేశ్ కార్తీక్.. కోల్కతా కెప్టెన్సీ నుంచి తప్పుకున్నాడు. ఆ బాధ్యతల్ని మోర్గాన్కు అందజేస్తున్నట్లు తెలిపాడు. ఈ మేరకు ఫ్రాంచైజీ ప్రకటన విడుదల చేసింది.
గెలిస్తే ముంబయి టాప్కే
ప్రస్తుతం 10 పాయింట్లతో రెండో స్థానంలో ఉన్న ముంబయి.. ఈ మ్యాచ్లో గెలిస్తే రన్రేట్ ఆధారంగా అగ్రస్థానానికి చేరుకుంటుంది. ఒకవేళ కోల్కతా గెలిస్తే.. నాలుగో స్థానంలోనే ఉంటుంది.
