కోల్కతా నైట్రైడర్స్.. 2012, 2014 సీజన్లలో విజేతగా నిలిచి కోట్లాది మంది అభిమానుల్ని సంపాదించుకుంది. కానీ ఆ తర్వాత అంచనాల్ని అందుకోవడంలో విఫలమవుతూ వచ్చింది. గతేడాది దినేశ్ కార్తీక్ సారథ్యంలో బరిలో దిగిన ఈ జట్టు ఐదో స్థానంతో సరిపెట్టుకుని ప్లేఆఫ్స్కు అర్హత సాధించలేకపోయింది. కానీ ఈసారి వేలంలో ప్యాట్ కమిన్స్ను రికార్డు ధరకు కొనుగోలు చేసిన ఈ జట్టు అతడిపై భారీ ఆశలు పెట్టుకుంది. ఈ సీజన్ తమ తొలి మ్యాచ్లో చెన్నై జట్టుపై పరాజయాన్ని మూటగట్టుకున్న ముంబయి ఇండియన్స్తో నేడు తలపడనుంది కేకేఆర్. ఈ నేపథ్యంలో ఇరు జట్ల బలాలు, బలహీనతలు ఏంటి? జట్టులోని కీలక ఆటగాళ్లు ఎవరు? అనే విషయాలు తెలుసుకుందాం.
ఆల్రౌండర్లే కోల్కతా బలం
సునీల్ నరేన్, ఆండ్రూ రసెల్.. వీరిద్దరూ ఐపీఎల్లో అత్యుత్తమ ఆల్రౌండర్లు అని అనడంలో ఎలాంటి సందేహం లేదు. వీరి వల్ల జట్టులో సమతుల్యం ఏర్పడి బ్యాటింగ్, బౌలింగ్ లైనప్ బలంగా మారుతుంది. తాజాగా జరిగిన కరీబియన్ లీగ్లోనూ సత్తాచాటాడు నరేన్. రసెల్ గత సీజన్లో జట్టుకు కీలక సభ్యుడిగా ఉన్నాడు. ఒక ఓవర్తోనే మ్యాచ్ గమనాన్నే మార్చే సామర్థ్యం ఇతడి సొంతం. వీరి తర్వాత ఆప్షన్ క్రిస్ గ్రీన్, ఈసారి వేలంలో భారీ ధరకు కొనుగోలు చేసిన ప్యాట్ కమిన్స్ రూపంలో మరో ఇద్దరు ఆల్రౌండర్లు జట్టుకు దొరికారు. భారత యువ ఆటగాడు కమలేశ్ నాగర్కోటి కూడా రాణిస్తే జట్టుకు తిరుగుండదు.
పసలేని బ్యాటింగ్ లైనప్
జట్టులో నాణ్యమైన విదేశీ ఆటగాళ్లు కనిపిస్తున్నా బ్యాటింగ్ లైనప్ మాత్రం కాస్త బలహీనంగా ఉంది. కెప్టెన్ దినేశ్ కార్తీక్ ఫినిషర్ పాత్ర పోషిస్తున్నా.. ఇతడి తర్వాత శుభ్మన్ గిల్, నితీశ్ రానా మాత్రమే చెప్పుకోదగ్గ ఆటగాళ్లుగా కనిపిస్తున్నారు. క్రిస్ లిన్, రాబిన్ ఉతప్పను వదులుకున్న ఫ్రాంచైజీ ఇపుడు గిల్, రానాలపైనే ఆధారపడాల్సి ఉంటుంది. రింకూ సింగ్, సిద్దేశ్ లాడ్, రాహుల్ త్రిపాఠి, నిఖిల్ నాయక్ రూపంలో ఆప్షన్స్ కనిపిస్తున్నా వీరికి ఐపీఎల్ అనుభవం తక్కువే.
ముంబయి ఇండియన్స్
ఆరంభమ్యాచ్లో చెన్నై జట్టుతో దీటుగా పోరాడి.. అనూహ్య రీతిలో ఓటమిని మూటగట్టుకుంది ముంబయి ఇండియన్స్. అయితే 2013 నుంచి జట్టును పరిశీలిస్తే.. తొలిమ్యాచ్ను ఓటమితో ప్రారంభించి తర్వాతి మ్యాచుల్లో విజృంభించడం ముంబయికి ఆనవాయితీగా మారింది. మరి ఈ సెంటిమెంట్ కేకేఆర్తో జరగబోయే మ్యాచ్లో ఫలించి.. కోల్కతాను మట్టికరిపిస్తుందో లేదో చూడాలి.
ఈ జట్టుకు ప్రధాన బలం సారథి రోహిత్ శర్మ, బౌలర్ జస్ప్రీత్ బుమ్రా, హార్దిక్ పాండ్య. అయితే గత మ్యాచ్లో బుమ్రా బాగా రాణించినప్పటికీ, రోహిత్ పర్వాలేదనిపించాడు. కానీ హార్దిక్ మాత్రం తేలిపాయాడు. ఏదేమైనప్పటికీ గత మ్యాచ్లో తమ ఓటమికి కారణమైన లోపాలను సరిదిద్దుకుని కేకేఆర్తో పోరుకు దిగుతామని చెప్పాడు రోహిత్.
కోల్కతా నైట్ రైడర్స్ స్క్వాడ్ : దినేశ్ కార్తీక్ (సారథి), మోర్గాన్, నితీష్ రానా, రాహుల్ త్రిపాఠి, రింకూ సింగ్, శుభ్మన్ గిల్, సిద్ధేష్ లాడ్, అలీ ఖాన్, కమలేష్ నాగర్కోటి, కుల్దీప్ యాదవ్, ఫెర్గుసన్, పాట్ కమ్మిన్స్, ప్రసీద్ మావి, వరుణ్ చక్రవర్తి, ఆండ్రూ రసెల్, క్రిస్ గ్రీన్, ఎం సిద్ధార్థ్, సునీల్ నరేన్, నిఖిల్ నాయక్, టామ్ బాంటన్.
ముంబయి ఇండియన్స్ స్క్వాడ్ : రోహిత్ శర్మ (సారథి), ఆదిత్య తారే, అన్మోల్‌ప్రీత్ సింగ్, అనుకుల్ రాయ్, క్రిస్ లిన్, ధావల్ కులకర్ణి, దిగ్విజయ్ దేశ్ ముఖ్, హార్దిక్ పాండ్యా, ఇషాన్ కిషన్, జేమ్స్ ప్యాటిన్సన్, జస్ప్రీత్ బుమ్రా, జయంత్ యాదవ్, కీరన్ పొలార్డ్, కృనాల్ పాండ్యా , మొహ్సిన్ ఖాన్, నాథన్ కల్టర్నీల్, ప్రిన్స్ బల్వంత్ రాయ్, క్వింటన్ డికాక్, రాహుల్ చాహర్, సౌరభ్ తివారీ, షెర్ఫేన్ రూథర్‌ఫర్డ్, సూర్యకుమార్ యాదవ్, ట్రెంట్ బౌల్ట్.
