ఈ ఏడాది ఐపీఎల్ సీజన్.. లీగ్ చరిత్రలోనే అత్యధిక వీక్షణలు సంపాదిస్తుందని అభిప్రాయపడ్డారు టోర్నీ ఛైర్మన్ బ్రిజేశ్ పటేల్. ముంబయి-చెన్నై మ్యాచ్కు ముందు మీడియాతో మాట్లాడుతూ ఈ విషయాన్ని చెప్పారు. కరోనా వ్యాప్తి నేపథ్యంలో ఐపీఎల్కు ఆతిథ్యమివ్వడంలో ఎదురయ్యే సవాళ్ల గురించి వెల్లడించారు.
"అడ్డంకులన్నీ దాటుకుని ఎట్టకేలకు ఐపీఎల్ జరుగుతుండటం చాలా సంతోషంగా ఉంది. ఈ సుదీర్ఘ టోర్నీలో ఇది ప్రారంభం మాత్రమే. లీగ్ తొలుత వాయిదా పడినప్పుడు అభిమానులు కాస్త నిరాశ చెందారు. ఇప్పుడు స్టేడియంలో ఎవరికీ అనుమతి లేనుందున.. అందరూ టీవీల్లో లైవ్ చూస్తారు. కాబట్టి ఈసారి వ్యూయర్షిప్ ఎక్కువగా ఉంటుందని భావిస్తున్నాను"
బ్రిజేశ్ పటేల్, ఐపీఎల్ ఛైర్మన్
యూఏఈలో ఐపీఎల్ జరిగేలా కృషిచేసిన బీసీసీఐ, లీగ్ అధికారులు, భారత ప్రభుత్వానికి పటేల్ కృతజ్ఞతలు తెలిపారు. టోర్నీ నిర్వహణ విషయంలో ఎమిరేట్స్ క్రికెట్ బోర్డు తమకు చాలా మద్దతునిచ్చిందని పేర్కొన్నారు.
సెప్టెంబరు 19న భారత కాలమానం ప్రకారం రాత్రి 7.30 గంటలకు ఐపీఎల్ ప్రారంభ మ్యాచ్ జరగనుంది. చెన్నై, ముంబయి జట్లు తలపడనున్నాయి. 53 రోజుల పాటు సాగే లీగ్కు.. దుబాయ్, అబుదాబి, షార్జా స్టేడియాలు వేదికలు.
