యూఏఈ వేదికగా జరుగుతున్న ఐపీఎల్ పూర్తవ్వగానే ఆస్ట్రేలియా పర్యటనకు వెళ్లనుంది టీమిండియా. ఈ సిరీస్లో భాగంగా నాలుగు టెస్టులు, మూడు వన్డేలు, మూడు టీ20లలో ఇరుజట్లు తలపడనున్నాయి. అయితే ఐపీఎల్ కారణంగా ఇందులో ఆడాల్సిన భారత ఆటగాళ్లకు తగిన విశ్రాంతి లభించకపోవచ్చు. కానీ, ఆస్ట్రేలియా క్రికెటర్లకు మాత్రం చాలినంత విరామం ఉంది.
వారిద్దరికి తప్ప
ఆసీస్ జట్టులో పద్దెనిమిది మంది ఆటగాళ్లు ఉండగా.. అందులో పది మంది మాత్రమే ఐపీఎల్లో పాల్గొన్నారు. అందులోనూ ఆరుగురు మాత్రమే ప్రస్తుతం ప్లేఆఫ్స్లో ఆడుతున్నారు. అయితే ఆసీస్ ఆటగాళ్లైన మార్కస్ స్టోయినిస్(దిల్లీ క్యాపిటల్స్), వార్నర్(సన్రైజర్స్ హైదరాబాద్) ఇప్పటివరకు విశ్రాంతి లేకుండా 14 మ్యాచులు ఆడారు. కాబట్టి వీరిద్దరికి విరామం లభించకపోవచ్చు.
ఆర్సీబీ ఆటగాడు ఆరోన్ ఫించ్ ఇప్పటివరకు 11 మ్యాచుల్లోనే పాల్గొన్నాడు. చివరిగా అక్టోబరు 25న ఆడాడు. ఎలిమినేటర్ మ్యాచ్లో ఆడినా ఫించ్కు దాదాపు ఈ మధ్యలో 10 రోజుల పాటు విరామం దొరికింది. మరోవైపు అలెక్స్ కేరీ(3 మ్యాచ్లు), అడం జంపా(2), డేనియల్ సామ్స్(2) మాత్రమే ఆడారు.
రాజస్థాన్, కోల్కతాకు ప్లేఆఫ్స్లో చోటు దక్కకపోవడం వల్ల స్టీవ్స్మిత్, గ్లెన్ మ్యాక్స్వెల్, జోష్ హేజిల్వుడ్, ప్యాట్ కమిన్స్లకు కొంతమేర విశ్రాంతి లభిస్తుంది.
టీమిండియాపై ఒత్తిడి
భారత వైట్బాల్ సిరీస్ జట్టులోని ఉన్న ఆటగాళ్లలో దాదాపుగా అందరూ ఐపీఎల్లో పాల్గొన్నవారే. విరాట్ కోహ్లీ, ధావన్, శ్రేయస్ అయ్యర్, మనీశ్ పాండే, వాషింగ్టన్ సుందర్, చాహల్ (14 మ్యాచ్లు) ఆడగా.. ఆల్రౌండర్ హార్దిక్ పాండ్య(12), జస్ప్రీత్ బుమ్రా.. 13 మ్యాచ్లు ఆడారు. వీరందరూ ప్లేఆఫ్స్లోనూ ఆడతారు.
నవదీప్ సైనీ(12), శార్దూల్ ఠాకూర్(9) మ్యాచ్లు ఆడారు. కాబట్టి ఆస్ట్రేలియా జట్టుతో పోలిస్తే టీమిండియా ఆటగాళ్లే ఎక్కువ లీగ్ మ్యాచులు ఆడటం వల్ల వీరిపై ఒత్తిడి ఎక్కువ ఉండే అవకాశముంది. మరోవైపు వరుస మ్యాచులు ఆడటం వల్ల విశ్రాంతి ఎక్కువ దొరకదు.
