ఐపీఎల్లో ముంబయి ఇండియన్స్ బౌలర్ జస్ప్రీత్ బుమ్రాకు కఠినమైన ఓవర్లు ఇస్తున్నారని టీమ్ఇండియా మాజీ క్రికెటర్, వ్యాఖ్యాత ఆకాశ్ చోప్రా అభిప్రాయపడ్డాడు. ఈ క్రమంలోనే అతనిపై ఒత్తిడి తగ్గించేందుకు తేలికైన ఓవర్లు ఇస్తే బాగుంటుందని సూచించాడు. గురువారం పంజాబ్తో ముంబయి తలపడనున్న నేపథ్యంలో.. యూట్యూబ్ ఛానెల్ వేదికగా ఆకాశ్ మ్యాచ్ను విశ్లేషించిన వీడియోను పోస్ట్ చేశాడు. బౌలింగ్ పరంగా ఉన్న సమస్యలను కింగ్స్ ఎలెవన్ పంజాబ్ పరిష్కరించుకోవాల్సి ఉందని తెలిపాడు. ముఖ్యంగా డెత్ బౌలింగ్లో షమీకి ఎవరైనా మద్దతు ఇవ్వకపోతే జట్టుకే నష్టమని పేర్కొన్నాడు.
"పంజాబ్ జట్టు బౌలింగ్లో సమస్యలు ఉన్నాయి. కాట్రెల్, నీషమ్ డెత్ బౌలింగ్కు సరైన వ్యక్తులు కాదు. షమీ మాత్రమే అందుకు సరైన బౌలర్. అంతే కాదు, నీషమ్ స్థానంలో ముజిబుర్ రెహ్మన్ను ఎంచుకుంటే బాగుంటుంది. కాట్రెల్ స్థానంలో విల్జోయెన్ లేదా క్రిస్ జోర్డాన్లను తీసుకుంటే జట్టుకు బలం చేకూరుతుంది."
-ఆకాశ్ చోప్రా, టీమ్ఇండియా మాజీ క్రికెటర్
ముంబయి ఇండియన్స్ జట్టులో జేమ్స్ పాటిన్సన్కు బదులు నాథన్ కౌల్టర్నీల్ను బరిలోకి దింపాలని ఆకాశ్ సూచించాడు.
