కింగ్స్ ఎలెవన్ పంజాబ్ కోచ్ అనిల్ కుంబ్లే తమకు ప్రశాంతమైన వాతావరణంలో నైపుణ్యాలను నేర్పించాడని తెలిపాడు ఆ జట్టు స్పిన్నర్ రవి బిష్ణోయ్. అలాంటి శిక్షణే తమకు ఎంతో ఉపయోగపడిందని గురువారం మ్యాచ్ అనంతరం జరిగిన మీడియా సమావేశంలో వెల్లడించాడు.
"అనిల్ కుంబ్లే మాకు ప్రశాంత ధోరణితో ఎలా ఆడాలో నేర్పించాడు. టోర్నీ ప్రారంభానికి ముందే మేము బాగా ప్రాక్టీసు చేశాం. మానసిక ఒత్తిడిని జయించడం సహా లూజ్ బాల్స్ను నియంత్రణ చేయడంపై ఎక్కువ దృష్టి సారించాం. జట్టు విజయంలో కీలకపాత్ర పోషించిన కేఎల్ రాహుల్ ఒక క్లాస్ బ్యాట్స్మన్. తను కొట్టే షాట్లను ఎవ్వరికైనా పదే పదే చూడాలనిపిస్తుంది. ప్రణాళిక ప్రకారమే మ్యాచ్లో ప్రదర్శన చేశాం. చాహల్ను ఎలా ఎదుర్కోవాలనే దానిపై గేమ్ప్లాన్ అంటూ ఏమీ రూపొందించలేదు".
- రవి బిష్ణోయ్, కింగ్స్ ఎలెవన్ పంజాబ్ స్పిన్నర్
పంజాబ్ ఆల్‌రౌండ్‌ ప్రదర్శనతో గురువారం జరిగిన మ్యాచ్లో బెంగళూరును చిత్తు చిత్తుగా ఓడించింది. తొలుత కేఎల్ రాహుల్ (132 నాటౌట్‌; 69 బంతుల్లో 14x4, 7x6) భారీ శతకంతో చెలరేగడం వల్ల 206 పరుగుల భారీ స్కోర్ సాధించింది పంజాబ్. అనంతరం రవి బిష్ణోయ్(3), మురుగన్‌ అశ్విన్‌(3), షెల్డన్‌ కాట్రెల్‌(2) చెలరేగడం వల్ల బెంగళూరు 109 పరుగులకే ఆలౌటైంది.
