భారత్-న్యూజిలాండ్ మధ్య ప్రతిష్ఠాత్మక టెస్టు ఛాంపియన్షిప్ ఫైనల్ శుక్రవారం(జూన్ 18) నుంచి ప్రారంభం కానుంది. ఇప్పటికే రెండుజట్లూ ఈ మ్యాచ్ కోసం పూర్తిస్థాయిలో సిద్ధమయ్యాయి. అన్ని అస్త్రాలను సిద్ధం చేసుకుంటూ తొలి డబ్ల్యూటీసీ టైటిల్ గెలవాలన్న పట్టుదలతో ఉన్నాయి. ఐపీఎల్ తర్వాత ఏం మ్యాచ్లు ఆడని కోహ్లీసేన.. కేవలం ప్రాక్టీస్తోనే బరిలో దిగుతోంది. ఇప్పటికే ఇంగ్లాండ్తో రెండు టెస్టులు ఆడి, సిరీస్ గెలిచిన న్యూజిలాండ్.. అక్కడి పరిస్థితులను అలవాటు చేసుకుని దూకుడు మీద ఉంది. ఏదేమైనా రెండు అగ్రజట్ల మధ్య పోరు రసవత్తరంగా సాగుతుందనడంలో ఎలాంటి సందేహం లేదు. కానీ అందరూ ఆసక్తిగా ఎదురుచూసేది మాత్రం తుదిజట్టులో ఎవరెవరు ఉంటారనే దానిపై? ఈ నేపథ్యంలో ఫైనల్లో టీమ్ఇండియా తుదిజట్టుపై ఈటీవీ భారత్ అంచనా.
ఓపెనర్లుగా రోహిత్, గిల్
భారత్.. ఇప్పటికే ఫైనల్ కోసం 15 మందితో జట్టును ప్రకటించింది. ఇందులో రోహిత్, గిల్ తప్ప మరెవరూ ఓపెనర్లు లేరు. దీంతో ఈ ఇద్దరి జోడీ దాదాపు ఖరారైపోయినట్లే! న్యూజిలాండ్ బౌలర్లను ఎదుర్కొనేందుకు వీరిద్దరూ సిద్ధంగా ఉన్నారు.
మిడిలార్డర్లో నో మార్పులు!
మిడిలార్డర్లో ఎలాంటి మార్పులు లేకుండానే టీమ్ఇండియా బరిలో దిగే అవకాశం ఉంది. పుజారా, కోహ్లీ, రహానే వరుసగా మూడు, నాలుగు, ఐదో స్థానాల్లో ఆడతారు. టెస్టు క్రికెట్లో ఈ ముగ్గురు భారత జట్టుకు వెన్నెముక అని చెప్పొచ్చు. ముఖ్యంగా విదేశీ పిచ్లపై వీరి రికార్డులు మరిచిపోలేం. 15 మందితో కూడిన జట్టులో విహారికి అవకాశం దక్కినా.. తుది జట్టులో తీసుకునే అవకాశాలు చాలా తక్కువనే చెప్పాలి. అలాగే ఆస్ట్రేలియా పర్యటన నుంచి అదరగొడుతున్న వికెట్ కీపర్ పంత్కు సాహా కంటే ఎక్కువ అవకాశాలు ఉన్నాయి.
అశ్విన్,జడేజా రెడీ
హార్దిక్ పాండ్య గైర్హాజరుతో అశ్విన్, జడేజా టీమ్ఇండియాకు ప్రధాన ఆల్రౌండర్లుగా ఉండనున్నారు. స్వదేశంలో ఈ జోడీ భారత జట్టుకు ప్రధానాస్త్రమైనప్పటికీ SENA(సౌతాఫ్రికా, ఇంగ్లాండ్, న్యూజిలాండ్, ఆస్ట్రేలియా) దేశాల్లో వీరిలో ఎవరికో ఒకరికి మాత్రమే అవకాశం దక్కుతూ వస్తోంది. కానీ సౌథాంప్టన్ పిచ్పై బంతి కాస్త టర్న్ అయ్యే అవకాశాలు కనిపిస్తుండటం వల్ల వీరిద్దరూ తుదిజట్టులో ఉండొచ్చని భావిస్తున్నారు.
పేస్ దళం
మేనేజ్మెంట్కు పెద్ద తలనొప్పిగా మారిన సమస్య తుదిజట్టులో పేసర్లను ఎంపిక చేయడం. బుమ్రా, షమిలు కచ్చితంగా జట్టులో ఉంటారు. మిగిలిన ఒక్క స్థానానికి సిరాజ్, ఇషాంత్ పోటీపడుతున్నారు. ఇంగ్లాండ్ పిచ్లపై ఇషాంత్కు ఎక్కువ అనుభవం ఉంది. అలాగే సిరాజ్ ఆస్ట్రేలియా పర్యటనతో పాటు ఇంట్రాస్క్వాడ్ మ్యాచ్లోనూ అదరగొట్టాడు. దీంతో వీరిద్దరిలో ఒకరిని ఎంచుకోవడం జట్టుకు పెద్ద సమస్యగా మారింది.
టీమ్ఇండియా జట్టు అంచనా
రోహిత్ శర్మ, గిల్, పుజారా, కోహ్లీ, రహానే, పంత్, జడేజా, అశ్విన్, షమి, బుమ్రా, ఇషాంత్/సిరాజ్
