కెప్టెన్గా ధోనీ విభిన్న ఆలోచనలు చేస్తాడని, తద్వారా తనకు కావాల్సిన ఫలితాన్ని సాధిస్తాడని భారత మాజీ స్పిన్నర్ ప్రజ్ఞాన్ ఓజా వెల్లడించాడు. పంజాబ్-చెన్నై జట్ల చివరి ఐపీఎల్ లీగ్ మ్యాచ్ ఆదివారం జరగనున్న నేపథ్యంలోనే ఈ వ్యాఖ్యలు చేశాడు.
టోర్నీ ఫ్లేఆఫ్స్ నుంచి ఇప్పటికే చెన్నై తప్పుకోగా, పంజాబ్ చివరి అవకాశం కోసం పోరాడనుంది. అయితే కింగ్స్ ఎలెవన్ జట్టులో గేల్, కేఎల్ రాహుల్ కోసం ధోనీ ప్రత్యేక ప్రణాళిక సిద్ధం చేసే ఉంటాడని ఓజా అభిప్రాయపడ్డాడు.
"గేల్ను ఔట్ చేయాలని ధోనీ అనుకోడు. భిన్నమైన ప్లాన్ వేస్తాడు. పంజాబ్ జట్టులో మిగిలిన బ్యాట్స్మెన్కు స్ట్రైకింగ్ వచ్చేలా చేసి గేల్పై ఒత్తిడి పెంచుతాడు. దీంతో గేల్ ఫ్రస్టేషన్కు గురై స్వీయ తప్పిదం చేయొచ్చు. ఎవరైనా ప్లేయర్ బాగా ఆడుతుంటే, అతడి మైండ్తో గేమ్స్ ఆడాలనుకుంటాడు ధోనీ. నాకు తెలిసి ఇదే సరైన వ్యూహం" -ప్రజ్ఞాన్ ఓజా, మాజీ స్పిన్నర్
ఎవరి ఊహకు అందని వ్యూహాలతో ప్రత్యర్థి జట్టును ధోనీ తికమక పెడతాడని చెప్పిన ఓజా.. మహీ సారథ్యంలోని తన అనుభవాల్ని పంచుకున్నాడు.
"ఫామ్లో ఉన్న క్రికెటర్ను మైదానంలో ఉన్నాసరే స్ట్రైకింగ్ రాకుండా చేస్తే, అతడికి చిరాకు వస్తుంది. అప్పుడు ఔటయ్యే అవకాశాలు ఎక్కువగా ఉంటాయి. ఇలాంటి ఎన్నో వైవిధ్యమైన ప్లాన్స్ను ధోనీ అమలు చేశాడు" అని ప్రజ్ఞాన్ ఓజా తెలిపాడు.
