చెన్నై సూపర్ కింగ్స్తో శుక్రవారం జరిగిన మ్యాచ్లో దిల్లీ క్యాపిటల్స్ ఘన విజయం సాధించింది. ఈ క్రమంలోనే దిల్లీ కెప్టెన్ శ్రేయస్ అయ్యర్పై పలువురు మాజీలు, ప్రస్తుత క్రికెటర్లు ప్రశంసలు కురిపించారు.
తొలుత బ్యాటింగ్కు దిగిన దిల్లీ 175 పరుగులు చేసింది. ఓపెనర్లు పృథ్వీ షా(64), శిఖర్ ధావన్(35)లు అద్భుత ప్రదర్శనతో జట్టు గెలుపులో కీలకపాత్ర పోషించారు. ఆ తర్వాత ఛేదనలో చెన్నై విఫలమైంది. 44 పరుగుల తేడాతో దిల్లీ చేతిలో ఓటమి చవిచూసింది. ఈ అద్భుత విజయం సాధించిన సందర్భంగా దిల్లీ కెప్టెన్ శ్రేయస్ అయ్యర్ మాట్లాడుతూ సంతోషం వ్యక్తం చేశాడు.
"ఈ మ్యాచ్లో విజయం సాధించినందుకు చాలా సంతోషంగా ఉంది. ఓపెనర్లు ఆడిన తీరు జట్టు సభ్యుల్లో విశ్వాసాన్ని నింపింది. ముగింపు కూడా చాలా బాగుంది. మేమంతా ఒకరి విజయాన్ని మరొకరం ఆస్వాదిస్తాం. జట్టు సమావేశంలో బ్యాటింగ్ పరిస్థితులను ముందుగానే అంచనా వేసి తదనుగుణంగా ఆడతాం."
-శ్రేయస్ అయ్యర్, దిల్లీ క్యాపిటల్స్ కెప్టెన్
ఈ మ్యాచ్లో అర్ధసెంచరీ సాధించిన పృథ్వీషా మ్యాన్ ఆఫ్ ది మ్యాచ్ దక్కించుకున్నాడు. ప్రస్తుతం పాయింట్ల పట్టికలో దిల్లీ అగ్రస్థానంలో ఉంది. తమ తదుపరి మ్యాచ్లో సెప్టెంబరు 29న మంగళవారం సన్రైజర్స్ హైదరాబాద్తో తలపడనుంది.
