శనివారం ఐపీఎల్ మ్యాచ్లో చెన్నై సూపర్కింగ్స్ జట్టును రాయల్ ఛాలెంజర్స్ బెంగళూరు ఓడించడంపై సీఎస్కే అభిమానులు నిరాశ చెందారని భారత మాజీ ఓపెనర్ వీరేంద్ర సెహ్వాగ్ అన్నాడు. గతంలో ధోనీ జట్టుతో మిగిలిన టీమ్లు చాలా జాగ్రత్తగా ఆడేవని.. అయితే ఈ ఏడాది సీఎస్కే బ్యాటింగ్ తీరు గతంలో కంటే భిన్నంగా ఉందని అభిప్రాయపడ్డాడు.
"సీఎస్కే అభిమానులకు చాలా బాధగా ఉంది. గతంలో ఈ జట్టుతో ఆడాలంటే మిగిలిన టీమ్లు చాలా జాగ్రత్తగా ఉండేవి. కానీ, ఈ ఏడాది ధోనీ సేన ప్రదర్శన నిరాశ కలిగిస్తుంది. శనివారం జరిగిన మ్యాచ్లో కోహ్లీ కెప్టెన్ ఇన్నింగ్స్ ప్రత్యేకంగా నిలిచింది. తొలుత ఆర్సీబీ 150 పరుగులకు సరిపెట్టుకుంటుందని భావించాం. కానీ, డెత్ ఓవర్లలోనూ స్కోరు ఎక్కువ రాబట్టవచ్చని ఈ మ్యాచ్ ద్వారా తెలిసింది".
- వీరేంద్ర సెహ్వాగ్, టీమ్ఇండియా మాజీ క్రికెటర్
టోర్నీలో సీఎస్కే ఆడిన ఏడు మ్యాచ్ల్లో రెండింటిలో మాత్రమే విజయం సాధించి పాయింట్ల పట్టికలో ఏడో స్థానంలో నిలిచింది. సీఎస్కేపై బెంగళూరు జట్టు విజయానికి విరాట్ కోహ్లీ కెప్టెన్ ఇన్నింగ్సే ప్రధాన కారణం. ఓపెనర్లు వెంటవెంటనే వెనుదిరిగినా.. కోహ్లీ చివరి వరకు క్రీజ్లో 90 రన్స్ చేయడమే కాకుండా సీఎస్కేకు 170 పరుగుల లక్ష్యాన్ని నిర్దేశించాడు. ఆ తర్వాత బరిలో దిగిన సీఎస్కే బ్యాట్స్మన్ వరుసగా విఫలమవ్వడం వల్ల నిర్ణీత 20 ఓవర్లలో 8 వికెట్లు నష్టపోయి 132 పరుగులు చేసింది. దీంతో కోహ్లీసేన 37 రన్స్ తేడాతో గెలుపొందింది. ఆర్సీబీ బౌలర్ క్రిస్ మోరిస్ 3 వికెట్లు పడగొట్టి జట్టు విజయానికి సహకరించాడు.
